ខេត្តពោធិសាត់ ព្រៃឈើកេរ្តិ៍ដូនតាខ្មែរ ដែលខិតខំការពាររាប់រយជំនាន់ ដែលមានតម្លៃមិនអាចកាត់ថ្លៃបានដែលមានតំបន់អភិរក្សជាច្រើនកន្លែង ដែលមានអង្គការបរទេសចំណាយលុយរាប់រយលានដុល្លា ជួយអភិរក្ស ថែរក្សា និងការពារ មកដល់សព្វថ្ងៃ សេដ្ឋីស្រុកខ្មែរដែលចាយលុយមិនអស់ ដាក់ទុន់បំផ្លិចបំផ្លាញ ព្រៃឈើ ធ្វើអាជីវកម្ម ដែលមានការកាត់អារ ដឹកជញ្ជូន គគ្រឹងគគ្រេងទាំងយប់ទាំងថ្ងៃឆ្លងកាត់ស្នាក់ការសង្កាត់ ផ្នែក រដ្ឋបាលព្រៃឈើ និងឆ្លងកាត់ស្នាក់ការអង្គការអភិរក្ស និងស្នាក់ការបរិស្ថាន ដោយមន្ត្រីជំនាញទាំងនោះ បានត្រឹមតែរាប់ក្បាលឡានយកលុយតែប៉ុណ្ណោះ ករណីទប់ស្កាត់ និងបង្ក្រាបបទល្មើសព្រៃឈើ ស្រុកវាលវែង ស្មើនឹង សូន្យ ។
សព្វថ្ងៃនេះ គេសង្កេតឃើញមាន ឃ្លាំងស្តុបឈើធំៗជាច្រើនកន្លែង នៅក្នុងស្រុកវាលវែង ដូចជានៅចំណុច ភូមិចិនយំ ឃុំប្រម៉ោយ និងភូមិទួលគ្រួស ឃុំប្រម៉ោយ ហើយឃ្លាំងដែលលោកសេដ្ឋីដែលគេហៅថា ឧកញ៉ា ស្តុបធំ ជាងគេ គឺនៅជិតស្នាក់ការផ្នែករដ្ឋបាលព្រៃឈើ ដែលដឹកជញ្ជូនចូល និងចេញ ក្នុងមួយថ្ងៃ យ៉ាងតិចក៏ពី១០ ទៅ២០រថយន្តម៉ាកយីឌុប ។
ក្រុមការងារយើងបានធ្វើការទំនាក់តំនងតាមទូរស័ព្ទ នៅព្រឹកថ្ងៃទី ៣០ ខែ ឧសភា ឆ្នាំ ២០១៤ ទៅឯកឧត្តមម៉ៅ ធានិន្ទ អភិបាល នៃគណអភិបាលខេត្តពោធិសាត់ លោកបានមានប្រសាសន៍ថា បើមានសកម្មភាពកើតមានបទល្មើសព្រៃឈើ ដូចពាក្យដែលបានរាយការណ៍នៅស្រុកវាលវែងបើមានវត្ថុតាងជាក់ស្តែងលោកនឹងចុះទៅអនុវត្តបង្ក្រាប ។
ជុំវិញករណីខាងលើនេះដែរ ក្រុមការងារយើង បានធើ្វការទំនាក់ទំនងទៅលោក នាយរងផ្នែករដ្ឋបាលព្រៃឈើស្រុកវាលវែងលោកបាននិយាយថា បើរឿងបង្ក្រាបលោកចូលចិត្តណាស់បើចង់បង្ក្រាបគឺចុះទៅធ្វើទាំងអស់គ្នាហើយជួយចេញថ្លៃសេវាដឹកជញ្ជូនឈើផងព្រោះលោកគ្មានកញ្ចប់ថវិកាសម្រាប់ដឹកជញ្ជូនឈើទេ។
ដោយសារតែមន្ត្រីជំនាញរដ្ឋបាលព្រៃឈើសង្កាត់និងផ្នែកគ្មានកញ្ចប់ថវិកាសម្រាប់បង្ក្រាបនិងដឹកជញ្ជូនឈើទើបនាំគ្នាអង្គុយមើលរថយន្តដឹកជញ្ជូនឈើចាំតែរាប់ក្បាលគិតបញ្ជីមិនខ្វលរឿទប់ស្កាត់បង្ក្រាប នាំតែបាត់បង់លាភសការៈអត់ប្រយោជន៍ ។ ប៉ែន នួន ពោធិ៍សាត់
