កំពង់ធំ រថយន្តចែណាប់ ដែលសមត្ថកិច្ចរដ្ឋបាលព្រៃឈើ និងបរិស្ថានឃាត់ទុក កាលពីថ្ងៃទី១២ ខែ វិច្ឆិកា ឆ្នាំ ២០១៦ វេលាម៉ោង ២រសៀល នៅចំនុច អូរល្អក់ ឃុំមានរិទ្ធិ ស្រុកសណ្ដាន់ ខេត្តកំពង់ធំ កន្លងមកនេះ ត្រូវបានដោះលែងវិញហើយ ក្រោយពីសមត្ថកិច្ចជំនាញ បានពិនិត្យឯកសារ និងយោងតាមចំណារបស់អភិបាល ខេត្តកំពង់ធំ សុំឲ្យអាជ្ញាធរមានសមត្ថកិច្ច ជួយសម្រួលការដឹកឈើលេខ២ សម្រាប់ធ្វើលំនៅដ្ឋាននៅភូមិថ្នល់ជាតិ ឃុំបារាយណ៍ ស្រុកបារាយណ៍ ខេត្តកំពង់ធំ ។
លោក សិត សុង បានអះអាងជាពលរដ្ឋក្រីក្ររ លោកជាម្ចាស់សុំច្បាប់អនុញ្ញាតិ ពីឯកឧត្តម អភិបាលខេត្តកំពង់ធំ ដើម្បីឲ្យ ជួយសម្រួលដល់ការដឹកជញ្ជូនឈើលេខ២ ដើម្បីយកមកសាងសង់លំនៅដ្ឋាន ដោយសារតែផ្ទះរបស់លោក មានសភាពចាស់ទ្រុឌទ្រម ពុកផុយអាចនិងមានភាពអន្តរាយ៍នៅពេលថ្ងៃណាមួយ ទើបបានសម្រេចចិត្តសុំ ការសណ្តោសប្រណីពីអភិបាលខេត្តកំពង់ធំ ឲ្យជួយសម្រួលដល់ការដឹកជញ្ជូនឈើ ចំនួន១រថយន្ត ចំនួន២០ ម៉ែត្រគូប ចេញពី អូរល្អក់ ឃុំមានរិទ្ធិ ស្រុកសណ្ដាន់ ឆ្ពោះទៅស្រុកបារាយណ៍ ខេត្តកំពង់ធំ ទើបបានសុំឲ្យ រថយន្តរបស់ចែណាប់ ធ្វើជាមធ្យោបាយដឹកជញ្ជូន។
ចែណាប់ បានឲ្យដឹងថា ការដឹកជញ្ជូននេះយោងតាមលិខិតអនុគ្រោះរបស់ខេត្តជួយប្រជាជនក្រីក្រដើម្បីយកសាងសង់លំនៅដ្ឋានក្នុងខេត្តហើយការដឹកជញ្ជូននេះគឺមានការផ្តល់ដំណឹង ដល់អាជ្ញាធរ និងសមត្ថកិច្ចគ្រប់ជាន់ថ្នាក់ ដើម្បីឲ្យជួយសម្រួល ក្នុងការងារមនុស្សធម៌នេះ ប៉ុន្តែការដឹកជញ្ជូននេះ គឺត្រូវបានអនុវត្តតាមច្បាប់ផ្ទុកចំនួនឈើតាមការកំណត់ ដែលបានអនុញ្ញាតិឲ្យធ្វើការដឹកជញ្ជូន ដោយពុំមានការដឹកលើសចំនួនដូចការចោទប្រកាន់ ដែលវាជាការផ្ទុយស្រឡះពីអ្នកសារព័ត៌មាន មួយចំនួនតូច បានចុះផ្សាយខុសពីការពិត និងពុំបានសួរនាំឲ្យបានច្បាស់ ព្រមទាំងបានធ្វើឲ្យអាប់អោនកិត្តិយស់និងសេចក្តីថ្លៃថ្នូរ របស់គ្រួសារនាងខ្ញុំ និងសុំឲ្យមានការពិចារណា សួរនាំឲ្យបានច្បាស់លាស់ ។
សូមបញ្ជាក់ថា ក្រោយពីសមត្ថកិច្ចពាក់ព័ន្ឋ បានពិនិត្យឯកសារ ច្បាប់សុំដឹកជញ្ជូនឈើលេខ២នេះ ដោយបានឯកភាព តាមការស្នើរសុំរបស់លោក សិត សុង ពិតជាយកទៅធ្វើផ្ទះពិតប្រាកដមែន ទើបសមត្ថកិច្ចជួយសម្រួលដល់ តាមចំណារបស់ងភិបាលខេត្តកំពង់ធំ។
