កំពត-ស្រុកបន្ទាយមាស ៖ នៅព្រឹកថ្ងៃទី ១១ ខែសីហា ឆ្នាំ២០១៦ វេលាម៉ោង ៩:០០នាទី នាអធិការដ្ឋាននគរបាលស្រុក បានប្រារព្ធពិធីប្រកាសផ្ទេរភារកិច្ច តែងតាំងមុខតំណែង និងបំពាក់ឋានន្តរសក្តិជូនមន្ត្រីនគរបាលជាតិ នៃអធិការដ្ឋាននគរបាលស្រុកបន្ទាយមាស និងស្រុកអង្គរជ័យ ក្រោមអធិបតីភាពដ៏ខ្ពង់ខ្ពស់លោកឧត្តមសេនីយ៍ត្រី ម៉ៅ ច័ន្ទមធុរិទ្ធ ស្នងការនគរបាលខេត្ត ប្រតិភូអមដំណើរ ព្រមទាំងមានវត្តមានលោកអភិបាល នៃគណ:អភិបាលស្រុកបន្ទាយមាស លោកអធិការស្រុកទាំង២(ស្រុកបន្ទាយមាស និងស្រុកអង្គរជ័យ) លោកមេបញ្ជាការកងរាជអាហត្ថស្រុក និងលោកមេបញ្ជាការប្រតិបត្តិការសឹករងស្រុក សរុបមានចំនួន ១៨២រូប ។ ក្នុងពិធីនេះ បានប្រកាសផ្ទេរសម្រួលភារកិច្ច តែងតាំងមុខតំណែងជូនមន្ត្រីនគរបាលទាំងពីរស្រុកចំនួន ១៩នាក់ ក្នុងនោះក៏មានការផ្លាស់ប្តូរ ផ្ទេរសម្រួលភារកិច្ចអធិការស្រុកបន្ទាយមាស ដោយតែងតាំងលោកវរសេនីយ៍ត្រី ទន់ រ៉ូ ជាអធិការស្រុកបន្ទាយមាសថ្មី និងបំពាក់ឋានន្តរសក្តិចំនួន ៨៩នាក់ រួមមាន ៖
– ថ្នាក់វរសេនីយ៍ត្រីចំនួន ០១នាក់
– ថ្នាក់អនុសេនីយ៍ឯកចំនួន ០៨នាក់
– ថ្នាក់អនុសេនីយ៍ទោចំនួន ១៨នាក់
– ថ្នាក់អនុសេនីយ៍ត្រីចំនួន ១៨នាក់
– ថ្នាក់ព្រិន្ទបាលឯកចំនួន ២២នាក់
– ថ្នាក់ព្រិន្ទបាលទោចំនួន ១៨នាក់
– និងថ្នាក់ពលបាលឯកចំនួន ០៤នាក់ ។
ទន្ទឹមនោះក៏មានពិធីចែកអំណោយជាថវិកា និងគ្រឿងឧបភោគជូនមន្ត្រីនគរបាលដែលខ្វះខាត និងមានជំងឺប្រចាំកាយចំនួន ០៦នាក់ រួមមាន : ថវិកាចំនួន ២០មុឺនរៀលក្នុងម្នាក់ៗ ដែលជាអំណោយដ៏ថ្លៃថ្លារបស់សម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ និងមានអង្ករចំនួន ២៥គីឡូក្រាម ទឹកត្រីចំនួន ០១យួរ ទឹកសុីអុីវចំនួន ០១យួរ ស្ករសចំនួន ០១គីឡូក្រាម ប៊ីចេងចំនួន ០១គីឡូក្រាម និងអំបិលចំនួន ០១គីឡូក្រាម (ក្នុងម្នាក់ៗ) ដែលជាអំណោយដ៏ថ្លៃថ្លារបស់ឯកឧត្តម នាយឧត្តមសេនីយ៍ នេត សាវឿន អគ្គស្នងការនគបាលជាតិ ។
