ភ្នំពេញ ៖ បុរសជនជាតិបរទេសម្នាក់បានបើករថយន្តមួយគ្រឿងក្នុងល្បឿនលឿនជ្រុលបុកម៉ូតូមួយគ្រឿងជិះដោយបុរស២នាក់បណ្ដាលឱ្យរងរបួសធ្ងន់ ហើយរថយន្តបង្កមិនបានឈប់នៅទទួលខុសត្រូវនោះទេ បានព្យាយាមបើករថយន្តរត់ទាំងគៀបជាប់ម៉ូតូនៅពីក្រោមរថយន្ត ត្រូវបានសមត្ថកិច្ចឃាត់ជាប់ ហេតុការណ៍នេះបានកើតឡើងកាលពីវេលាម៉ោង៣និង៥០នាទីទៀបភ្លឺ
ថ្ងៃទី៦ខែមិថុនាឆ្នាំ២០១៤ នៅត្រង់ចំណុចស្ពាននាគវត្តភ្នំ តាមបណ្ដោយផ្លូវព្រះនរោត្ដម ស្ថិតក្នុងសង្កាត់វត្តភ្នំ ខណ្ឌដូនពេញ។ ប្រភពព័ត៌មានពីកន្លែងកើតហេតុបានអោយដឹងថានៅមុនពេលកើតហេតុ គេឃើញបុរស២នាក់បានជិះម៉ូតូមួយគ្រឿងម៉ាកហុងដាឌ្រីម ធុនសេ១១០ ពណ៌ខ្មៅ ពាក់ស្លាកលេខ ភ្នំពេញ 1BD-7696 ជិះធ្វើដំណើរតាមបណ្ដោយផ្លូវព្រះនរោត្ដម
ទិសដៅពីជើងទៅត្បូង ខណៈមកដល់ចំណុចកើតហេតុស្ពាននាគវត្តភ្នំ ស្រាប់តែមានរថយន្តមួយគ្រឿងម៉ាកតូយ៉ូតា តាកូម៉ា ពណ៌ទឹកប្រាក់ ពាក់ស្លាកលេខ បណ្ដោះអាសន្ន 5347 បើកបរដោយបុរសជនជាតិបរទេសម្នាក់ធ្វើដំណើរតាមបណ្ដោយផ្លូវព្រះនរោត្ដម ទិសដៅពីត្បូងទៅជើង ក៏បានបុកចំម៉ូតូពេញទំហឹង បណ្ដាលអោយបុរស២នាក់ហោះផ្លោងចេញពីម៉ូតូរងរបួស
ធ្ងន់ បន្ទាប់ពីកើតហេតុរថយន្តបង្កមិនបានឈប់នៅទទួលខុសត្រូវនោះទេ គឺបានបន្ថែមល្បឿនទៅមុខដើម្បីគេចខ្លួនទាំងម៉ូតូគៀបជាប់ពីក្រោមរថយន្តអូសបែកផ្កាភ្លើងព្រៀកៗ រហូតមកដល់ចំណុចផ្លូវលេខ៤៤៨កែងនិងផ្លូវលេខ២៧១ សង្កាត់ផ្សារដើមថ្កូវក៏ត្រូវសមត្ថកិច្ចឃាត់រថយន្តរួមទាំងអ្នកបើកបរបានតែម្ដង ។ ភ្លាមៗប្រជាពលរដ្ឋដែលបានជិះដេញតាមពីក្រោយ
រថយន្តបង្កមានការខឹងសម្បារនិងអ្នកបើកបរដែលជាជនជាតិបរទេសនោះយ៉ាងខ្លាំងក៏បានវាយអ្នកបើកបរបណ្ដាលអោយរងរបួស ហើយក៏ត្រូវសមត្ថកិច្ចនាំខ្លួនអ្នកបើកបរទៅរកកន្លែងមានសុវត្តិភាព ដោយព្រោះប្រជាពលរដ្ឋមានគ្នាច្រើនសមត្ថកិច្ចមិនអាចគ្រប់គ្រងបាន។ បន្ទាប់ពីកើតហេតុជនរងគ្រោះត្រូវបានរថយន្តសាមុយរបស់មន្ទីរពេទ្យឯកជនដឹក
បញ្ជូនទៅសង្គ្រោះភ្លាមៗ។ក្រោយពេលកើតហេតុសមត្ថកិច្ចជំនាញបានធ្វើការវាស់វែងយករថយន្តបង្កនិងម៉ូតូជនរងគ្រោះទៅរក្សាទុកនៅការិយាល័យចរាចរជើងគោកនៃស្នងការដ្ឋាននគរបាលរាជធានីភ្នំពេញដើម្បីធ្វើការដោះស្រាយតាមផ្លូវច្បាប់៕
