ដោយ:ឃិន គន្ធា
បន្ទាយមានជ័យ៖ ជនសង្ស័យចំនួន២នាក់និងគ្រឿងញៀន១កញ្ចប់តូចត្រូវបានកម្លាំងអាវុធហត្ថក្រុងប៉ោយប៉ែត ដឹកនាំដោយលោកវរៈសេនីយ៍ត្រី ជា ដា មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែត បានធ្វើការចុះបង្ក្រាបឃាត់ខ្លួនជនសង្ស័យបានចំនួន២នាក់និងដកហូត
វត្ថុតាងប្រភេទម៉ាទឹកកកចំនួន១ថង់ស ថ្លា នៅវេលាម៉ោង១២ថ្ងៃត្រង់ ថ្ងៃទី១៦ ខែតុលា ឆ្នាំ២០១៦ ស្ថិតនៅចំណុចលើផ្លូវលំម្តុំខាងកើតផ្ទះសំណាក់ គង់ ហាប់ ស្ថិតក្នុងភូមិបាលិលេយ្យ២ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។ ក្រោយពីឃាត់ខ្លួនហើយ ជនសង្ស័យទាំង២នាក់ត្រូវបានបញ្ជូនមកបញ្ជាការដ្ឋានកងរាជអាវុធហត្ថខេត្តដើម្បីធ្វើការសាកសួរ។ លោកវរៈសេនីយ៍ឯក ស ប៊ុនសឿង មេបញ្ជាការរងកងរាជអាវុធហត្ថខេត្តបន្ទាយមានជ័យ ទទួលលើការងារបទល្មើសគ្រឿងញៀន បានប្រាប់អោយដឹងថា ជនសង្ស័យ១/ឈ្មោះផល សុប៊ុណ្ណាលី ភេទប្រុស អាយុ៤០ឆ្នាំ ២/ឈ្មោះដូង ឈុនលេង ភេទប្រុស អាយុ២៦ឆ្នាំ អ្នកទាំង២រស់នៅ ក្នុងភូមិបាលិលេយ្យ២ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។ លោកវរ:សេនីយ៍ឯក ស ប៊ុនសឿង បានបញ្ជាក់ទៀតថា ការឃាត់ខ្លួនជនសង្ស័យទាំង២នាក់នេះបានដោយសារតែបានទទួលព័ត៌មានពីប្រជាពលរដ្ឋនៅក្បែរនោះ។ នៅមុខអាវុធហត្ថខេត្ត ជនសង្ស័យទាំង២នាក់បានឆ្លើយសារភាពថា ពួកគេពិតជាបានជួញដូរគ្រឿងញៀននេះពិតប្រាកដមែន។ លោកវរ:សេនីយ៍ឯក ស ប៊ុនសឿង បានបញ្ជាក់ទៀតថា ក្រោយពីបានចម្លើយសារភាពរបស់ជនសង្ស័យទាំង២រួចមក កម្លាំងអាវុធហត្ថជំនាញបានកសាងសំណុំរឿងបញ្ជូនទៅតុលាការ ដើម្បីដាក់ទោសទៅតាមផ្លូវច្បាប់៕
