ភ្នំពេញ ៖ បុរសម្នាក់ជិះម៉ូតូបោះពួយលឿនដូចហោះជ្រុលទៅបុក និងរ៉ឺម៉កម៉ូតូកង់៣ធ្វើឲ្យក្រឡាប់ និងរងរបួសកាលពីវេលាម៉ោង ២និង៤០នាទីរំលងអាធ្រាត្រឈានចូលថ្ងៃទី២៩ខែឧសភាឆ្នាំ២០១៤ ត្រង់ចំណុចមុខពហុកីឡាដ្ឋានជាតិអូរឡាំពិក តាមបណ្ដោយផ្លូវព្រះមុនីរ៉េត ស្ថិតក្នុងសង្កាត់
វាលវង់ ខណ្ឌ៧មករា។
ប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុគេបានឃើញបុរសម្នាក់ជិះម៉ូតូមួយគ្រឿងម៉ាកហុងដា SL ពណ៌ទឹកប្រាក់ ពាក់ស្លាកលេខ ភ្នំពេញ 1AU-3005 ជិះដោយបុរសម្នាក់ធ្វើដំណើរតាមបណ្ដោយផ្លូវព្រះមុនីរ៉េត (លេខ២១៧) ទិសដៅពីត្បូងទៅជើងក្នុងល្បឿនលឿនខណៈមកដល់ចំណុចកើតហេតុមុខពហុកីឡាដ្ឋានជាតិអូរឡាំពិក ក៏បានជ្រុលទៅបុករ៉ឺម៉កម៉ូតូកង់៣មួយគ្រឿង ពាក់ស្លាកលេខ ភ្នំពេញ 1L-7855 បើកបរដោយបុរសម្នាក់ទិសដៅពីជើងទៅត្បូងច្រាស់ទិសគ្នា ធ្វើអោយរ៉ឺម៉កម៉ូតូកង់៣ក្រឡាប់ផ្ងារជើង បណ្ដាលឲ្យអ្នកបើកបរទាំង២នាក់រងរបួសបន្តិចបន្តួច។ បន្ទាប់ពីកើតហេតុសមត្ថកិច្ចមូលដ្ឋានក៏បានឲ្យភាគីទាំង២ធ្វើការសម្របសម្រួលបញ្ចប់រឿងនៅកន្លែងកើតហេតុដោយភាគីខាងម៉ូតូ SL ចេញថ្លៃខូចខាតដល់ម្ចាស់រ៉ឺម៉កកង់៣៕
