ខេត្តស្ទឹងត្រែង ព្រៃឈ្រើគ្រប់ប្រភេទ នៅគ្រប់តំបន់អភិរក្ស នៅក្នុងខេត្តស្ទឹងត្រែងកំពុងតែទទួលរងការបំផ្លិចបំផ្លាញពីសំណាក់ពួកឈ្មួញ ទុចរិតធ្វើជាអាជីវកម្ម ដែលមន្ត្រីជំនាញរដ្ឋបាលព្រៃឈើខេត្តនិងអាជ្ញាធរខេត្តមិនដាក់បទបញ្ជាឲ្យមន្ត្រីក្រោមឱវាទអនុវត្តបង្ក្រាប ដោយសារតែខ្លាចបាត់បង់ លាភសក្ការដ៏មហាសាល ពីបទល្មើសព្រៃឈើ ។
ជាក់ស្តែងសព្វថ្ងៃនេះគេសង្កេតឃើញ មានមេឈ្មួញធំៗចំនួន ២នាក់១-ឈ្មោះ ស្រេង ម៉េង ២-ឈ្មោះ វីដា ដែលគេអះអាងថាជាអ្នកប្រមូលទិញឈើ និងជាអ្នករតការស្ថាប័នពាក់ព័ន្ធនៅក្នុងខេត្ត ស្ទឹងត្រែង ជួសមុខឲ្យលោកឧកញ៉ា ទ្រីភាព ដែលមានឃ្លាំងស្តុបនៅក្នុងស្រុក សៀមបាង និងស្រុកឆែប ដែលដឹកជញ្ជូន យកមស្តុបទុកទាំងយប់ទាំងថ្ងៃ ដើម្បីដឹកបញ្ជូនបន្តឆ្ពោះទៅខេត្តកំពង់ចាម ។
សកម្មភាពដឹកជញ្ជូនទាំងយប់ទាំងថ្ងៃ តាមរយៈគោយន្តច្នៃ រថយន្តកូរ៉េ និងរថយន្តម៉ាកយីឌុប ដឹកជញ្ជូនយ៉ាងគគ្រឹកគគ្រេង ចល័តទូទាំងខេត្តស្ទឹងត្រែង ឆ្លងកាត់គ្រប់ស្នាក់ការ ស្ថាប័ណពាក់ព័ន្ធនៅក្នុងខេត្តទាំងមូល យ៉ាងរំភើយ ដោយគ្មានអ្នកយកចិត្តទុកដាក់ ។
បើតាមសំដីមេការដែលទទួលការមើលការខុសត្រូវ គំនរឈើ និងការធ្វើចរាចរឈើ មិនបញ្ចេញឈ្មោះបានឲ្យដឹងតាមទូរស័ព្ទថា ពាក់ព័ន្ធនឹងអាជីវកម្ម បទល្មើសព្រៃឈើនៅក្នុងខេត្តស្ទឹងត្រែង ខាងក្រុមហ៊ុនបានរៀបកញ្ចប់ថវិកាខ្មៅ គ្រប់ស្ថាប័នពាក់ព័ន្ធអស់ទៅហើយគឺចាប់ពីថ្នាក់ក្រសួងរហូតដល់ថ្នាក់មូលដ្ឋានទោះជាអ្នកចង់ធ្វើអីក៏ធ្វើទៅគ្មានអ្នកណាហ៊ានលូកដៃបង្ក្រាបនោះទេ ព្រោះអ្នកបង្ក្រាបបទល្មើសស្រុកខ្មែរ សុទ្ធតែទទួល ប្រាក់កញ្ចប់ថវិកាខ្មៅរបស់គេទាំងអស់កុំថាឡើយមេព្រៃស្រុកខេត្តសូមបីតែរដ្ឋមន្ត្រីទទួលបន្ទុកក៏មិនហានចាប់ផង ។
បើមិនដូច្នោះទេខាងក្រុមហ៊ុនគេនមិនអាចធ្វើសកម្មភាព កាត់អារដឹកជញ្ជូនទាំងួប់ទាំងថ្ងៃ យ៉ាងអាណាធិបតេយ្យបែបនេះបានទេ ។ ឈើប្រណិតគ្រប់ប្រភេទនៅក្នុងតំបន់អភិរក្សនៅក្នុងខេត្តស្ទឹងត្រែងទាំងមូលកំពុងតែទទួលការបំផ្លិចបំផ្លាញដោយគ្មានអ្នកទទួលខុសត្រូវបើពិនិត្យជាក់ស្តែងមើលទៅមន្ត្រីជំនាញរដ្ឋបាលព្រៃឈើដែលមានស្នាក់ការនៅតាមដងផ្លូវ
នីមួយៗឃើញតែអង្គុយរាប់ក្បលរថយន្តដឹកឈើ។ហេតុនេះហើយសូមឲ្យឯកឧត្តមគណប្រតិភូរដ្ឋាភិបាលទទួលបន្ទុក និងរដ្ឋមន្ត្រីក្រសួងកសិកម្ម សូមជួយទទួលខុសត្រូវ ពាក់ព័ន្ធ និងការបាត់បង់ព្រៃឈើខាងលើផងសូមឲ្យដាក់បទបញ្ជាទៅដល់មន្ត្រីក្រោមឱវាទអនុវត្តតាមបទបញ្ជានិងគោរពតាមកាតព្វកិច្ចតួនាទីរបស់ខ្លួនផង ។ ប៉ែន នួន ស្ទឹងត្រែង 
