ខេង ឧត្តម
សៀមរាប៖ នាព្រឹកថ្ងៃអាទិត្យទី៤ ខែកញ្ញា ឆ្នាំ២០១៦នេះ ឯកឧត្តមបណ្ឌិត ឃឹម ប៊ុនសុង អភិបាលខេត្តសៀមរាប បានចុះទៅពិនិត្យ ស្ថានភាពស្រូវពង្រោះដែលជួបគ្រោះរាំងស្ងួតត្រូវស្វិត ស្រពោន នៅឃុំព្រៃជ្រូក ស្រុកពួក ខេត្តសៀមរាប កាលពី សប្តាហ៍មុន ក្រោយពីក្រុម
ការងារចាប់ផ្តើម អន្តរាគម ស្តារប្រឡាយចាស់ស្រោចស្រព្វ ព្រមទាំងដាក់ម៉ាស៊ីនបូមទឹក ចំនួន២គ្រឿង ដែលមានបំពង់បង្ហូរ០,៣ ម ដើម្បីទាញទឹក និងជួយសង្គ្រោះស្ថានភាពនេះ។
ឯកឧត្តម ឃឹម ប៊ុនសុង មានប្រសាសន៍ថា តាមការចុះពិនិត្យជាក់ស្តែងថ្ងៃនេះសង្គេតឃើញថា ស្រូវពង្រោះទាំងអស់នោះមានទឹកគ្រប់គ្រាន់ និងមានការលូតលាស់ខៀវខ្ចីល្អឡើងវិញហើយ។
ឯកឧត្តមបន្តថា យើងបានជួបមេឃុំ ហើយលោកមេឃុំ បានប្រាប់ ថាប្រជាពលរដ្ឋយើងបានជីក ស្រះ ដើម្បីទទួលទឹកដែលហូរទៅពីខាងលើ សម្រាប់ប្រើប្រាស់ ពេលដែលរាំងស្ងួតនៅរដូវប្រាំង ឯកឧត្តម បញ្ជាក់ថាយើងខិតខំធ្វើយ៉ាងណាឲ្យមានការ តភ្ជាប់ពីប្រឡាយមួយ ទៅប្រឡាយមួយទៀតឲ្យបាន ដើម្បីរក្សាទឹក នៅតាមប្រឡាយបាន សំរាប់ឲ្យប្រជាជន អាចធ្វើស្រែបានទាំងដូវប្រាំង និងរដូវវស្សា៕
