ការបាញ់ប្រហារមួយកើតមាននៅសារមន្ទីរ ជ្វីហ្វក្រុងព្រុចសែល កាលពីថ្ងៃទី២៤ ឧសភា វេលាម៉ោង១៥និង៥០នាទីម៉ោងក្នុងស្រុក បណ្ដាលឱ្យមនុស្ស៣នាក់ស្លាប់ ហើយម្នាក់ទៀតរបួសធ្ងន់បញ្ជូនទៅមន្ទីរពេទ្យ SAINT-PIERRE ។
បណ្ដាសាច់ញាតិជនរងគ្រោះនិងសាក្សីទាំងឡាយនិយាយ ថា នេះជាការបាញ់ប្រហារយ៉ាងព្រៃផ្សៃបំផុត ហើយគ្រប់គ្នាមានការក្ដុកក្ដួលខ្លាំងណាស់ ។ រដ្ឋមន្ដ្រីមហាផ្ទៃបែលហ្សុិក លោកស្រី JOELLE MILQUET អះអាងថា គេជឿជាក់ថា នេះជាអំពើប្រកាន់ពូជសាសន៍មួយ ។ រថយន្ដមួយគ្រឿងបានឈប់នៅមុខសារមន្ទីរ ។ ខ្មាន់កាំភ្លើងដែលស្ពាយថង់មួួយអមដំណើរដោយមនុស្សម្នាក់ឬ២នាក់ រង់ចាំក្នុងរថយន្ដបានដើរចូលក្នុងសារមន្ទីរ ហើយបាញ់ប្រហារមុនពេលគេចខ្លួនភ្លាមៗតាមរថយន្ដដែលគេជិះមក ។ នារី២នាក់និងបុរសម្នាក់ត្រូវស្លាប់នៅនឹងកន្លែង។ អ្នករងគ្រោះម្នាក់ទៀតជានារីត្រូវរបួសជាទម្ងន់។ លោកស្រី JOELLE MILQUET ថ្លែងទៀតថា ភ្នាក់ងារប៉ូលិសកំពុងតាមប្រមាញ់ពួកអ្នកវាយប្រហារ ។
អត្ដសញ្ញាណជនរងគ្រោះនៅពុំទាន់លាតត្រដាងនៅឡើយ ។ មានអ្នកទេសចរជាច្រើនក្នុងសារមន្ទីរពេលមានការបាញ់ប្រហារ ។ កម្រិតប្រកាសអាសន្នភេរវកម្មអាចបង្កើនក្នុងទូទាំងប្រទេស ហើយបណ្ដាភ្នាក់ងារពិសេសបានទៅកាន់កន្លែងកើតហេតុដើម្បីវិភាគលើ ប្រភពនៃព្រឹត្ដិការណ៍និងការគំរាមកំហែង ៕
