កំពង់ធំៈ កាលពីថ្មីកន្លងមកនេះ សមត្ថកិច្ចមេព្រៃបានឃាត់គ្រឿងចក្រត្រាក់ទ័រ ចំនួន២គ្រឿង របស់លោក ហួត ឈាង មេឃុំស្រើង ដែលបាននាំយកគ្រឿងចក្រមកឈូសឆាយដីព្រៃរបស់រដ្ឋ និងពុំមានច្បាប់អនុញ្ញាតិ ក្រោមការបញ្ជារបស់ លោក អ៊ុត សុធា ព្រះរាជអាជ្ញាអមសាលាដំបូង ខេត្តកំពង់ធំ ហើយបាននាំយកគ្រឿងចក្រទាំង២គ្រឿង មករក្សាទុកនៅផ្នែករដ្ឋបាលព្រៃឈើសណ្តាន់ ដើម្បីកសាងសំណុំរឿងដាក់ចូលទៅតុលាការ។
ក្រោយពីសមត្ថកិច្ចធ្វើការឃាត់គ្រឿងចក្រ លោក ហួត ឈាង មេឃុំស្រើង ស្រុកប្រាសាទសំបូរ ខេត្តកំពង់ធំ បានអាងវ៉ាងមិនអោយសមត្ថកិច្ចនាំគ្រឿងចក្រទៅរក្សាទុកនោះទេ តែដោយសារសមត្ថកិច្ចបានពិនិត្យគ្រប់ ជ្រុងជ្រោយមិនប្រទះឃើញមាន ច្បាប់អនុញ្ញាតិអ្វីបន្តិចឡើយ ទើបសមត្ថកិច្ចប៉ូលិស និងមេព្រៃសម្រេចចិត្ត ដកហូតគ្រឿងចក្រយកទៅរក្សាទុក តាមបទបញ្ជារបស់ព្រះរាជអាជ្ញា ដោយបានអនុវត្តតាមច្បាប់។
យោងតាមកម្មករ និងតៃកុងគ្រឿងចក្របានអោយដឹងថា ម្ចាស់ដីបានឲ្យខ្លួនឈូសចំនួនដី ១៨ហិចតា តែម្ចាស់គ្រឿងចក្រតែត្រូវជាកូនបង្កើតលោកមេឃុំ បានប្រាប់ឲ្យដឹងថា ដីមានត្រឹមតែ១០ហិចតា ចំណែកលោកហួត ឈាង មេឃុំស្រើងបានប្រាប់ថាដីមាន៥ហិចតា លោកបានឆ្លើយវិលទៅវិលមក ម្តងលោកបាននិយាយថាឈូសឆាយដីនេះគឺស៊ីឈ្នួលគេទេមិនដីលោកទេ ដើម្បីយកលុយជួយដល់ប្រជាពលរដ្ឋ ក្រីក្រដែលគ្មានលទ្ធភាពថតរូប ចុះឈ្មោះបោះឆ្នោត ដល់ឆ្លើយម្តងទៀតលោកថា ដីនេះលោកទិញពីប្រជាពលរដ្ឋ ដល់លើក ទៅ៣លោកនិយាយថា ដីនេះគេចែកអោយ ការឆ្លើយប្រទាក់ក្រឡាបែបនេះ បានធ្វើឲ្យមានការសង្ស័យថា លោក ហួត ឈាង ប្រុងធ្វើនំអត់ម្សៅដោយអាងតែមេឃុំ ដើរចាប់ដីព្រៃរបស់រដ្ឋយកតាមអំពើចិត្តដែលមាន ទីតាំងស្ថិតនៅ ចំនុចអូធ្នូរ ឃុំ ស្រើង ស្រុកប្រាសាទសំបូរ ខេត្តកំពង់ធំ។
មហាជនបានកោតសរសើរ ចំពោះចំណាត់ការរបស់ លោក ព្រះរាជអាជ្ញា ដែលបានធ្វើតាមនិតិវិធីច្បាប់ មិនថាមេឃុំ ឬថ្នាក់ណាដែលបានប្រព្រឹត្តខុសនិងច្បាប់ ដោយសារកន្លងមកពុំដែលឃើញមាន សមត្ថកិច្ចណា ហ៊ានចាត់វិធានការចំពោះមន្រ្តីអនុវត្តច្បាប់នោះទេ ធ្វើឲ្យបាត់បង់ជំនឿដោយសារតែការឃុបឃិត ប្រព្រឹត្ត អំពើពុករលួយ តែទោះជាយ៉ាងណានោះ លោកមេឃុំបានផ្តាំផ្ញើរមកអ្នកសារព័ត៌មានថា ចាំមើលលោករត់ការសុំច្បាប់បាន លោកនឹងឲ្យផ្សាយសារឡើងវិញ ក្រោយពីគ្រឿងចក្រត្រូវបានចាប់រួចទៅហើយ ទើបមក រត់ការច្បាប់តាមក្រោយ តែទោះជាយ៉ាងណានោះ លោក អ៊ិត សុធា បានបញ្ជាក់ថានិងចាត់វិធានការតាមច្បាប់។
ដោយ ប៊ុន រដ្ឋា
