កំពង់ឆ្នាំង៖ពិធីប្រកាសមុខតំណែងថ្មីរបស់លោក ស៊ុន សុវណ្ណារិទ្ធ ជាអភិបាលរងនៃគណៈអភិបាលខេត្តកំពង់ឆ្នាំង ដែលពិធីនេះបានប្រារព្វឡើងនៅព្រឹកថ្ងៃទី១៦ ខែមិថុនា ឆ្នាំ២០១៤ នៅក្នុងសាលាខេត្ត កំពង់ឆ្នាំង។នៅក្នុងពិធីនេះដែរ ឯកឧត្តម សក់ សេដ្ឋា រដ្ឋលេខាធិការក្រសួង
មហាផ្ទៃតំណាងដ៍ខ្ពង់ខ្ពស់ របស់ឯកឧត្តម ស ខេង ឧបនាយករដ្ឋមន្ត្រីនិងជារដ្ឋមន្ត្រីក្រសួងមហាផ្ទៃ បានមានប្រសាសន៍ថា៖ពលករ ខ្មែរដែលរដ្ឋាភិបាលថៃបញ្ជូនមកកម្ពុជាវិញបានកើនឡើងដល់ជិត១៣ម៉ឺននាក់ហើយ។
លោក ឈួរ ច័ន្ទឌឿន អភិបាលនៃគណៈអភិបាលខេត្តកំពង់ឆ្នាំងបានឡើងរាយការណ៍នៅក្នុងពិធី នេះថា៖ពលករខ្មែរនៅក្នុងខេត្តកំពង់ឆ្នាំងដែលត្រូវថៃបញ្ជូនមកវិញ មកដល់ពេលនេះអាជ្ញាធរខេត្តបានធ្វើការដឹកជញ្ជូនត្រឡប់មកលំនៅដ្ឋានវិញមានចំនួនជាង២០០នាក់ហើយ ដោយខេត្តបានប្រើប្រាស់រថយន្តចំនួន១០គ្រឿង រង់ចាំ និងដឹកជញ្ជូនរយៈពេល២ថ្ងៃ។មិនតែប៉ុណ្ណោះក្នុងការដឹកជញ្ជូនពលករមកពីក្រុងប៉ោយប៉ែតនោះ ក៍មានពលករនៅក្នុងខេត្តបាត់ដំបង និងខេត្តពោធិសាត់មួយចំនួនក៍ត្រូវបានអាជ្ញាធរខេត្ត កំពង់ឆ្នាំងបានជួយដឹកមកកាន់លំនៅដ្ឋានវិញផងដែរ។ពេលមកដល់ខេត្តកំពង់ឆ្នាំង អាជ្ញាធរខេត្តរួមនឹងសាខាកាកបាទក្រហមខេត្តក៍បានធ្វើការចែកអំណោយស្បៀងអារហារ និងថវិការមួយចំនួនដល់ពលករទាំងអស់មុនវិលទៅលំនៅដ្ឋានវិញ។
លោក ស៊ុន សុវណ្ណារិទ្ធ ជាអភិបាលរងខេត្តថ្មី បានឡើងធ្វើការប្តេជ្ញាចិត្តថា៖លោកនឹងខិតខំពង្រឹងសាមគ្គីភាពផ្ទៃក្នុងអោយបានល្អនៅក្នុងគណៈអភិបាលខេត្ត និងបណ្តាមន្ទីរ អង្គភាព កងកំលាំងប្រដាប់អាវុធ អាជ្ញាធរមូលដ្ឋានគ្រប់ស្រុក ដោយឈរលើមូលដ្ឋានគោរពតាមបទដ្ឋាននានានិងច្បាប់របស់រដ្ឋ ការពាររដ្ឋធម្មនុញ្ញនៃរាជាណាចក្រកម្ពុជា។រួមចំណែកពង្រឹងការអនុវត្តន៍គោលនយោបាយភូមិឃុំមានសុវត្ថិភាពទាំង៩ចំណុចអោយបានល្អប្រសើរ។យកចិត្តទុកដាក់បំរើសេវ៉ាសាធារណៈជូនប្រជាពលរដ្ឋ ចូលរួមប្រឡងប្រណាំងកែរប្រែសោភ័ណ្ឌភាពទីក្រុង ក្នុងទិសដៅអោយទីក្រុងស្អាត និងមានសេវាកម្មល្អ។
ឯកឧត្តម សក់ សេដ្ឋា បានមានប្រសាសន៍ក្នុងពិធីនេះថា៖គិតមកដល់ពេលនេះពលករខ្មែរដែលថៃបញ្ជូនមកវិញ បានកើនឡើងជិត១៣ម៉ឺននាក់ហើយ ក្នុងនោះពលករដែលទៅធ្វើការនៅស្រុកថៃ៩៩%គឺពុំមានច្បាប់ត្រឹមត្រូវឡើយ។ឯកឧត្តមបានមានប្រសាសន៍ទៀតថា៖ព្រំដែនគោករវាងកម្ពុជាថៃមានប្រវែងជាង៧០០គីឡូម៉ែត្រ ក្នុងនោះមានច្រករបៀងចេញចូលរាប់រយច្រកដែលពលករខ្មែរលួចចេញទៅធ្វើការខុសច្បាប់ក្នុងប្រទេសថៃ ប៉ុន្តែអាជ្ញាធរថៃបានបញ្ជូនពលករខ្មែរមកវិញច្រើនជាងគេគឺច្រកទ្ធាព្រំដែន ក្រុងប៉ោយប៉ែត ដោយឡែកនៅច្រលទ្ធារខេត្តព្រះវិហារ បាត់ដំបង ប៉ៃលិន កោះកុង គឺមានពលករចូលមកវិញតិចតួចប៉ុណ្ណោះ។
បញ្ហាខាងលើនេះអាជ្ញាធរគ្រប់ខេត្តក្រុងត្រូវសហការគ្នាក្នុងការនាំពលករតាមច្រកទ្ធារនីមួយៗចូលមកខេត្តរៀងៗខ្លួន។ក្នុងនោះដែរត្រូវយកចិត្តទុកដាក់អប់រំដល់ពលករទាំងអស់អោយបានយល់អំពីច្បាប់ក្នុងការចេញទៅធ្វើការខុសច្បាប់នៅក្រៅប្រទេស។អាជ្ញាធរទាំងអស់ត្រូវសហការជាមួយបណ្តារោងចក្រសហគ្រាសនៅក្នុងមូលដ្ឋាន ដើម្បីអោយពលករទាំងអស់បានការងារក្នុងស្រុក ជាជាងទៅធ្វើការងារខុសច្បាប់នៅក្រៅប្រទេស ដែលអាចប្រឈមមុខនឹងគ្រោះថ្នាក់គ្រប់បែបយ៉ាង។ខាងមុខនេះក្រសួងមហា នឹងបង្កើតទីបញ្ជាការស្រាលតាមច្រកព្រំដែន ដើម្បីប្រមូលពលករមកស្រុកវិញ និងទប់ស្កាត់ការឆ្លងដែនទៅធ្វើការដោយខុសច្បាប់។ទន្ទឹមនេះដែរក្រសួងមានគំរោងនឹងបង្កើតអោយមានកន្លែងធ្វើលិខិតឆ្លងដែន តាមបណ្តាខេត្តមយយចំនួននៅតាមបណ្តាខេត្តមួយចំនួន ងាយស្រួលដល់ពលករអាចធ្វើលិខិតឆ្លងដែន បានទាន់ពេលវេលាដើម្បីបានទៅធ្វើការងារស្របច្បាប់នៅក្រៅប្រទេស៕
