បាត់ដំបងៈ ជាទូទៅគេតែងសង្គេតឃើញថា មុខសញ្ញាសង្ស័យដែលជាអ្នករកសុីគ្រឿងញៀនច្រើនតែមានអាវុធ ឬក៏ដាវសាំម៉ូរ៉ៃនៅជាប់នឹងខ្លួន ដែលទំនងជាក្រុមរកសុីនូវមុខរបរនេះសុទ្ធតែជាជនពាល ត្រូវកាប់គឺកាប់ ត្រូវបាញ់គឺបាញ់ហើយមើលទៅ ទើបអាចប្រកបរបរ
នេះបាន ជាក់ស្តែងជនសង្ស័យម្នាក់ដែលសមត្ថកិច្ចជំនាញឃាត់ខ្លួនបាន អមដោយ
គ្រឿងញៀនមួយចំនួនផងនោះ ក៏មានដាវសាំម៉ូរ៉ៃមួយដើមយ៉ាងមុតស្រួចដែរ ដែលគេបាន
លាក់ទុកនៅក្នុងផ្ទះ ខណៈដែលកំលាំងជំនាញចុះទៅក្របួចដល់ផ្ទះ ។
លោកវរសេនីយ៍ត្រី ស៊ាន សុណាល់ នាយការិយាល័យនគរបាលប្រឆាំងគ្រឿងញៀន
បានបញ្ជាក់ថា នៅវេលាម៉ោង ៥ ល្ងាច ថ្ងៃទី ២ ខែសីហា ឆ្នាំ២០១៦ ក្រោយពីទទួលបានព័ត៌មានស្តីពីករណីចែកចាយគ្រឿងញៀននៅក្នុងលំនៅដ្ឋានមួយកន្លែង ស្ថិតក្នុង
ភូមិថ្មគោលជើង ឃុំតាមុឺន ស្រុកថ្មគោល ខេត្តបាត់ដំបង រួចមក លោកបានចាត់តាំង
កំលាំងជំនាញ ដោយមានការសហការជាមួយនឹងកំលាំងអន្តរាគមន៍ប្រឆាំងបទល្មើស
នៃស្នងការដ្ឋាននគេបាលខេត្ត ចុះប្រតិបត្តិការទៅកាន់ទីតាំងខាងលើ ព្រមទាំងបាន
ឃាត់ខ្លួនមុខសញ្ញាដែលជាជនសង្ស័យបានម្នាក់ផងលើករណីជាក់ស្តែង ។
លោក នាយការិយាល័យបានបន្តថា ជនសង្ស័យមានឈ្មោះ សួរ គឹមអាង ភេទប្រុស
អាយុ៣៣ឆ្នាំ រស់នៅត្រង់ចំណុចខាងលើ ដោយសមត្ថកិច្ចបានធ្វើការដកហូតនូវ
គ្រឿងញៀនប្រភេទម៉ាទឹកកកចំនួន ១១ កញ្ចប់ ស្មើនឹងទម្ងន់ ៦,១០ក្រាម ថ្នាំញៀន
ប្រភេទយ៉ាម៉ាចំនួន ២ គ្រាប់ ដាវសាំម៉ូរ៉ៃមួយដើម ទូរស័ព្ទដៃ ៧ គ្រឿង ( ខូច៦គ្រឿង )
ឧបករណ៍ប្រើប្រាស់ និងសម្ភារៈសម្រាប់វេចខ្ចប់មួយចំនួនថែមទៀត ។
ក្រោយពេលនាំខ្លួនយកមកកាន់ការិយាល័យដើម្បីសាកសួររួចមក កំលាំងបានរៀបចំ
សំណុំរឿងដើម្បីបញ្ជូនខ្លួន រួមទាំងវត្ថុតាងទៅកាន់សាលាដំបូងខេត្ត និងចាត់វិធានការ
តាមផ្លូវច្បាប់ ៕
