កំពង់ចាម៖រថយន្តហាយលែនឌឺមួយគ្រឿងកំពុងធ្វើចរាចរនៅពេលយប់ស្រាប់តែរេចង្កូតទៅបុកដើមអាកាស្យាបណ្តាលអោយអ្នកបើកបររថយន្តស្លាប់ភ្លាមៗបង្ករអោយមានភាពភ្ញាក់ផ្អើលនៅវេលាម៉ោង21និង10នាទីយប់ថ្ងៃទី10កញ្ញា2016នៅលើកំណាត់ផ្លូវជាតិលេខ7ស្ថិតក្នុងភូមិស្លែងឃុំជ្រៃវៀនស្រុកព្រៃឈរខេត្តកំពង់ចាម ។ ប្រភពពត៌មានពីកន្លងកើតហេតុបានអោយដឹងថានៅមុនពេលកើតហេតុគេឃើញរថយន្តហាយលែនឌឺពណ៌សពាក់ស្លាកលេខភ្នំពេញ2AH3579បើកបរដោយឈ្មោះ ឯមវណ្ណរិទ្ធ ភេទប្រុសអាយុ48ឆ្នាំ
មានទីលំនៅភូមិ-សង្កាត់ផ្សាដេប៉ូ3ខ័ណ្ឌទួលគោក រាជធានីភ្នំពេញបើកបរក្នុងទិសដៅពីលិចទៅកើត ។
ប្រភពដដែលបានបន្តថាពេលមកដល់កន្លែងកើតហេតុរថយន្តខាងលើបានរេចង្កូតមកខាងឆ្វេងដៃដោយមិនដឹងមូលហេតុទៅបុកដើមអាកាស្យាហើយក៏ជាប់គាំងនៅទីនោះទៅមុខលែងរួច ។ លោក កែវ ស៊ាងហ័ន អធិការនគរបាលស្រុកព្រៃឈរបានអោយដឹងថាគ្រោះថ្នាក់ចរាចរនេះបានបណ្តាលអោយអ្នកបើកបររថយន្តឈ្មោះ ឯមវណ្ណរិទ្ធ ស្លាប់នៅកន្លែងកើតហេតុ ។
លោកអធិការបានបញ្ជាក់ថាសពជនរងគ្រោះបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី ។ចំណែករថយន្តខូចខាតធ្ងន់ធ្ងរត្រូវបានយកមករក្សាទុកនៅនៅអធិការដ្ឋានដើម្បីបំពេញសំណុំឯកសារនិងប្រគល់ជូនក្រុមគ្រួសាររបស់សព ។
