សេតវិមាន៖ លោកប្រធានាធិបតីអាមេរិកលោកបារ៉ាក់ អូបាម៉ា ប្រកាសកាលពីថ្ងៃទី២៧ ឧសភាថា លោកគ្រោងរក្សាទុកទាហានអាមេរិក៩.៨០០នាក់នៅអាហ្វហ្គានីស្ថាន( 9,800 American troops ) ក្រោយឆ្នាំ២០១៤ ហើយនឹងកាត់បន្ថយជាបន្តនៅឆ្នាំបន្ទាប់រហូតដល់អស់មុនឆ្នាំ
២០១៦។ នេះបើតាមវេបសាយចិនឆាយណាដេលីកាលពីថ្ងៃពុធនេះ។
បន្ទាប់ពីដំណើរទស្សនកិច្ចដ៏ភ្ញាក់ផ្អើលទាំងយប់នៅអាហ្វហ្គានីស្ថានពីថ្ងៃមុននេះ ពេលត្រឡប់ទៅកាន់ឯសេតវិមានវិញ លោកប្រធានាធិបតីអាមេរិកបារ៉ាក់ អូបាម៉ា ថ្លែងថា ចំនួនទាហានអាមេរិកនឹងត្រូវកាត់បន្ថយពាក់កណ្តាលមុនដំណាច់ឆ្នាំ ២០១៥ ហើយស្ថានទូតអាមេរិកប្រចាំក្រុងកាប៊ុលនៅដំណើរការធម្មតាមុន ដំណាច់ឆ្នាំ២០១៦ (normal embassy presence in Kabul by the end of 2016 )។
លោកអូបាម៉ា មានប្រសាសន៍ថា ក្រោយឆ្នាំ២០១៤ កងទ័ពអាមេរិកនៅអាហ្វហ្គានីស្ថាននឹងមានបេសកកម្មត្រឹមជួយបង្ហាត់ កងទ័ពអាហ្វហ្គានីស្ថាន និងជួយទ្រទ្រង់ដល់ប្រតិបត្តិការប្រឆាំងភេរវកម្ម និងពួកអាល់កៃដា ("two narrow missions": training Afghan forces) ។ លោកអូបាម៉ា យល់ថា នោះពុំមែនជាការទទួលខុសត្រូវដែលអាមេរិកត្រូវរ៉ាប់រងតែមួយនោះឡើយ។ កិច្ចព្រមព្រៀងទ្វេភាគីខាងសន្តិសុខមួយជាមួយអាហ្វហ្គានីស្ថាន ក៏ត្រូវធ្វើឡើងដែរ។
ទោះបីជាយ៉ាងណា លោកប្រធានាធិបតីអាហ្វហ្គានីស្ថានលោកហាមីត កាហ្សៃ ដែលចប់អាណត្តិនោះបានបដិសេធមិនចុះហត្ថលេខាលើកិច្ចព្រមព្រៀងមួយនេះទេ ។ ប៉ុន្តែលោកអូបាម៉ា ហាក់មានសុទិដ្ឋិនិយមចំពោះការចុះហត្ថលេខាលើកិច្ចព្រមព្រៀងនោះ ជាមួយប្រធានាធិបតីថ្មី បន្ទាប់ពីការបោះឆ្នោតជុំទី២ ព្រោះបេក្ខជនទាំង២រូបសុទ្ធតែអះអាងពីការចុះហត្ថលេខាដោយឆាប់រហ័សបើពួកគេជាប់ឆ្នោត ។
លោករដ្ឋមន្ត្រីការពារជាតិអាមេរិក លោក ឆក់ ហាហ្គែល (Defense Secretary Chuck Hagel) បាននិយាយថា គាត់គាំទ្រការសម្រេចចិត្តរបស់លោកអូបាម៉ា ដែលមានសភាពខ្លាំងក្លា ស្តីពីបញ្ហាកងទ័ពនៅអាហ្វហ្គានីស្ថាន ហើយថា ពួកអាល់កៃដា នឹងមិនអាចកើតឡើងវិញនោះទេ៕
