ដោយ ខេង ឧត្តម
សៀមរាប៖ អគ្គីភ័យឆាបឆេះផ្ទះស្តុកម៉ាស៊ីនត្រជាក់ចាស់ៗមួយកន្លែង បណ្តាលឲ្យខូចខាតទ្រព្យសម្បត្តិអស់មួយចំនួនធំអគ្គីភ័យនេះ បានឆាបឆេះនៅម៉ោង៦និង៣០នាទីព្រឹក ថ្ងៃទី១១ ខែកក្កដានេះ នៅក្នុងភូមិតាវៀន សង្កាត់សាលាកំរើក ក្រុងសៀមរាប ។
បើតាមការឲ្យដឹងពីលោកស តារា មេភូមិតាវៀន បានឲ្យដឹងថា ម្ចាស់ផ្ទះរងគ្រោះឈ្មោះម៉េង ស៊ាង អាយុជាង៤០ឆ្នាំ មានមុខរបរជាជាងជួសជុលម៉ាស៊ីនត្រជាក់។ លោកបន្តថា ផ្ទះដែលឆាបឆេះនេះ គឺមានស្តុកទុកនូវគ្រឿងម៉ាស៊ីនត្រជាក់ចាស់ៗជាច្រើន។លោក ស តារា បានឲ្យដឹងទៀតថា អគ្គីភ័យនេះបង្កឡើងដោយសារឆ្លងចរន្តអគ្គិសនី ហើយអាជ្ញាធរនៅមិនទាន់បានបូកសរុបការខូចខាតនៅឡើយទេ។ពាក់ព័ន្ធករណីនេះដែរ ក្រុមមន្ត្រីមូលដ្ឋាន ក៏ដូចជាមន្ត្រីពន្លត់អគ្គីភ័យបានត្អូញត្អែរថា ពួកគេពិបាកក្នុងការចូលជួយសង្គ្រោះផ្ទះដែលឆាបឆេះនេះខ្លាំងមែនទែន ដោយសារតែស្ថានភាពផ្លូវមានសភាពតូចចង្អៀត រថយន្តដឹកទឹកចូលមិនរួច៕
