កែប ៖ រយៈពេលប៉ុន្មានថ្ងៃជាប់ៗគ្នា គេសង្កេតឃើញអាជ្ញាធរខេត្តកែប បាននិងកំពុងសស្រាក់សស្រាំធ្វើការកែលម្អគ្រប់កន្លែងទាំងក្នុងទីប្រជុំជន ទាំងដងផ្លូវសាធារណៈ ព្រមទាំងមន្ទីរស្ថាប័នគ្រប់អង្គភាពទូទាំងខេត្ត។ដោយឡែកលំនៅដ្ឋានប្រជាពលរដ្ឋស្ថិតក្នុងតំបន់នានាក៏ត្រូវបានតាក់តែង លម្អយ៉ាងប្រណិតផងដែរ។
យ៉ាងណាមិញខេត្តកែប នឹងត្រូវរៀបចំធ្វើពិធីបុណ្យសមុទ្រ ជុំទី២របស់ខ្លួន ដែលប្រព្រឹត្តរយៈពេលបីថ្ងៃ គឺចាប់ពីថ្ងៃទី២២,២៣,២៤ខែធ្នូ ឆ្នាំ២០១៧ខាងមុខ ក្រោមអធិបតីភាពដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិតិ្តព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា។
ជាមួយនេះដើម្បីញាំុងពិធីបុណ្យសមុទ្រឲ្យកាន់តែមានភាពអធិកអធម រដ្ឋបាលខេត្តកែប បាននិងកំពុងជំរុញធ្វើការកែលម្អ កែសោភណភាព គ្រប់ទីកន្លែង ពិសេសចំណុចទីតាំងសំខាន់ៗ ដូចជាមុខសាលាខេត្ត ឆ្នេរជ្រោយដូង មាត់ឆ្នេរស្រីស ឆ្នេរផ្សារក្តាម និងទីតាំងសំខាន់ៗជាច្រើនទៀត។លើសពីនេះ របងសាលាខេត្តកែបដែលកំពុងពន្លឿនជួសជុលកែលម្អជាថ្មីនោះ ក៏បានរួចរាល់ជាស្ថាពរផងដែរ។
លោក អ៊ុក ថា អភិបាលរងខេត្តកែប កាលពីព្រឹកថ្ងៃទី១៤ខែធ្នូ ឆ្នាំ២០១៧នេះ លោកបានបញ្ជាក់ឲ្យដឹងថា៖ ដោយសារតែពិធីបុណ្យសមុទ្រឆ្នាំ២០១៧កាន់តែឈានជិតមកដល់ អាជ្ញាធរគ្រប់ជាន់ថ្នាក់ពិតជាមានការមមាញឹកខ្លាំងបំផុត។ម្យ៉ាងទៀតការកែលម្អនៅគ្រប់កន្លែងគឺត្រូវធ្វើឡើងទាំងយប់ទាំងថ្ងៃ គ្មានពេលឈប់សម្រាកឡើយ ដើម្បីឲ្យទាន់ពិធីបុណ្យសមុទ្រ។លោកថា ការកែលម្អសោភណភាព ត្រូវបានតាក់តែងឡើងគ្រប់ស្ថាប័ន គ្រប់អង្គភាព ទាំងក្រៅ ទាំងក្នុងទីប្រជុំជនទូទាំងខេត្ត ហើយនៅព្រឹកនេះ អាជ្ញាធរក៏បានជូនដំណើរប្រតិភូដើម្បីពិនិត្យទីតាំងសម្រាប់គណៈអធិបតីក្នុងពិធីសម្ពោធ អគារសិក្សារនៅក្នុងបរិវេណវិទ្យាល័យ ប៊ុន រ៉ានី ហ៊ុន សែន ចរិយាវង្សផងដែរ។
លោក កែន សត្ថា អភិបាលនៃគណៈអភិបាលខេត្តកែបបានលើកឡើងថា៖ ដើម្បីឆ្លើយតបនឹងពិធីបុណ្យសមុទ្រខាងមុខ ទោះជាចំណាយកម្លាំង ចំណាយពេលវេលាក្នុងកម្រិតណាក៏លោកមិនរាថយដែរ ព្រោះនេះជាតួនាទីក្នុងនាមជាម្ចាស់ផ្ទះ ដោយលោកបានត្រៀមលក្ខណៈជាស្រេចហើយ សម្រាប់រៀបចំពិធីបុណ្យសមុទ្រជុំទី២នេះ ឲ្យទទួលបានជោគជ័យ។លោកអភិបាលខេត្ត បានគូសបញ្ជាក់ថា៖ក្នុងពេលដំណាលគ្នានេះ ក្រៅពីរៀបចំពិធីបុណ្យសមុទ្រ រដ្ឋបាលខេត្តកែប នឹងធ្វើពិធីសម្ពោធ ដាក់ឲ្យដំណើរការនូវ អគារសិក្សា ក្នុងវិទ្យាល័យ ប៊ុន រ៉ានី ហ៊ុន សែន ចរិយាវង្សផងដែរ ដោយពិធីនេះនឹងធ្វើឡើងនៅព្រឹកថ្ងៃទី២៣ខែធ្នូ ឆ្នាំ២០១៧ ក្រោមអធិបតីភាពដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។លើសពីនេះទៅទៀត ផ្លូវជាតិលេខ33Aដែលជំនាញកំពុងស្ថាបនាបន្តប្រវែង៩០០ម៉ែត្រទៀតនោះ នឹងខិតខំជម្រុញឲ្យរួចរាល់ទាន់ពិធីបុណ្យសមុទ្រនេះផងដែរ។
សូមជម្រាបថា៖ក្នុងឆ្នាំ២០១៦តំបន់រមណីយដ្ឋានខេត្តកែបទទួលបានភ្ញៀវទេសចរណ៍ជាតិចំនួន៥១៦.៤៤២នាក់និងអន្តរជាតិចំនួន៥៣.៧៣៣នាក់។ដោយឡែកក្នុងរយៈពេល៩ខែឆ្នាំ២០១៧ខេត្តកែបទទួលបានភ្ញៀវជាតិចំនួន៨២៩.៨៨៣នាក់និងអន្តរជាតិ៣៧.៦៤៤នាក់ ដោយសង្ឃឹមថា ក្នុងពិធីបុណ្យសមុទ្រខាងមុខ ភ្ញៀវពិតជាសម្រុកមក សម្រាក លម្ហែ កម្សាន្តលើសពីការរំពឹងទុកមិនខាន៕
