ខេត្តព្រះសីហនុ៖លោក ចេង ស្រុង ប្រធានមន្ទីររៀបបំដែនដី នគរូបនីយកម្ម សំណង់ និងសុរិយោដីខេត្ត ព្រះសី ហនុបានអោយដឹងថាខេត្តព្រះសីហនុជាខេត្តមួយដែលបានអនុវត្តការចុះបញ្ជីដីធ្លីមានលក្ខណៈជាប្រព័ន្ធតាមរយៈគម្រោងរៀបចំដែនដី និង រដ្ឋបាលដីធ្លីតាំងពីឆ្នាំ ២០០៣ ហើយបានប្តូរមកជាកម្មវិធីអនុវិស័យរដ្ឋ បាលដីធ្លី នៅក្នុងឆ្នាំ២០០៩ រហូតមកដល់បច្ចុប្បន្ន ដោយមានការគាំទ្រផ្នែកហិរញ្ញូវត្ថុពីរាជរដ្ឋាភិបាល និងដៃគូអភិវឌ្ឍន៍ មាន ប្រទេសអាល្លឺម៉ង និងហ្វាំងឡង់ និងជំនួយបច្ចេកទេស ពីអគ្គនាយកដ្ឋានសុរិយោដី និងភូមិសាស្ត្រ របស់ ក្រសួងរៀបចំដែនដីដរូបនីយកម្ម និងសំណង់ ជាពិសេស គឺការយកចិត្តទុកដាក់របស់ឯកឧត្តម ជា សុផារ៉ា ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ និង ឯកឧត្តម គួច ចំរើន អភិបាល នៃគណៈអភិបាលខេត្តព្រះសីហនុ ដើម្បីធ្វើការចុះបញ្ជីដីធ្លី និងចេញប័ណ្ណកម្មសិទ្ធិជូនដល់ប្រជាពលរដ្ឋ។ ការចុះបញ្ជីដីធ្លីមានលក្ខណៈជាប្រព័ន្ធ គឺជាទិសដៅរបស់រាជរដ្ឋាភិបាល ដើម្បីកាត់បន្ថយភាពក្រីក្រ ជំរុញឱ្យ មានស្ថេរភាពសង្គម ការអភិវឌ្ឍន៍សេដ្ឋកិច្ច ធ្វើឱ្យប្រសើរឡើងនូវសុវត្ថិភាពនៃការកាន់កាប់ដីធ្លី និងជំរុញការ អភិវឌ្ឍន៍ទីផ្សារដីធ្លីប្រកបដោយប្រសិទ្ធិភាព ដែលមានក្រសួងរៀបចំដែនដី នគរូបនីយកម្ម និងសំណង់ ប្រកាស ចេញនូវគោលនយោបាយដីធ្លី ក្នុងគោលបំណងពង្រឹងសុវត្ថិភាពនៃការកាន់កាប់ដីធ្លី ទីផ្សារដីធ្លីទប់ស្កាត់និងដោះ ស្រាយទំនាស់ដីធ្លី រៀបចំដែនដី ជំរុញការបែងចែកដីធ្លី ប្រកបដោយសមធម៌ និងគ្រប់គ្រងធនធានធម្មជាតិប្រកប ដោយប្រសិទ្ធិភាព។ ហើយកន្លងមកនៅក្នុងស្រុកព្រៃនប់នាពេលកន្លងមក បានធ្វើការចុះបញ្ជីដីធ្លីនៅឃុំជើងគោ និងឃុំអូរឧកញ៉ាហេង ចុះវាស់វែងក្បាលដីសរុបបានចំនួន ៩,៩១៨ ក្បាលដី បំពេញទម្រង់បែបបទនៃការ ប្រមូល ទិន្នន័យក្បាលដីសរុបបានចំនួន ៩,៤៣៧ក្បាលដី និងចែកប័ណ្ណកម្មសិទ្ធិជូនដល់ប្រជាពលរដ្ឋបានចំនួន ១,០៤០ ប័ណ្ណ។
