កំពង់ចាម៖ ភ្ញៀវទេសចរបរទេសជនជាតិអូស្ត្រាលីចំនួន៦នាក់(ស្រី៤នាក់) បានរងរបួសធ្ងន់២នាក់ និងស្រាល៤នាក់ ក្នុងខណៈកំពុងដើរទស្សនាព្រះវិហារវត្តភ្នំហាន់ជ័យ ហើយឈរផ្អែកបង្កាន់ដៃរង់ដារព្រះវិហារបាក់ធ្លាក់មកក្រោមកម្ពស់៤ម៉ែត្រ ។ លោក វរៈសេនិយ៍ត្រី ប៉ាក ជាតិ អធិការនគរបាលស្រុកកំពង់សៀមបានឲ្យដឹងថា ករណីនេះបានកើតឡើងកាលពីវេលាម៉ោង៩និង៤០នាទីព្រឹក ថ្ងៃទី៨ ខែកញ្ញា ឆ្នាំ២០១៤ នៅលើវត្តភ្នំហាន់ជ័យ ឋិតក្នុងភូមិ-ឃុំហាន់ជ័យ ស្រុកកំពង់សៀម ខេត្តកំពង់ចាម ។
ជនរងគ្រោះទាំង៦នាក់ សុទ្ធតែជាជនជាតិអូស្ត្រាលីទាំងអស់ មានឈ្មោះ ១-Ian Nerntosh ភេទប្រុស អាយុ៦៥ឆ្នាំ របួសសន្លាក់ដៃស្តាំ, ២-Steven Bnegess ភេទប្រុស អាយុ៥៦ឆ្នាំ រងរបួសក្បាលជង្គង់ខាងស្តាំ, ៣-Heather Todd ភេទស្រី អាយុ៧៣ឆ្នាំ រងរបួសចង្កេះ, ៤-Christine ភេទស្រី អាយុ៦៣ឆ្នាំ រងរបួស ចង្កេះ និងទ្រូង, ៥-Sandra MC Intosh ភេទស្រី អាយុ៦៥ឆ្នាំ របួសក្បាល និង៦-Menzel ភេទស្រី អាយុ៦៣ឆ្នាំ របួសខ្នង ។
បច្ចុប្បន្ន ជនរងគ្រោះធ្ងន់២នាក់ឈ្មោះ Mr.Ian Nerntosh និង Ms.Christine ត្រូវបានបញ្ជូនតាមរថយន្តពេទ្យទៅសង្គ្រោះនៅមន្ទីរកាល់ម៉ែត ក្នុងរាជធានីភ្នំពេញ ៕ សាន វិឡែម
