ខេត្តកំពត: បញ្ហាចរាចរណ៍ផ្លូវគោក ជាក្តីព្រួយបារម្ភយ៉ាងខ្លាំងរបស់រាជរដ្ឋាភិបាល ដោយគ្រោះថ្នាក់ចរាចរណ៍នេះ ធ្វើឱ្យអត្រានៃមនុស្សស្លាប់ រងរបួសពីមួយឆ្នាំទៅមួយឆ្នាំ មានការកើនឡើងជាលំដាប់។ ហើយដើម្បីកាត់បន្ថយអត្រានៃមនុស្សស្លាប់ និងរងរបួស រដ្ឋលេខាធិការក្រសួងអធិការកិច្ច និងថ្នាក់ដឹកនាំខេត្តកំពតអំពាវនាវដល់អ្នកបើកបរឬអ្នកប្រើប្រាស់ផ្លូវទាំងអស់ត្រូវបង្កើនស្មារតីប្រុងប្រយ័ត្ន និងគោរពច្បាប់ឲ្យខ្ជាប់ខ្ជួន។
ថ្លែងនៅក្នុងពិធីផ្សព្វផ្សាយច្បាប់ ស្តីពី ចរាចរណ៍ផ្លូវគោក នៅក្រុងកំពត នារសៀលថ្ងៃទី ២៤ ខែមេសា ឆ្នាំ២០២៥ លោកជំទាវ វី ស្រីពៅ រដ្ឋលេខាធិការក្រសួងអធិការកិច្ច បានលើកឡើងថា រដ្ឋាភិបាលអាណត្តិមុនដែលដឹកនាំដោយ សម្តេចតេជោ ហ៊ុន សែន អតីតនាយករដ្ឋមន្ត្រី បានយកចិត្តទុកដាក់ជាអាទិភាព ចំពោះបញ្ហាចរាចរណ៍ ទាំងការអប់រំ ការបង្ការ ការទប់ស្កាត់ និងការចាត់វិធានការផ្សេងៗ រួមទាំងវិធានការណ៍ច្បាប់។ ហើយកិច្ចការងារទាំងនោះ បានបន្តមកដល់សម្តេចធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដែលសម្តេច តែងតែក្រើនរំលឹក ឱ្យមន្ត្រីអនុវត្តច្បាប់ ឲ្យពង្រឹងការអនុវត្តច្បាប់ និងការត្រួតពិនិត្យ ព្រមទាំងបានចេញបទបញ្ជាឱ្យអនុវត្តច្បាប់ ចំពោះអ្នកបើកបរទាំងឡាយណា ដែលប្រព្រឹត្តបទល្មើសចរាចរណ៍ជាក់ស្តែង ត្រូវតែអនុវត្តតាមច្បាប់ឱ្យបានត្រឹមត្រូវ ដោយកុំខ្លាចការអន្តរាគមន៍ ព្រោះមាននាយករដ្ឋមន្រ្តីជាបង្អែក។
លោកជំទាវបានបញ្ជាក់ថា បញ្ហាចរាចរណ៍ផ្លូវគោក ជាក្តីព្រួយបារម្ភយ៉ាងខ្លាំងរបស់រាជរដ្ឋាភិបាល ដោយគ្រោះថ្នាក់ចរាចរណ៍នេះ ធ្វើឱ្យអត្រានៃមនុស្សស្លាប់ រងរបួសពីមួយឆ្នាំទៅមួយឆ្នាំ មានការកើនឡើងជាលំដាប់ នេះគេមិនទាន់និយាយទៅ ដល់ការបន្សល់ទុកស្ត្រីមេម៉ាយ កូនកំព្រា ការនិរាសព្រាត់ប្រាស់ក្នុងគ្រួសារ និងជនពិកានៅឡើយ។ បើតាមរបាយការណ៍គ្រោះថ្នាក់ចរាចរណ៍បានបណ្តាលមកពីការបើកបរយានយន្តមិនគោរពច្បាប់ ឬរធ្វេសប្រហែសដូចជា បើកបរលើស ល្បឿនកំណត់ ជែងក្នុងស្ថានភាពគ្រោះថ្នាក់ បើកបរក្នុងស្ថានភាពស្រវឹង ខ្វះការប្រុងប្រយ័ត្ន មិនមានការយោគ យល់អធ្យាស្រ័យ និងមិនគោរពសិទ្ធិអាទិភាពជាដើម ។
លោកជំទាវបានអំពាវនាវដល់សាធារណជន អ្នកប្រើប្រាស់ផ្លូវទាំងអស់ សូមមេត្តាខិតខំយកចិត្តទុកដាក់បង្កើន ស្មារតីចូលរួមបង្ការ និងទប់ស្កាត់គ្រោះថ្នាក់ចរាចរណ៍ផ្លូវគោក ដោយបើកបរត្រូវគោរពច្បាប់ ត្រូវបើកបរក្នុងស្មារតី ប្រុងប្រយ័ត្នជានិច្ច ប្រកបដោយសីលធម៌ និងការយោគយល់អធ្យាស្រ័យ មិនត្រូវបើកបរលើសល្បឿនកំណត់ ត្រូវពាក់មួកសុវត្ថិភាពជានិច្ចពេលជិះម៉ូតូ។ ពេលធ្វើដំណើរតាមទោចក្រយានយន្តទោះជិត ឬឆ្ងាយ ត្រូវពាក់ខ្សែក្រវាត់សុវត្ថិភាពជានិច្ច ក្នុងពេលធ្វើដំណើរតាមរថយន្ត និងត្រូវត្រួតពិនិត្យលក្ខណៈបច្ចេកទេសយានយន្តជានិច្ច ពិសេសត្រួតពិនិត្យកង់ ចង្កូត ហ្វាំង ភ្លើងបំភ្លឺ ជាពិសេសមិនត្រូវបើកបរក្រោមឥទ្ធិពលនៃគ្រឿងស្រវឹងជាដាច់ខាត។
ឯកឧត្តម ពេញ ធារម្យ អភិបាលរងខេត្តកំពត បានលើកទឹកចិត្តឲ្យសិស្សានុសិស្ស និងយុវជន ក្រៅពីខិតខំសិក្សាឈ្វេងយល់ និងគោរពច្បាប់ចរាចរណ៍ដើម្បីធ្វើជាពលរដ្ឋគំរូ ត្រូវជួយផ្សព្វផ្សាយច្បាប់នេះបន្ត ដល់បងប្អូន និងប្រជាពលរដ្ឋនៅតាមមូលដ្ឋានរបស់ខ្លួន ឲ្យបានទូលំទូលាយ ព្រោះការគោរពច្បាប់ចរាចរណ៍ពេលធ្វើដំណើរ អាចជួយសង្គ្រោះអាយុវជីវិត និងការពារទ្រព្យសម្បត្តិខ្លួនឯង និងអ្នកដទៃ៕ សេង ណារិទ្ធ