(ភ្នំពេញ)៖ រដ្ឋមន្ត្រីក្រសួងទេសចរណ៍លោក ថោង ខុន បានសម្តែងការកោតសរសើរ និងសូមថ្លែងអំណរគុណដល់កងកម្លាំងសមត្ថកិច្ចនគរបាលខេត្តកែប ឧទ្យានុរក្សកែប កម្លាំងប្រតិបត្តិការចំរុះ ក្រោមការដឹកនាំរបស់លោក កែន សត្ថា អភិបាលខេត្ត និងឧត្តមសេនីយ៍ត្រី អ៊ីង
សំអុល ស្នងការនគរបាលខេត្ត ដែលបានសហការគ្នារុករក ជួយសង្គ្រោះដល់ភ្ញៀវទេចរបរទេស៣រូប នៅយប់ថ្ងៃទី១៤ ខែសីហា ឆ្នាំ២០១៦ម្សិលមិញនេះ ប្រកបដោយជោគជ័យ។រដ្ឋមន្ត្រីក្រសួងទេសចរណ៍ បានបញ្ជាក់ថា សកម្មភាពនេះបានសបញ្ជាក់ច្បាស់ ពីការទទួលខុសត្រូវខ្ពស់ របស់អាជ្ញាធរខេត្ត និងសមត្ថកិច្ច ក្នុងការយកចិត្តទុកដាក់ ថែរក្សាសន្តិសុខ សុវត្ថិភាពជូនភ្ញៀវទេសចរ សមស្របពាក្យស្លោក «កម្ពុជាព្រះរាជាណាចក្រអច្ឆរិយៈ ផ្តល់ភាពកក់ក្តៅ»។
សូមបញ្ជាក់ថា ក្រោយពីមានហេតុការណ៍ក្រុមភ្ញៀវទេសចរជនជាតិបារាំងមួយគ្រួសារ មានគ្នា៤នាក់ និងមគ្គុទ្ទេសក៍ទេសចរម្នាក់វង្វេង ផ្លូវបាត់ខ្លួននៅតំបន់ ទេសចរណ៍នាខេត្តសៀមរាបនោះ ស្រាប់តែនៅឯខេត្តកែបឯណោះវិញ ក៏មានហេតុការណ៍នេះកើតឡើងផងដែរ ដោយស្ដ្រីភ្ញៀវទេសចរជនជាតិបារាំង៣នាក់ អាយុប្រហែល២៥ឆ្នាំ បានបាត់ខ្លួនអស់មួយយប់ នៅក្នុងព្រៃភ្នំកែប ប៉ុន្តែពួកគេត្រូវបានកម្លាំងនគរបាល និងកម្លាំងប្រតិបត្តិការរកឃើញវិញហើយ នាព្រឹកថ្ងៃទី១៥ ខែសីហា ឆ្នាំ២០១៦នេះ។ ហេតុការណ៍នេះកើតឡើងនៅយប់ថ្ងៃទី១៤ ខែសីហា ឆ្នាំ២០១៦ ស្ថិតនៅកន្លែងលក់សំបុត្រចូលឧទ្យានកែប ខេត្តកែប។
ឧត្តមសេនីយ៍ត្រី អ៉ី សំអុល ស្នងការនគរបាលខេត្តកែប បានឲ្យដឹងថា ដកស្រង់សំដីឈ្មោះ អ៊ុយ សារ៉ាត់ ម្ចាស់ម៉ូតូកង់បីដែលដឹកភ្ញៀវទេសចរខាងលើ បានបញ្ជាក់ថា ម៉ោង១៦៖២០នាទី គាត់បានដឹកភ្ញៀវស្រីបារាំងទាំងបីនាក់ ទៅភ្នំកែបលុះដល់កន្លែងលក់សំបុត្រចូលឧទ្យានកែបពួកគេចុះដើរ បំណងទៅមើលថ្ងៃលិចនៅទីនោះ ដោយបានសន្យាឲ្យគាត់ទៅចាំទទួល ពួកគេនៅច្រកចេញពីខាងកើតភ្នំ។ លុះដល់ម៉ោង១៨៖០០នាទី គាត់ទៅចាំនៅគោលដៅណាត់ តែមិនឃើញភ្ញៀវបរទេសនោះ ត្រឡប់មកវិញ ក្រោយមកគាត់បានមកប្ដឹងនគរបាលខេត្ត ប្រចាំឆ្នេរកែបឲ្យជួយរក។
លោកឧត្តមសេនីយ៍ត្រី បានបន្ដទៀតថា ក្រោយទទួលបានព័ត៌មានភ្លាម លោកបានមកដល់គោលដៅចាត់តាំងកម្លាំងប្រចាំការនៅស្នងការដ្ឋាន កម្លាំងប្រចាំឆ្នេរកែប សហការជាមួយឧទ្យានុរក្ស ដែលមានកម្លាំងរួម២០នាក់ ចេញរុករកសារចុះសារឡើង ច្រើនលើកដល់ម៉ោង១៖០០រំលងអាធ្រាត្រ តែមិនទាន់បានឃើញទេ ដោយសារយប់ងងឹតពិបាកមើល។
លោកឧត្តមសេនីយ៍ត្រី បន្ថែមទៀតថា លុះព្រឹកថ្ងៃទី១៥ ខែសីហា ឆ្នាំ២០១៦នេះ ស្ត្រីជនជាតិបារាំង ដែលបាត់ពីយប់មិញត្រូវបានរកឃើញវិញហើយដោយពួកគេវង្វេង នៅក្នុងព្រៃ ហើយដេកក្នុងព្រៃភ្នំកែបពេញមួយយប់។ ក្រោយរកឃើញស្ដ្រីភ្ញៀវបរទេសទាំង៣នាក់ ត្រូវបានសមត្ថកិច្ចបញ្ជូនទៅសម្រាកនៅផ្ទះសំណាក់នៅកំពតវិញ៕
