បន្ទាយមានជ័យ៖ លោក គោ ស៊ុំសារឿត អភិបាលខេត្តបន្ទាយមានជ័យ បានព្រមានដល់មេភូមិ មេឃុំដែលចេះតែលូកដៃក្នុងរឿងដីធ្លីដែលបំពានលើជំនាញសុរិយោដីដើម្បីទាញយកផលប្រយោជន៍។ការព្រមានដូច្នេះបានធ្វើឡើងនាព្រឹកថ្ងៃទី២៩ខែឧសភាឆ្នាំ២០១៤ក្នុងកម្មវិធីប្រជុំ
ផ្សព្វផ្សាយ ប្រកាសរួមស្តីពីការទប់ស្កាត់ការសាងសង់គ្មានលិខិតអនុញ្ញាតឬការសាងសង់ខុសពីលិខិតអនុញ្ញាតរវាងក្រសួងមហាផ្ទៃនិក្រសួងរៀបចំដែនដីនគរូបនីយកម្ម និងសំណង់ និងនីតិវិធីនៃការត្រួតពិនិត្យសំណុំឯកសារស្នើសុំ លិខិតអនុញ្ញាតសាងសង់នៅមន្ទីរសុរិយោដីខេត្តបន្ទាយមានជ័យ។
លោក គោ ស៊ុំសារឿត ថ្លែងបែបនេះបន្ទាប់ពីលោកមើលឃើញថាកន្លងលោកមេភូមិនិងលោកមេឃុំតែង យកតួនាទីខ្លួនឯងចូលជ្រៅទៅក្នុងការងារជំនាញដែលខ្លួនឯងគ្មានសិទ្ធិក្នុងការវាស់វែង និងផ្ទេរផ្ទូូកម្មសិទ្ទិពីម្ចាស់មួយទៅម្ចាស់មួយទៀតហើយទារយកលុយពីគេ ។ក្រៅពីព្រមានដល់មេភូមិ មេឃុំលោកក៏បានស្នើសុំផងដែរដល់មន្ត្រីជំនាញសុរិយោដីមិនត្រូវយកកម្រៃសេវាអោយហួសតម្លៃសេវាដែលរដ្ឋបានកំណត់។
យោងតាមរបាយការណ៍របស់លោក លី សារី ប្រធានមន្ទីររៀបចំដែនដីនគរូបនីយកម្មនិងសំណង់បាន អោយដឹងថាក្នុងកិច្ចប្រជុំផ្សព្វផ្សាយនេះមានសិក្ខាកាមជាមន្ត្រីជំនាញនិងអាជ្ញាធរស្រុក-ក្រុង និងអ្នកធ្វើអាជីវកម្មសាងសង់ ចូលរួមចំនួន១០០នាក់មកពីខេត្តចំនួន៦គឺខេត្តព្រះវិហារ កំពង់ធំ ឧត្តរមានជ័យ សៀមរាប ប៉ៃលិននិងខេត្តបន្ទាយមានជ័យ។លោកក៏បានលើកឡើងពីបញ្ហាប្រឈមចំពោះការខ្វះ ធនធានមនុស្ស ខ្វះសំភារះ ខ្វះកិច្ចសហប្រតិបត្តិការចូលរួមពីអ្នកពាក់ពន្ធ័ក្នុងការទប់ស្កាត់សំណង់មិនរៀបរយ សំណង់សាងសង់ខុសច្បាប់មិនអាចទប់ស្កាត់បានដែលតែងមានការអន្តរាគមពីអ្នកមានអំណាច។តែទោះជាមានបញ្ហាប្រឈមច្រើន មន្ទីរនៅតែបន្តជំរុញការងារអភិវឌ្ឍន៍វិស័យដីធ្លី សំណង់និងការរៀបចំដែនដី នគរូបនីយកម្ម អោយកាន់តែមានមូលដ្ឋានរឹមមាំងធ្វើអោយដីធ្លិ និងសំណប់ ប្រែក្លាយជាប្រភពធនធាន ពិតប្រាកដ សម្រាប់ ការអភិវឌ្ឍន៍ និងត្រូវបានប្រើប្រាសដោយតម្លាភាព និងប្រសិទ្ធភាព ។
លោក ភឿង សុភ័ណ្ឌ រដ្ឋលេខាធិការក្រសួងរៀនចំដែនដី នគរូបនីយកម្ម និងសំណង់សុរិយោដី បានមានប្រសាសន៍ថា បច្ចុប្បន្នសំណង់តូចធំកំពុងត្រូវបានរីកដុះដាលគ្រប់ទីកន្លែងទូទាំងប្រទេស ។ ដូចនេះមន្ត្រីជំនាញត្រូវធ្វើការត្រួតពិនិត្យនូវរាល់ឯកសារ លិខិតអនុញ្ញតសាងសង់ និងគុណភាព សុវត្ថិភាពសំណង់ ជាមួយនេះមន្ត្រី ជំនាញមិនត្រូវទាមទាឬប៉ះពាល់នូវប្រយោជន៍ផ្ទាល់ខ្លួនលើតំលៃ សេវ៉ាសាធារណះ ។ លោក ក៏បានប្រមានផងដែរសុំអោយបញ្ឈប់ជាបន្ទាន់ និងដកខ្លួនចេញអោយឆ្ងាយ ពីការពាក់ព័ន្ធក្នុងការទារលុយ ទារកាក់ដោយខុសច្បាប់ ។
ក្នុងនោះដែរ លោក. ភឿង សុភ័ណ្ឌក៏បានធ្វើការផ្តាំផ្ញើ ដល់សិក្ខាកាមដែលជាមន្ត្រីជំនាញត្រូវបន្ត អនុវត្តន៍ការងារ អោយមានតម្លាភាព គណនេយ្យភាពនិងទាន់ពេលវេលាក្នុងការបំរើសេវ៉ា សាធារណះ សំណង់ទាំងអស់ត្រូវរក្សារចនាបថជាខ្មែរព្រោះខេត្តទាំង៦ មានព្រំប្រទល់ជាប់ព្រំដែន កម្ពុជាថៃ មេភូមិមេឃុំ ត្រូវបញ្ឈប់នូវរាល់សកម្មភាពដែលប្រាសចាកនិងនីតិវិធី ពិសេសត្រូវសម្អាតខ្លួនអោយហើយ ៕