រាជធានីភ្នំពេញ៖ ក្រុមយុវជនកាយរឹទ្ធិ និងយុវជនកាកបាទក្រហមមកពីវិទ្យាល័យនានានៅរាជធានីភ្នំពេញចំនួន១៣សាលា បានមកជួបជុំគ្នាបោះជំរំយុវជននៅវិទ្យាល័យ ជាស៊ីម ជ្រោយចង្វារ យ៉ាងសប្បាយរីករាយ។
ក្រុមយុវជនកាយរឹទ្ធិ និងយុវជនកាកបាទក្រហមមកពីវិទ្យាល័យនានាប្រមាណ៤០០នាក់ បានមកប្រមូលផ្តុំគ្នានៅវិទ្យាល័យជាស៊ីមជ្រោយចង្វារ ដើម្បីបោះជំរំជាមួយគ្នា ស្វែងយល់ពីគ្នាទៅវិញទៅមក សាមគ្គីគ្នា ចេះធ្វើការងារជាក្រុម ចេះធ្វើម្ហូបអាហាររួមគ្នា និងរួបរួមគ្នាក្នុងការពិភាក្សាដោះស្រាយបញ្ហាអ្វីមួយជាមួយគ្នា។
យុវជនទាំងនេះមកពីវិទ្យាល័យជាស៊ីមជ្រោយចង្វារ វិទ្យាល័យសម្តេចហ៊ុនសែនភ្នំពេញថ្មី វិទ្យាល័យហ៊ុនសែនបូរី១០០ខ្នង ជាដើម។ យុវជនកាយរឹទ្ធិ១៦នាក់ មកពីវិទ្យាល័យហ៊ុនសែនបូរី១០០ខ្នង បានចូលរួមបោះជំរំលើកទី១នេះ បានសម្តែងអារម្មណ៍រីករាយ ហើយចាត់ទុកថានេះជាបទពិសោធថ្មីៗទៀតសម្រាប់ពួកគេ។ ទន្ទឹមនឹងនេះ ពួកគេបានមានបំណងចូលរួមបោះជំរំយុវជនជាមួយបណ្តាវិទ្យាល័យនានាខាងមុខទៀត។
សូមបញ្ជាក់ថា យុវជនកម្ពុជាកំពុងដើរតួនាទីយ៉ាងសកម្មនៅក្នុងសកម្មភាពសង្គម ទាំងសកម្មភាព ពាក់ព័ន្ធនឹងការអប់រំ បរិស្ថាន វប្បធម៌ និងទេសចរណ៍៕
