ពិធីប្រកាសសុពលភាពនិងចូលកាន់មុខតំណែង ក្រុមប្រឹក្សាខេត្តបាត់ដំបង សំរាប់អាណត្តិទី២ត្រូវបានប្រារព្វធ្វើឡើង នៅសាលប្រជុំលាខេត្តបាត់ដំបង កាលពីព្រឹក ថ្ងៃទី០៥ខែមិថុនាឆ្នាំ២០១៤ថ្មីៗនេះ ក្រោមអធិបតីភាពដ៏ខ្ពង់ខ្ពស់ ឯកឧត្តមនាយឧត្តមសេនីយ៍ កែ គឹមយ៉ាន
ឧបនាយករដ្ឋមន្ត្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀន ព្រមទាំងមាន វត្តមានភ្ញៀវកិត្តិយសចូលរួមសរុប៤៥០នាក់។
ការប្រកាសចូលកាន់មុខតំណែងនិងប្រកាសទទួលស្គាល់នូវសុពលភាពនៃក្រុមប្រឹក្សាខេត្តអាណត្តិទី២របស់ខេត្តបាត់ដំបងនៅពេលនេះ គឺផ្អែកតាមលទ្ធផលផ្លូវការដែលបានប្រកាសដោយគណៈកម្មាធិការជាតិរៀបចំការបោះឆ្នោត ក្នុងការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌអាណត្តទី២ កាលពីថ្ងៃទី១៨ ខែឧសភាឆ្នាំ២០១៤កន្លងមក ដែលក្នុងនោះ សមាជិក-សមាជិកា របស់ក្រុមប្រឹក្សាខេត្តបាត់ដំបងអាណត្តិទី២ មានសមាសភាព ចំនួន១៩រូប (ជាស្ត្រី ចំនួន០២រូប) មកពីគណបក្សប្រជាជនកម្ពុជាចំនួន១៥រូប ( រួមទាំងប្រធាន០១រូប, ស្ត្រីចំនួន០២រូប )និងមកពីគណបក្សសង្គ្រោះជាតិចំនួន០៤រូប។
បន្ទាប់ពីសុន្ទរកថាស្វាគមន៍ របស់ ឯកឧត្តម ច័ន្ទ សុផល អភិបាលខេត្តបាត់ដំបង និងអំណានព្រះរាជក្រឹត្យស្តីពីការទទួលស្គាល់មាសភាពក្រុមប្រឹក្សាខេត្តបាត់ដំបងនិងប្រគល់នូវព្រះរាជក្រឹត្យនិងការប្តេជ្ញាចិត្តរបស់ ឯកឧត្តម អ៊ុក វង្ស ប្រធានក្រុមប្រឹក្សាខេត្តបាត់ដំបង សំរាប់បន្ត អាណត្តិទី២រួចមក។
ឯកឧត្តម នាយឧត្តមសេនីយ៍ កែ គឹមយ៉ាន ឧបនាយករដ្ឋមន្ត្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀន បានមានប្រសាសន៍ថា៖ការប្រកាសចូលកាន់មុខតំណែង របស់ក្រុមប្រឹក្សាខេត្តបាត់ដំបងដែលត្រូវបានតំណាងប្រជាពលរដ្ឋ ផ្តល់នូវសេចក្តីទុកចិត្ត បោះឆ្នោតជ្រើសរើសជាសមាជិកក្រុមប្រឹក្សាខេត្ត គឺដើម្បីបន្តដឹកនាំខេត្តឲ្យមានការអភិវឌ្ឍន៍រីកចម្រើនលើគ្រប់វិស័យបន្ថែមទៀត។
ក្នុងនាមរាជរដ្ឋាភិបាល ឯកឧត្តម នាយឧត្តមសេនីយ៍ កែ គឹមយ៉ាន ឧបនាយករដ្ឋមន្ត្រី ក៏បានផ្តល់ដំបូន្មានដល់ឯកឧត្តម លោកជំទាវ ដែលទទួលបានការគាំទ្រឆ្លងតាមរយៈនៃការបោះឆ្នោតកាលពីថ្ងៃទី១៨ខែឧសភាកន្លងមកថា៖ក្នុងនាម ឯកឧត្តម លោកជំទាវ ជាសមាជិកក្រុមប្រឹក្សាខេត្ត ដែលជាប់ឆ្នោតថ្មី ទោះបីជាមានសមាសភាពមកពីគណបក្សនយោបាយផ្សេងៗគ្នាក៏ដោយ ប៉ុន្តែត្រូវពិចារណាថាៈក្រុមប្រឹក្សា គឺជាតំណាងឲ្យប្រជាពលរដ្ឋក្នុងខេត្តបាត់ដំបងទាំងមូល។ដូចនេះក្នុងការអនុវត្តការងារឯកឧត្តម លោកជំទាវ ជាសមាជិកក្រុមប្រឹក្សាខេត្តត្រូវខិតខំបំរើផលប្រយោជន៍និងសេចក្តីត្រូវការរបស់ប្រជាពលរដ្ឋទាំងអស់ ដោយស្មើភាព ដោយមិនត្រូវប្រកាន់នូវនិន្នាការនយោបាយ អ្វីនោះឡើយ? ៕
