ដូណេតស្ក៍៖ មនុស្សយ៉ាងតិច៤០នាក់ ក្នុងនោះមានជនស៊ីវិល២នាក់បានត្រូវស្លាប់ក្នុងការប៉ះទង្គិចគ្នា រវាងពួកបំបែកខ្លួននិយមប្រដាប់អាវុធ និងកងទ័ពរដ្ឋាភិបាលអ៊ុយក្រែននៅទីក្រុងដូណេតស្ក៍ ភាគខាងកើតអ៊ុយក្រែនចាប់ពីថ្ងៃចន្ទ ដល់ថ្ងៃពុធនេះ ។ អ្នកស្លាប់ភាគច្រើនជាពួកឧទ្ទាម ។
យោងតាមអភិបាលក្រុងដូណេតស្ក៍ លោកអូឡេកសាន់ដ្រ៍ លូគីយ៉ាន់ឆេនកូ( Alexander Lukyanchenko) ថា ក្រៅពីអ្នកស្លាប់មនុស្សជាច្រើននាក់ទៀតក៏ត្រូវរបួសដែរក្នុងប្រតិបត្តិការនៅព្រលានយន្តហោះអន្តរជាតិនៃទីក្រុងមួយនេះ ។
តាមពិតទៅ ការប្រយុទ្ធគ្នាផ្ទុះឡើងតាំងពីថ្ងៃទី២៦ ឧសភា ពេលកងទ័ពអ៊ុយក្រែនធ្វើការវាយប្រហារតាមអាកាសប្រឆាំងពួកបំបែកខ្លួននិយម ដែលដណ្តើមត្រួតត្រាព្រលានយន្តហោះនេះ ។ មកដល់ព្រឹកថ្ងៃទី២៧ ឧសភា កងទ័ពបានវាយពួកបះបោរឱ្យដកថយចេញពីព្រលានយន្តហោះហើយដណ្តើមត្រួតត្រាទីនោះ។
លោករដ្ឋមន្ត្រីក្រសួងមហាផ្ទៃ លោកអាសែន អាវ៉ាកូវ បានប្រាប់អ្នកកាសែតថា ព្រលានយន្តហោះនោះត្រូវបានត្រួតត្រាវិញហើយ ("The airport is completely under control," Interior Minister Arsen Avakov told journalists)។ ឧទ្ធម្ភាគចក្រអ៊ុយក្រែន បានបាញ់កាំភ្លើងយន្តវាយប្រហារលើក្រុមសកម្មប្រយុទ្ធ ទៅលើអគារព្រលានយន្តហោះអន្តរជាតិដូណេតស្ក៍ (Donetsk's international airport )យ៉ាងខ្លាំងក្លាតាំងពីថ្ងៃទី២៦ ខែឧសភា ឆ្នាំ២០១៤ មកម្ល៉េះ (helicopter Mi-24 gunship) ។
ពួកបំបែកខ្លួននិយមនិយាយថា កងកម្លាំងរបស់ពួកគេបានបាញ់ធ្លាក់ឧទ្ធម្ភាគចក្រសរុប ៣គ្រឿង ខណៈក្រសួងការពារប្រទេសអ៊ុយក្រែនក៏បាននិយាយថា ឧទ្ធម្ភាគចក្រធុន MI-24 ចំនួន២គ្រឿងត្រូវបាញ់ធ្លាក់ ហើយឧទ្ធម្ភាគចក្រធុន MI-8 មួយគ្រឿងរងការខូចខាតដោយសារការបាញ់ប្រហារនាពេលនេះផងដែរ៕
