សៀមរាបៈទោះបីក្រសួងសុខាភិបាលបានហាមឃាត់មិនអនុញាតិឲ្យគ្រប់បណ្តាគ្លីនិកឯកជនបញ្ចេញរថយន្តសង្ក្រោះរបស់ខ្លួនទៅដឹកជនរងគ្រោះ ក្នុងហេតុការណ៏គ្រោះថ្នាក់ចរាចរណ៏ តែសម្រាប់ខេត្តសៀមរាប គឺឈាន មុខគេ ដោយមិនខ្វល់ពីច្បាប់។ ករណីនេះអនុប្រធានមន្ទីរសុខាភិបាលខេត្ត បានបញ្ជាក់ធ្លាប់ជូនដំណឹង រហូត ហៅមកព្រមានហើយ តែពួកគេនៅតែបំពានដដែល។
ការដែលក្រុមគ្លីនិកឯកជន ប្រជែងគ្នាក្នុងការទៅដឹកជនរងគ្រោះ ពេលគ្រោះថ្នាក់ចរាចរណ៏ ក៏ព្រោះតែ ពួកគេអាចទាមទារថ្លៃព្យាបាលបានខ្ពស់ កប់ពពកឬហៅថាកោមិនបាច់ដាក់ទឹកហើយពុំមានជនរងគ្រោះណាអាចតថ្លៃជាមុនបាន។ចំណែកព័ត៏មានវិញគឺផ្តល់សេវា(ទឹកតែ)សម្រាប់អ្នកចុចទូរសព្ទ័ប្រាប់ថា ហេតុការណ៏កើតនៅកន្លែងណា។
ដោយសាតែងាយ ស្រួលក្នុងការប្រមូលលុយ ពីការព្យាបាល គ្លីនិកខ្លះបានទម្លាក់ស្លាកចោលដោយសាច្បាប់អាជីវកម្ម អស់សុពល ភាព តែពួកគេនៅតែបញ្ចេញរថយន្តរបស់ខ្លួន ទៅដឹកជនរងគ្រោះមកព្យាបាលទៀត តួយ៉ាងដូចគ្លីនិក រស្មី សៀមរាបជាដើម។ គ្លីនិករស្មីសៀមរាបបច្ចុប្បន្ន បានទម្លាក់ស្លាកយីហោចោលហើយ ក៏ប៉ុន្តែរថយន្តសង្គ្រោះនៅតែបន្តចេញ ទៅដឹកជនរងគ្រោះមកព្យាបាលជាធម្មតា ថែមទាំងឈានមុខគេនៅខេត្តសៀមរាប បើទោះបីជាធ្លាប់មានរឿង អាស្រូវច្រើន ដូចជាព្យាបាលយកសេវាខ្ពស់ ដោយសាជនរងគ្រោះមិនបានតថ្លៃជាមុន។
ធ្លាប់ចេញទៅដឹក ជនរងគ្រោះ តែពេលឃើញរបួសធ្ងន់ សុខចិត្តបើករថយន្តទៅវិញដោយទុកឲ្យជនរងគ្រោះស្លាប់។ មិនតែប៉ុណ្ណោះ កាលពីថ្ងៃទី២៣ខែមករាឆ្នាំ២០១៤ឪពុកជនរងគ្រោះម្នាក់ឈ្មោះឈិនស៊ន់បានដាក់ពាក្យប្តឹងថាបុគ្គលិកគ្លីនិកមួយនេះបានលួចដោះគ្រឿងអាលង្កាតម្លៃជាង១០០០ដុល្លារ ពេលជនរងគ្រោះសន្លប់បាត់ស្មារតីទៀតផង។
ករណីខាងលើនេះលោក អ៊ាប ប៊ុនលឿន អនុប្រធានមន្ទីរសុខាភិបាល បានប្រាប់តាមទូរសព្ទ័ថា គ្លីនិក រស្មីសៀមរាប ច្បាប់ផុតកំណត់ ពេលនេះកំពុងរៀបចំច្បាប់ជាថ្មី។ លោកបន្តថា ចំពោះការចេញរថយន្តទៅដឹក ជនរងគ្រោះក្នុងហេតុការណ៏គ្រោះថ្នាក់ចរាចរណ៏ ដោយគ្លីនិកឯកជន ច្បាប់មិនអនុញាតិនោះទេ តែពួកគេនៅតែ បំពាន ខាងលោកមិនត្រឹមតែជូនដំណឹងទេ ថែមទាំងធ្លាប់កោះហៅមកព្រមានជាច្រើនដងទៀត។ ក្រៅពីនោះ ក៏ធ្លាប់បានជូនដំណឹងទៅខាងប៉ូលិសផងដែរ រាល់កើតហេតុមិនត្រូវ អនុញាតិឲ្យគ្លីនិកដឹកទេ ត្រូវហៅឡានពេទ្យ របស់រដ្ឋ ប៉ុន្តែខាងពេទ្យពុំដែលបានទទួលទូរសព្ទ័ពីប៉ូលិសឡើយ៕
