ភ្នំពេញ ៖ បុរសម្នាក់ដែលគេស្គាល់ថា ជាមន្ត្រីយោធាស្រវឹងស្រាជោបានបើករថយន្តកាមរីបាឡែនមួយគ្រឿងលឿនដូចហោះឡើងទៅលើស្ពានអាកាស៧មករាក៏បានជ្រុលចង្កូតទៅបុករនាំងដែកពុះចែកទ្រូងផ្លូវបាក់អស់ចំនួន១៥ផ្ទាំងហើយរថយន្តមិនទាន់អស់ល្បឿនក៏បានទៅបុកបង្កាន់ដៃស្ពានគាបជាប់រថយន្តទៅមុខលែងរួច សំណាងល្អអ្នកបើកបរមិនរងគ្រោះថ្នាក់ ។ ហេតុការណ៍នេះកើតឡើងកាលពីវេលាម៉ោង ១១និង៤០នាទីយប់ថ្ងៃទី២ ខែមិថុនា ឆ្នាំ២០១៤ នៅចំណុចលើស្ពានអាកាស៧មករា ស្ថិតនៅក្នុងសង្កាត់ទឹកល្អក់ទី១ ខណ្ឌទួលគោក ។
ប្រភពព័ត៌មានពីកន្លែងកើតហេតុបានឱ្យដឹងថានៅមុនពេលកើតហេតុគេបានឃើញរថយន្តកាមរីបាឡែន ពណ៌ប្រផេះក្រម៉ៅ មួយគ្រឿង ពាក់ស្លាកលេខ ភ្នំពេញ 2R-8815 បើកបរដោយបុរសម្នាក់ជាមន្ត្រីយោធាក្នុងល្បឿនយ៉ាងលឿនក្នុងស្ថានភាពស្រវឹងជោកជាំ តាមបណ្ដោយមហាវិថីសហព័ន្ធរុស្ស៊ី ក្នុងទិសដៅពីកើតទៅលិច មកដល់ចំណុចគល់ស្ពានអាកាស៧មករា
រថយន្តបានបន្ថែមល្បឿនលឿនដូចហោះដើម្បីឡើងទៅលើស្ពានអាកាស៧មករា ស្រាប់តែមកដល់លើស្ពានរថយន្តបានជ្រុលចង្កូតទៅខាងឆ្វេងធ្វើឱ្យបុករះរនាំងដែកពុះចែកទ្រូងផ្លូវបាក់អស់១៥ផ្ទាំង ហើយរថយន្តមិនទាន់អស់ល្បឿនក៏ជ្រុលទៅបុកបង្កាន់ដៃស្ពានគាបជាប់រថយន្តទៅមុខលែងរួចប៉ុន្តែសំណាងល្អអ្នកបើកបរមិនមានរងរបួស។ បន្ទាប់ពីកើតហេតុ
សមត្ថកិច្ចមូលដ្ឋានបានចុះមកអន្តរាគមន៍ធ្វើការត្រួតពិនិត្យនិងឃាត់អ្នកបើកបររថយន្ត ប៉ុន្តែអ្វីដែលជាការកត់សំគាត់គឺអ្នកបើកបរថយន្តបានចំរូងចំរាស់ជាមួយសមត្ថកិច្ចមូលដ្ឋាន ទើបសមត្ថកិច្ចមូលដ្ឋានទំនាក់ទំនងទៅសមត្ថកិច្ចជំនាញមកធ្វើការវាស់វែងនិងឃាត់អ្នកបើកបររួមទាំងរថយន្តទៅការិយាល័យចរាចរជើងគោកដើម្បីធ្វើការដោះស្រាយតាមផ្លូវច្បាប់៕ 