លោក គួច ចំរើន អភិបាលនៃគណៈអភិបាលខេត្តព្រះសីហនុ នាព្រឹកខណៈលោក អញ្ជើញជាអធិបតី ក្នុងកិច្ចប្រជុំផ្សព្វផ្សាយសេចក្ដីប្រកាសកំណត់តំបន់វិនិច្ឆ័យ (សម្រាប់ការចុះបញ្ជីដីធ្លីមានលក្ខណៈប្រព័ន្ធ) លោក បានមានប្រសាសន៏ដោយបានលើកឡើងថា គោលនយោបាយរបស់រាជរដ្ឋាភិបាល ក្រោមការដឹកនាំរបស់ សម្តេចតេជោហ៊ុន សែន អំពីការអភិវឌ្ឍន៍ប្រទេសជាតិរីកចម្រើនដូចបច្ចុប្បន្នហើយចំពោះការរៀបចំផ្តល់ប័ណ្ណកម្មសិទ្ធិដីធ្លីជូនពលរដ្ឋម្ចាស់កម្មសិទ្ធិដីធ្លីជាបន្តបន្ទាប់កន្លងមកនេះក៏ស្ថិតនៅក្នុងគោលនយោបាយដ៏សំខាន់ក្នុងអភិវឌ្ឍន៍ប្រទេសជាតិ។ នេះជាការសមស្របបំផុតដែលបានកំណត់នៅក្នុងគោលនយោបាយ ដីធ្លីរបស់រាជរដ្ឋា ភិបាលដើម្បីលើកស្ទួយដល់ការអភិវឌ្ឍន៍របស់ប្រទេសជាតិ ជាប្រយោជន៍ដល់រាជរដ្ឋាភិបាល និងប្រជាពលរដ្ឋជា ម្ចាស់ដីផង គឺ រដ្ឋគ្រប់គ្រងដីធ្លីបាន ទាំងដីរដ្ឋ និងដីឯកជន ដែលធ្វើឱ្យរដ្ឋមានការងាយស្រួលក្នុងការរៀបចំដែនដី រដ្ឋបាលដីធ្លី ការ បែងចែកដី និងកាត់បន្ថយទំនាស់ដីធ្លីធានាសុវត្តិភាពនៃការកាន់កាប់ដីធ្លីរបស់ប្រជាពលរដ្ឋ បម្រើដល់ការវិនិយោគប្រជាពលរដ្ឋធ្វើការបង្ករបង្កើនផល អាចជារបស់សំរាប់ដាក់បញ្ចាំ ឬជាសំអាងបាន ឬអាចប្រកបមុខរបរផ្សេងៗទៀតលើដីធ្លីរបស់ខ្លួនដោយគ្មានការព្រួយបារម្ភ និងលើកស្ទួយជីវភាពរស់នៅ។
លោកសង្ឃឹមថា ក្រោយពីការចុះបញ្ជីដីថ្មីនេះប្រជាពលរដ្ឋដែលជាម្ចាស់ក្បាលដី និងអ្នកកាន់កាប់ដីទាំង អស់នឹង ទទួលបានប័ណ្ណកម្មសិទ្ធិ ហើយតាមរយៈនៃប័ណ្ណកម្មសិទ្ធិនេះ បងប្អូននឹងក្លាយជាម្ចាស់ដីពិតប្រាកដ មានសិទ្ធិ ស្របច្បាប់ក្នុងការកាន់កាប់ប្រើប្រាស់ អាស្រ័យផល និងចាត់ចែង មិនត្រឹមតែប៉ុណ្ណោះ ប័ណ្ណកម្មសិទ្ធិនេះ គឺជាឯក សារ គតិយុត្តិសំរាប់ជាសំអាង ទៅពេលមានជំលោះដីធ្លីកើតឡើង ថាខ្លួនជាម្ចាស់ដីពិតប្រាកដ។ ក្រៅពីនេះ ក្រោយពីទទួលបានប័ណ្ណកម្មសិទ្ធិនេះរួចហើយក៏ពុំមាននរណាម្នាក់ត្រូវបានគេដកហូតកម្មសិទ្ធិរបស់ខ្លួនបានឡើយប្រសិនបើការដកហូតនេះមិនមែនដើម្បីប្រយោជន៍សាធារណៈការដកហូតត្រូវធ្វើទៅតាមទម្រង់និងនីតិវិធីបញ្ញត្តិដោយច្បាប់ និងបទបញ្ជា បន្ទាប់ពីបានផ្តល់សំណងជាមុនដោយសមរម្យ និងយុត្តិធម៌៕
(ដោយនាគសមុទ្រ)
