កោះកុង ៖ ចៅហ្វាយខេត្តកោះកុង គឺ ឯកឧត្តម ប៊ុន លើត កាលពីថ្ងៃទី៣០ និង៣១ ខែសីហា កន្លងទៅនេះ បានចុះទៅជួបជាមួយប្រជាពលរដ្ឋដែលមានបញ្ហាដីធ្លីជាមួយក្រុមហ៊ុន SEZ របស់លោកឧកញ៉ា លី យ៉ុងផាត់ និងក្រុមហ៊ុនចិន Union Devolvement នៅឃុំព្រែកខ្សាច់ ស្រុកគីរីសាគរ និងឃុំតានូន ស្រុកបុទុមសាគរ។ នៅក្នុងជំនួបនោះ ក្រុមប្រជាពលរដ្ឋពលរដ្ឋរស់នៅក្នុងឃុំព្រែកខ្សាច់ ស្រុកគិរីសាគរ បានសំណូមពរឲ្យលោកអភិបាលខេត្តជួយអន្តរាគមន៏ក្វៀលដី និងឲ្យពួកគាត់បានចូលទៅដាំដំណាំលើដីស្រែចំការរបស់ពួកគាត់វិញ ដែលកន្លងមកក្រសួងបរិស្ថានបានចុះហត្ថលេខាប្រគល់ទៅឲ្យក្រុមហ៊ុន SEZ របស់លោកឧកញ៉ាលី យ៉ុងផាត់ ធើ្វការវិនិយោគ។
ក្នុងនោះក៏មានប្រជាពលរដ្ឋមួយចំនួនបានទាមទារសំណងពីក្រុមហ៊ុនផងដែរ។ ដោយឡែកនៅក្នុងជំនួបជាមួយប្រជាពលរដ្ឋនៅឃុំតានូន ស្រុកគីរីសាគរ ដែលមានជម្លោះជាមួយក្រុមហ៊ុនចិន Union Devolvement វិញ ពលរដ្ឋសំណូមពរឲ្យលោកអភិបាលខេត្តជួយអន្តរាគមន៏ក្វៀលដីតាមរូបភាពស្បែកខ្លាចេញពីក្រុមហ៊ុនចិននោះ។
ជាការឆើ្លយតបចំពោះសំណើរបស់ប្រជាពលរដ្ឋនេះ ឯកឧត្តម ប៊ុន លើត បានមានប្រសាសន៏ថា ការក្វៀលដី និងចូលទៅដាំដំណាំនៅក្នុងដីដែលបានកាត់ទៅឲ្យក្រុមហ៊ុន គឺជារឿងមួយពិបាក និងត្រូវប្រើពេលវេលាយូរព្រោះអាជ្ញាធរខេត្តត្រូវធើ្វសំណើរទៅក្រសួងបរិស្ថានដើម្បីឲ្យក្រសួងចុះមកសិក្សាឡើងវិញ។ តែចំពោះការទាមទារសំណង អាជ្ញាធរខេត្តអាចជួយសម្រុះម្រួលឲ្យមានការជួបពិភាក្សាគ្នារវាងតំណាងក្រុមហ៊ុនជាមួយបងប្រជាពលរដ្ឋដើម្បីរកដំណោះមួយដែលភាគីទាំងពីរអាចទទួលយកបាន៕
