សៀមរាប ៖ ( ដោយ ខេង ខេមរា) អគារថ្មី២ខ្នង មាន១៧បន្ទប់ ធ្វើអំពីថ្មប្រកក្បឿង និង អគារជួសជុល១ខ្នង កំពស់២ជាន់ ព្រមទាំងសមទ្ធិផល មួយចំនួនទៀត ក្នុងសាលាមត្តេយ្យអង្គរ ខេត្តសៀមរាប ត្រូវបានបើកសម្ពោធដាក់ឲ្យប្រើប្រាស់ជាផ្លូវការ កាលពីព្រឹក ថ្ងៃទី ០២ ខែ 
សីហា ឆ្នាំ២០១៤ ក្រោមអធិបតីភាពដ៏ខ្ពង់ខ្ពស់របស់ឯកឧត្តមឧបនាយករដ្ឋមន្ត្រី ទៀ បាញ់ រដ្ឋមន្ត្រី ក្រសួងការពារជាតិ និងជាប្រធានក្រុមការងារថ្នាក់ជាតិចុះមូលដ្ឋានខេត្តសៀមរាប និងលោកជំទាវ ដោយមានការ អញ្ជើញចូលរួមពីសំណាក់ ឯកឧត្តម លោកឧកញ៉ា លោកជំទាវ ជាសមាជិកព្រឹទ្ធសភា រដ្ឋសភា គណៈអភិបាលខេត្ត ក្រុមប្រឹក្សាខេត្ត សមាជិកក្រុមការងារថ្នាក់ជាតិ និង អស់លោក លោកស្រីជាថ្នាក់ដឹកនាំមន្ទីរ អង្គភាព សប្បុរសជន និង សិស្សានុសិស្ស មាតាបិតាសិស្ស និង ប្រជាពលរដ្ឋផងដែរ ។ 
ក្នុងកិច្ចស្វាគមន៍របស់លោក អ៊ុង សិរីឌី ប្រធានមន្ទីរអប់រំយុវជន និងកីឡាខេត្ត បានឲ្យដឹងពីស្ថិតិកុមារ អាយុ ក្រោម ៦ឆ្នាំ មានចំនួន ១៥៣ពាន់៨៨៧នាក់ ស្មើ ១៥%នៃប្រជាពលរដ្ឋក្នុងខេត្ត ៩៨២ពាន់៩៤៧នាក់ ហើយក្នុង ចំណោមកុមារ ៣៣ពាន់៦២នាក់ ស្មើ២១%ប៉ុណ្ណោះ ដែលបានទទួលសេវាអប់រំ នៅតាមសាលាមត្តេយ្យរដ្ឋ មត្តេយ្យ សហគមន៍ និង ឯកជន ហើយកុមារ៧៩% មិនបានទទួលសេវាអប់រំ នៅកម្រិតមត្តេយ្យសាលានៅឡើយ ។
ម្យ៉ាងទៀតអគារថ្មី២ខ្នង មាន១៧បន្ទប់ និង ការជួស ជុលឡើងវិញនូវអគារចាស់ ព្រមទាំងសមទ្ធិផលមួយចំនួនទៀត គឺត្រូវបានផ្តួចផ្តើម គំនិតឡើងរបស់ លោកជំទាវ គួយ ណាលីន ឃឹម ប៊ុនសុង រួមនឹងបងប្អូនសប្បុរសជននានា ដែលបានឧបត្ថម្ភ ជ្រោម ជ្រែងគ្រប់បែបយ៉ាង ដល់ សាលាមត្តេយ្យអង្គរ ក្នុងការជួសជុល សាងសង់អគារថ្មី ដោយសរុបទឹកប្រាក់សាងសង់ ចំនួន ១៩១ពាន់៤៥៨,៩២ ដុល្លាសហរដ្ឋអាមេរិក ។ មានប្រសាសន៍ នោះឯ.ឧ ឃឹម ប៊ុនសុង អភិបាលនៃគណៈអភិបាលខេត្តសៀមរាប ក៏បានគូសបញ្ជាក់ថា ដោយមើលឃើញនូវ បញ្ហាប្រឈម ក្នុងវិស័យអប់រំ កម្រិតមត្តេយ្យសាលា ក្នុងស្ថានភាពជាក់ស្តែងរបស់ខេត្ត ដែល មានកុមារតូចៗជាច្រើន មិនបានទទួលសេវាអប់រំ កុមារតូចៗនៅសាលាមត្តេយ្យអង្គរ ។ 
