សៀមរាប៖ អ្នកភូមិប្រុសស្រីក្មេងចាស់៧នាក់ស្លាប់នៅក្នុងអណ្ដូងនិងម្នាក់ទៀតកំពុតែជួយសង្គ្រោះបន្ទាន់ដោយសារចុះរកលុយចំនួន៣ពាន់រៀលនៅក្នុងអណ្តូងមួយនៅខាងក្រោយផ្ទះ។សោកនាដ្ឋកម្មនេះកើតឡើងកាលពីវេលាម៉ោង៥ល្ងាចថ្ងៃទី៣១ខែឧសភាឆ្នាំ២០១៤ស្ថិតនៅក្នុងភូមិសាលាក្រវ៉ាន់ឃុំរំចេកស្រុកបន្ទាយស្រីខេត្តសៀមរាប។
ឪពុកជនរងគ្រោះឈ្មោះ ទុយ ចិន អាយុ៥២ឆ្នាំបាននិយាយថាមុនដំបូងគាត់បានទៅដងទឹកដើម្បីយកមកចាក់ពន្លត់ឡធ្យូងនៅពេលព្រឹកស្រាប់តែធ្លាក់ដែកគេះ១និងលុយ៣ពាន់រៀលរួចខ្ញុំក៏ដើរទៅយកបង្អោងមកដាក់ដើម្បីចុះទៅរាវរកស្រាប់តែឃើញតែដែកគេះតែមិនឃើញលុយគាត់ក៏ឡើងមកវិញទុកបង្អោងនៅក្នុងអណ្តូងនោះ។បន្ទាប់មកកូនស្រីរបស់គាត់សួរថាពុកឯងយកបង្អោងទៅដាក់ធ្វើអី?គាត់ក៏ឆ្លើយថាដាក់យកដែកគេះនឹងលុយដែលធ្លាក់ចូលទៅក្នុងអណ្តូងនោះរួចគាត់ក៏ដើរទៅបាត់ទៅ។
ឪពុកជនរងគ្រោះបន្ថែមថានៅពេលល្ងាចដដែលកូនប្រុសរបស់ខ្ញុំមកពីឃ្វាលគោវិញក៏សួរបងស្រីរបស់វាថាតើពីណាយកបង្អោងទៅដាក់ក្នុងអណ្តូងធ្វើអីពេលនោះកូនស្រីខ្ញុំក៏ឆ្លើយថាពុកយកដាក់ចុះរកលុយនិងដែកគេះតែឃើញដែកគេះអត់ឃើញលុយស្រាប់តែប្អូនប្រុសចងគោរួចក៏ដើរសំដៅទៅអណ្តូងនោះហើយចុះទៅរកលុយចំនួន៣ពាន់រៀលតែមិនឃើញឡើងមកវិញបងស្រីវាក៏ចុះទៅជួយស្រាប់តែបាត់បន្តៗរហូតដល់ទៅ៧នាក់ក្នុងនោះមានកូនប្រុសស្រីរបស់គាត់៣នាក់និងអ្នកជិតខាង៤នាក់ព្រមទាំងអ្នកមកពីចំងាយម្នាក់ទៀតតែចុងក្រោយចុះបាន ពាក់កណ្តាលក៏ស្រែកឱ្យគេជួយទាន់ ហើយអ្នកទី៨ពេលនេះកំពុងសង្គ្រោះនៅមន្ទីពេទ្យបង្អែកខេត្តសៀមរាប។
លោកអនុសេនីយឯក ឡុង សំណាង អធិការងទទួលបន្ទុកព្រហ្មទណ្ឌស្រុកបន្ទាយស្រីបានបញ្ជាក់ថាក្រោយពីទទួលបានព័ត៌មានភ្លាមលោកអធិការបានបញ្ជាឱ្យរូបលោកចុះមកពិនិត្យភ្លាមៗតែម្តងរួចក៏ឃើញបងប្អូនប្រជាពលរដ្ឋបាននាំគ្នាចុះលើកយកសាកសពដែលសា្លប់ចំនួន៧នាក់ស្រី២នាក់នឹងម្នាក់ទៀតជាប្រុសដែលបានចុះជួយដល់ពាក់កណ្តាលពេលនេះ កំពុងយកទៅសង្គ្រោះនៅមន្ទីរពេទ្យ។
មន្ត្រីនគរបាលបន្ថែមថាអ្នកស្លាប់ដោយសារចុះអណ្តូងលូនេះមានទី១/ឈ្មោះ ចែ អូន ភេទប្រុសអាយុ១១ឆ្នាំ និងទី២/ចែ ជា ហៅ អាពា ភេទស្រីអាយុ១៣ឆ្នាំ,ទី៣/ / ចែ រតនាភេទស្រី អាយុ១៥ឆ្នាំជាកូនម្ចាស់ដីឡូដែលមានអណ្តូងនិងទី៤/ហាយចាន់ឌី ភេទប្រុសអាយុ១២ឆ្នាំនិងទី៥/ ហាយចិន្តា ភេទប្រុសអាយុ២២ឆ្នាំ និងទី៦/ ឆែម ឃី ភេទប្រុសអាយុ១៧ឆ្នាំនិងទី៧/ ពៀត ពួនភេទប្រុសអាយុ៣២ឆ្នាំ ។
ចំណែកម្នាក់ទៀតដែលបានជួយមកពីភូមិផ្សេងឈ្មោះ តយ តៀម ភេទប្រុស អាយុ២៧ឆ្នាំរស់នៅភូមិស្រែចង្ហូត ឃុំរុនតាឯក ស្រុកបន្ទាយស្រីត្រូវបានបងប្អូនដែលមកមើលជួយសង្គ្រោះទាន់ពេលវេលាដែលទើបចុះបានពាក់កណ្តាលប៉ុណ្ណោះ។ មន្ត្រីនគរបាលបញ្ជាក់បន្ថែមថាក្រោយពីលើកសាកសពចេញពីអណ្តូងលូនោះរួចមកឪពុកម្តាយទាំងសង់ខាងបានយកកូនទៅផ្ទះរៀងៗខ្លួនដើម្បីធ្វើបុណ្យតាមប្រពៃណី។
សូមបញ្ជាក់ថានៅព្រឹកថ្ងៃទី១ខែមិថុនាឆ្នាំ២០១៤ព្រឹកម៉ិញនេះលោកប៊ុនថាឬរិទ្ធិអភិបាលរងខេត្តបាននាំយកអំណោយកាកបាទក្រហមមកចែកជូនដល់ក្រុមគ្រួសារនៃសពក្នុងមួយគ្រួសារទទួលបានអង្ករ១០០គីឡូក្រាម,មី២កេះនិងសម្ភារៈមួយចំនួនទៀតក្នុងនោះលោកអភិបាលរងខេត្តបានប្រគល់ថវិការក្នុងមួយនាក់ចំនួន៨០ម៉ឺនរៀលផងដែរ។ចំណែកអ្នករងរបួសធ្ងន់ដែលត្រូវបានសង្គ្រោះកំពុងសម្រាកនៅមន្ទីរពេទ្យបង្អែកនោះក៏លោកអភិបាលរងខេត្តបានប្រគល់ឱ្យនៅអង្ករចំនួន៥០គីឡូក្រាមផងដែរ។
