ភ្នំពេញ៖ជនសង្ស័យម្នាក់ស្លៀកពាក់ស៊ីវិលអាវពណ៌ទឹកប៊ិចបន្លំជាគ្រូបង្រៀននៅសាលាបឋមសិក្សាត្រកៀតយកម៉ូតូ១គ្រឿងទៅបាត់ដោយសុវតិ្ថភាពកាលពីវេលាម៉ោង១២និង៤០នាទីថ្ងៃត្រង់ ថ្ងៃទី២៧ ខែឧសភា ឆ្នាំ២០១៤ នៅចំណុចមុខមជ្ឈមណ្ឌលប្រល័យពូជសាសន៏ជើងឯក
ស្ថិតក្នុងភូមិរលួស សង្កាត់ជើងឯក ខណ្ឌដង្កោរាជធានីភ្នំពេញ។
ស្ត្រីម្នាក់ឈ្មោះ នៅ សុខជា អាយុ៤៦ឆ្នាំ មានទីលំនៅភូមិបាគូ សង្កាត់ដង្កោ ខណ្ឌដង្កោបានរៀបរាប់ឲ្យដឹងថា មុនពេលកើតហេតុគឺរូបគាត់បានប្រើបុរសម្នាក់ឈ្មោះ ផៃ ជឿន អាយុ២៣ឆ្នាំឲ្យជួយជូនដឹកកូនរបស់គាត់ទៅដាក់សាលារៀន។ នៅពេលបុរសរូបនោះដឹកកូនគាត់ទៅដាក់ចូលសាលារៀន បុរសនោះក៏ជិះម៉ូតូចេញពីសាលាវិញក្នុងគោលបំណងទៅផ្ទះ នៅពេលចេញពីសាលាបានបន្តិច គាប់ជួនជនសង្ស័យ ដើរមកជួបនឹងបុរសជិះម៉ូតូនោះ ហើយជនសង្ស័យក៏លេងល្បិចបោកយកម៉ូតូទៅបាត់ដោយសុវតិ្ថភាព។
ដោយឡែកនាយរងនគរបាលប៉ុស្តិ៍រដ្ឋបាលជើងឯកលោក អ៊ឹម ភឹម បានបញ្ជាក់ឲ្យដឹងដែរថាជនរងគ្រោះមានឈ្មោះ ផៃ ជឿន ភេទប្រុស អាយុ២៣ឆ្នាំ មានស្រុកកំណើតនៅភូមិសាមគ្គី ឃុំអង្គបុរី ស្រុកអង្គបុរី ខេត្តតាកែវ។ បច្ចុប្បន្នស្នាក់នៅផ្ទះជួល(ផ្ទះស្ត្រីខាងលើ)ក្នុងភូមិបាគូ សង្កាត់ដង្កោ ខណ្ឌដង្កោរាជធានីភ្នំពេញ។ លោក អ៊ឹម ភឹម បន្តថា មុនពេលកើតហេតុស្ត្រីម្ចាស់ម៉ូតូ និងជាម្ចាស់ផ្ទះផងនោះគាត់បានប្រើបុរសរូបនេះឲ្យជួយជូនកូនរបស់គាត់ទៅសាលារៀនត្រកៀន ហេតុដូច្នេះបុរសរូបនេះក៏ព្រមជូនទៅ ហើយដាក់កូននោះចូលរៀនហើយក៏ជិះម៉ូតូចេញមកវិញឆ្ងាយពីមុខសាលាបានបន្តិចក៏ជនសង្ស័យនោះដើរពីត្បូងមកស្លៀកពាក់ស៊ីវិលពាក់អាវព៌ណទឹកប៊ិច ពេលនោះជនសង្ស័យក៏និយាយទៅកាន់បុរសជិះម៉ូតូថា បងខ្ញុំជាគ្រូបង្រៀននៅសាលានេះ តែឥឡូវខ្ញុំភ្លេចកូនសោរបន្ទប់ថ្នាក់រៀន ជួយជូនខ្ញុំទៅផ្ទះដើម្បីយកកូនសោរថ្នាក់រៀនបន្តិច។ លោកបន្តថា និយាយបានប៉ុណ្ណេះបុរសអង្គុយលើម៉ូតូក៏ព្រមជូនជនសង្ស័យទៅផ្ទះមួយស្ថិតនៅខាងកើតសាលាក្នុងភូមិរលួស សង្កាត់ជើងឯកដដែល។ លោកថា ស្រាប់តែជូនទៅផ្ទះថ្មមួយនៅម្តុំនោះដែលគេសសេរថា ផ្ទះជួល។ នៅពេលទៅដល់ផ្ទះនេះ ជនសង្ស័យក៏ចុះពីលើម៉ូតូហើយធ្វើនិយាយទូរស័ព្ទបំភ័ន្តបុរសរងគ្រោះ ថាចេះថាចោះ ហើយក៏និយាយមកកាន់បុរសរងគ្រោះវិញថា កូនសោរថ្នាក់រៀននៅជាមួយកូនខ្ញុំឲ្យខ្ញុំខ្ចីម៉ូតូទៅយកកូនមួយភ្លេត។ បុរសរងគ្រោះក៏ឲ្យជនសង្ស័យខ្ចីម៉ូតូក៏យកទៅបាត់តែម្តង។
នាយរងនគរបាលប៉ុស្តិ៍រដ្ឋបាលជើងឯកបន្តថាម៉ូតូដែលជនសង្ស័យយកទៅនោះមានម៉ាកហុងដាឌ្រីមស៊េរី០១៣ ពណ៌ខ្មៅ ពាក់ស្លាកលេខភ្នំពេញ 1BR-2270៕