ឯកឧត្តមអភិបាលខេត្ត បានបន្តទៀតថា តាមយុទ្ធសាស្ត្រចតុកោណរបស់រាជរដ្ឋាភិបាល បានចាត់ទុកវិស័យអប់រំ ជាវិស័យអទិភាពដ៏ចំបង និង ជាឆ្អឹងខ្នងនៃការអភិវឌ្ឍន៍ សង្គមជាតិ ។ មានប្រសាសន៍នោះឯ.ឧ ទៀ បាញ់ ក៏បានលើកឡើងថា នេះជាព្រឹត្តិការណ៍លក្ខណៈប្រវត្តិសាស្ត្រ ដែល យើងគ្រប់រូបជាអ្នកទទួលខុសត្រូវនៅក្នុងសង្គម ក្នុងការរៀបចំអនាគតរបស់កុមារតូចៗ ក្នុងការទទួលបានការអប់រំ កម្រិតដំបូង គឺការសិក្សាថ្នាក់មត្តេយ្យ ដែលជាសិទ្ធទទួលបានការអប់រំសម្រាប់ពលរដ្ឋកម្ពុជា ។ 
ឯកឧត្តមបន្តទៀតថា ការងារអប់រំ គឺជាគន្លឹះនៃប្រភព មធ្យោបាយដ៏សម្ខាន់ក្នុងការកសាងធនធានមនុស្ស ដែលទាមទាឲ្យសង្គមទាំងមូល ចូលរួម វិនិយោគឲ្យបានខ្លាំងក្លា និង ទទួលខុសត្រូវខ្ពស់ប្រកបដោយចិរភាព ។ ម្យ៉ាងទៀតនៅលើសកលលោក ការកសាងធន ធានមនុស្សជាកិច្ចការប្រកបដោយអទិភាព និងយកចិត្តទុកដាក់ខ្ពស់បំផុតពីរាជរដ្ឋាភិបាល ក្នុងស្មារតី វិនិយោគធនធាន សាធារណៈលើវិស័យអប់រំក៏មានសមមាត្រខ្ពស់គួរឲ្យចាប់អារម្មណ៍ផងដែរ ។
ឯកឧត្តមឧបនាយរដ្ឋមន្ត្រី ក៏បានធ្វើ ការអំពាវនាវ នឹង ផ្តាំផ្ញើដល់លោកគ្រូ អ្នកគ្រូ មាតាបិតាសិស្ស ក៏ដូចអាជ្ញាធរមូលដ្ឋាន រួមសហការគ្នា ក្នុងការថែរក្សា សមទ្ធិផលដ៏ថ្មីមួយនេះ ឲ្យបានគង់វង្ស ដែលជាថ្នាលបណ្តុះបណ្តាលនូវធនធានមនុស្សកម្រិតដំបូង ព្រមទាំងធ្វើការ រៀបចំ តុបតែងនៅតាមបន្ទប់ថ្នាក់រៀន និង ទីធ្លាកម្សាន្តរបស់សិស្សឲ្យមានអនាម័យ បរិស្ថានល្អ ដើម្បីអនាគតរបស់ កូនចៅយើងទាំងអស់គ្នា ហើយក៏ធ្វើឲ្យក្រុងប្រត្តិសាស្ត្រមួយនេះកាន់តែស្រស់ត្រកាលឡើងថែមទៀតផង ។
ក្នុងនោះដែរគណៈអធិបតីក៏បានធ្វើការបំពាក់នូវគ្រឿងឥស្សរិយយស និង លិខិតថ្លែងអំណរគុណ ដល់ឯកឧត្តម លោកឧកញ៉ា លោកជំទាវ អស់លោក លោកស្រី ជាសប្បុរសជន ដែលបានបរិចាកនូវថវិកាផ្ទាល់ខ្លួន កសាង និង ជួសជុលសាលាមត្តេយ្យអង្គរ រួមមាន គ្រឿងឥស្សរិយយស នៃព្រះរាជាណាចក្រកម្ពុជា ថ្នាក់មហាសិរីវឌ្ឍន៍ ចំនួន ២០ រូប ថ្នាក់មហាសេនា ០១រូប ថ្នាក់ធិបឌិន ០១រូប និង គ្រឿងឥស្សរិយយសសុវត្ថារា ថ្នាក់មហាសេរីវឌ្ឍន៍ ០១រូប និង គ្រឿងឥស្សរិយយស មុនីសារាភ័ណ្ឌ ថ្នាក់មហាសេរីវឌ្ឍន៍ ០៣រូប ថ្នាក់មហាសេនា ០៧រូប និង ប្រគល់លិខិតថ្លែង អំណរគុណ ចំនួន៥០រូប ។ ក្នុងនោះក៏មានការឧបត្ថម្ភដល់សមាជិកសមាជិកាចូលរួមក្នុងពិធីសម្ពោធនេះផងដែរ ។
