បច្ចុប្បន្នសង្គ្រាមប្រឆាំងនឹងវីរុសអ៊ីបូឡាកំពុងតែកើតឡើងនៅជុំវិញពិភពលោក ខណៈដែលមានការករណីឆ្លងវីរុសនេះថ្មីៗជាច្រើនទៀតកើតឡើងនៅអាហ្វ្រិកកណ្តាល។ ករណីឆ្លងរាលដាលថ្មីៗបង្កឲ្យមានការព្រួយបារម្ភយ៉ាងខ្លាំងដល់មេដឹកនាំជុំវិញពិភពលោក ត្រូវចាត់វិធានការទប់ស្កាត់កុំឲ្យវីរុសនេះចូលលុកលុយនៅក្នុងប្រទេសរបស់ខ្លួន ។ សង្គ្រាមដែលកើតឡើងរវាងមនុស្សនឹងមនុស្ស អាចចរចាគ្នាបាន ប៉ុន្តែចំពោះវីរុសអ៊ីបូឡាវិញ ពិតជាមិនអាចឡើយ ដោយពេលនេះ មិនទាន់មានវិធានការទប់ស្កាត់នៅឡើយ។ មន្ត្រីអង្គការសហប្រជាជាតិទទួលបន្ទុកយុទ្ធនាការប្រឆាំងជំងឺអេបូឡា បានប្រាប់ថា សង្គ្រាម
ប្រឆាំងជំងឺអេបូឡា អាចត្រូវចំណាយពេលរហូតដល់៦ខែ។ សាធារណរដ្ឋប្រជាធិបតេយ្យកុងហ្គោ បានជួបករណីមួយថ្មីទៀត នៅភាគនិរតី ស្ថិតក្នុងតំបន់អាហ្វ្រិកកណ្តាល។ ជាករណីដាច់ដោយឡែក ពីករណីរាតត្បាតនៅអាហ្វ្រិកខាងលិច។ រហូតពេលនេះ ជំងឺអេបូឡាបានសម្លាប់មនុស្សយ៉ាងហោច១៤២៧នាក់ ៦២៤នាក់នៅលីបេរីយ៉ា ៤០៦នាក់នៅហ្គីណេ ៣៩២នាក់ នៅសៀរ៉ាឡេអូន និង៥នាក់នៅនីហ្សេរីយ៉ា។
វេជ្ជបណ្ឌិត ដាវីត ណាបារ៉ូ ជាមន្ត្រីអង្គការសហប្រជាជាតិទទួលបន្ទុកយុទ្ធនាការប្រឆាំងជំងឺ អេបូឡា ប្រាប់ថា ការកំចាត់ជំងឺអេបូឡា មិនមែនគ្រាន់តែជាការប្រយុទ្ធធម្មតាទេ តែគឺជាសង្គ្រាមដែលតំរូវអោយគ្រប់គ្នាធ្វើការជាមួយគ្នា ប្រកបដោយប្រសិទ្ធភាព។ យោងតាមវេជ្ជបណ្ឌិតណាបារ៉ូ សង្គ្រាមប្រឆាំងអេបូឡា អាចចំណាយពេលរហូតដល់៦ខែឯណោះ។ បន្ទាប់ពីវាយប្រហារអាហ្វ្រិកខាងលិច ពេលនេះជំងឺអេបូឡាបានបើកឆាកថ្មីនៅតំបន់អាហ្វ្រិកកណ្តាល។ គេបានរកឃើញករណីជំងឺអេបូឡាថ្មីមួយទៀត ក្នុងតំបន់ដាច់ស្រយាល នៅភាគនិរតីសាធារណរដ្ឋប្រជាធិបតេយ្យកុងហ្គោ។
អង្គការសុខភាពពិភពលោក និងអាជ្ញាធរកុងហ្គោគិតដូចគ្នាថា នេះជាករណីអេបូឡាដាច់ដោយឡែក ខុសស្រឡះពីករណីជំងឺដែលកំពុងរាតត្បាតនៅអាហ្វ្រិកខាងលិច។ នៅកុងហ្គោ អាជ្ញាធរកំពុងដាក់អ្នកជំងឺជាង១០នាក់ អោយនៅដាច់ពីគេ។ ហើយអ្នកដែលបានប៉ះពាល់អ្នកជំងឺអេបូឡា ជាង៨០នាក់ទៀត ក៏កំពុងត្រូវគេតាមដានសុខភាពដែរ។ ពេលនេះសាធារណរដ្ឋប្រជាធិបតេយ្យកុងហ្គោ ត្រូវការជំនួយហិរញ្ញវត្ថុ២លានដុល្លារ ពីសហគមន៍អន្តរជាតិ។
