បន្ទាយមានជ័យៈ រថយន្តខ្មែរ និងម្ចាស់ប្រមាណជា៣០គ្រឿងដែលព្យាយាមឆ្លងហួសដែនកំណត់ដែលថៃអនុញ្ញតដើម្បីទៅបញ្ជូលឬ ដឹកហ្គាសមកកម្ពុជា ត្រូវបានទាហ៊ានឈុតខ្មៅ និងតំរួតថៃឃាត់ហើយត្រូវបានដោះលេងមកវិញនារសៀលថ្ងៃដដែលទី២៤ ឧសភា ២០១៤ ក្រោមការសម្របសម្រួលពីស្ថានអគ្គកុងស៊ុលប្រចាំខេត្តស្រះកែវ សមត្ថកិច្ច អាជ្ញាធរច្រកទ្វារអន្តរជាតិប៉ោយប៉ែត ។
ការឃាត់រថយន្តតូច និងមធ្យម ព្រមទាំងតៃកុងជាពលរដ្ឋខ្មែរដែលព្យាយាមចូលទៅដឹកហ្គាសពីស្ថានីយ៍ហ្គាសនៅក្នុងស្រុកអារញ្ញប្រាថេប ខេត្តស្រះកែវប្រទេសថៃ គឺធ្វើឡើងដោយយោធា និងតំរួតថៃកាលពីវេលាម៉ោង ១១ ថ្ងៃត្រង់ថ្ងៃទី២៤ ឧសភា ២០១៤ ហួសពីតំបន់ផ្សាររុងគ្លឿ ដែលភាគីថៃមិនអនុញ្ញតអោយរថយន្តរបស់ខ្មែរចូលជ្រៅហួសពីផ្សាររុងគ្លឿឡើយ ។
ការឃាត់ និងហាមមិនអោយរថយន្តខ្មែរចូលជ្រៅក្នុងទឹកដីថៃ គឺធ្វើឡើងមុនមួយថ្ងៃនៃថ្ងៃឃាត់រថយន្តខាងលើបន្ទាប់ពីប្រទេសថៃត្រូវបានធ្វើរដ្ឋប្រហាដោយយោធា និងគ្រប់គ្រងប្រទេសទាំងមូលដោយយោធា ។ ជាមួយនិងការឃាត់រថយន្តខ្មែរ និងពលរដ្ឋខ្មែរខាងលើដែលមានៈឆ្លងហួសដែនកំណត់ដែលថៃអនុញ្ញតចូលដឹកឧស្ម័នហ្គាសត្រូវបានស្ថានអគ្គកុងស៊ុលកម្ពុជាប្រចាំខេត្តស្រះកែវ ការិយាល័យទំនាក់ទំនងកម្ពុជាថៃ និងប៉ុស្តិ៍នគរបាលច្រកទ្វារអន្តរជាតិប៉ោយប៉ែត ធ្វើការសម្របសម្រួលជាមួយិទាហ៊ានឈុតខ្មៅថៃ ភ្លាមៗ រហូតដល់ម៉ោង៥ រសៀលថ្ងៃដដែលបន្ទាប់ពីមានការចុះខសន្យាពីម្ចាស់រថយន្ត និងធានាពីមន្ត្រីកម្ពុជាទើបរថយន្ត និងម្ចាស់រថយន្តជាពលរដ្ឋខ្មែរត្រូវបានអនុញ្ញត អោយត្រលប់មកវិញ ។
គួរបញ្ចាក់ថា នៅច្រកប៉ោយប៉ែតក្រៅពីរថយន្តផ្ទាល់ខ្លួនរបស់ពលរដ្ឋខ្មែរប្រកបរបរនៅផ្សាររុងគ្លឿ គឺនៅមានរថយន្តខ្មែរចូលដឹកហ្គាសពីថៃមកលក់នៅកម្ពុជា ប្រមាណ ៥០០ គ្រឿងក្នុង១ថ្ងៃៗ។ ការហាមឃាត់របស់ថៃបានធ្វើឲ្យពលរដ្ឋទាំងនោះបាត់អាជីព ហេតុនេះពួកគាត់មានៈ និងបំពានបម្រាមរបស់អាជ្ញាធរយោធាថៃ ដោយចូលទៅហួសពី ទីកំណត់ត្រឹមផ្សាររុងគ្លឿ។ ពលរដ្ឋម្ចាស់ឡានដឹកហ្គាសអាចលើគ្នាមកតវ៉ា រៀរាំង នៅនិងមាត់ច្រកមួយនេះមិនអោយរថយន្តដឹកទំនិញរបស់ថៃចូលកម្ពុជាដែរដូចកាលកន្លងមកបើពួកគេមិនបានចូលទៅដឹកហ្គាសក្នុងទឹកដីថៃដូចរាល់ដង ៕
