ខេត្ដកំពង់ធំ នៅព្រឹកថ្ងៃទី២៦ ខែកុម្ភៈ ឆ្នាំ២០២៣ ឯកឧត្តម សោម ស៊ុន សមាជិកអចិន្ត្រៃយ៍គណបក្សខេត្ត ប្រធានក្រុមការងាររបស់គណបក្សចុះមូលដ្ឋានឃុំបន្ទាយស្ទោង បានដឹកនាំកិច្ចប្រជុំផ្សព្វផ្សាយខ្លឹមសារមហាសន្និបាតវិសាមញ្ញរបស់គណបក្សប្រជាជនកម្ពុជា និងពង្រឹងភារកិច្ចប្រធានក្រុមបក្ស ចំនួន៤ភូមិ គឺភូមិឈើទាល ភូមិគោកសណ្តែក ភូមិស្លាករនិងភូមិកុកគ្រួស ស្ថិតនៅក្នុងឃុំបន្ទាយស្ទោង ស្រុកស្ទោង ខេត្តកំពង់ធំ ដែលពិធីនេះប្រព្រឹត្តទៅនៅវត្តពោធិរោង ស្ថិតនៅក្នុងឃុំបន្ទាយស្ទោង ។
លោក សូត្រ អ៊ុល ប្រធានគណបក្សឃុំ បានឡើងរាយការណ៍អំពីសភាពការណ៍ទូទៅមួយចំនួន ដែលកើតមានឡើងនៅក្នុងឃុំ និងបញ្ជាក់ជូនអំពីបច្ចុប្បន្នភាពរបស់គណបក្ស ការគ្រប់គ្រង និងការកសាងពង្រីកសមាជិកបក្សថ្មី និងការរៀបចំក្រុមបក្សនៅទូទាំងឃុំ ក្នុងចំណោម១៥ភូមិ ដែលមានចំនួន៣៨៣ក្រុមបក្ស ហើយនៅពេលនេះយើងបានដំណើរការជួបជុំប្រធានក្រុមបក្សចំនួន៩៣ក្រុមទៀត ជាលើកទី៤ និងការបញ្ចប់នៃការជួបជុំប្រធានក្រុមបក្សទាំង១៥ភូមិឃុំបន្ទាយស្ទោងតាមការគ្រោងទុក បន្ទាប់ពីបានជួបនិងប្រគល់ភារកិច្ច ជូនប្រធានក្រុមបក្សចំនួន២៩០នាក់ នៅភូមិចំនួន១១ រួចហេីយនៅពេលថ្មីៗកន្លងមកនេះ ដើម្បីពង្រឹងភារកិច្ចរបស់ប្រធានក្រុមបក្សនីមួយៗ ។
ឯកឧត្តម សោម ស៊ុន បានមានប្រសាសន៍ថា ថ្ងៃនេះជាថ្ងៃទី៤នៃការជួបជុំប្រធានក្រុមបក្សទាំង១៥ភូមិដែលមានចំនួន ៣៨៣ ក្រុមបក្សនៅឃុំបន្ទាយស្ទោង និងបានផ្សព្វផ្សាយសេចក្តីសម្រេចចិត្ត និងខ្លឹមសារសំខាន់ៗមួយចំនួនរបស់មហាសន្និបាតវិសាមញ្ញតំណាងទូទាំងប្រទេសរបស់គណបក្សប្រជាជនកម្ពុជា និងផែនការណែនាំឆ្ពោះទៅកាន់ការបោះឆ្នោតជ្រើសតាំងតំណាងរាស្ត្រនីតិកាលទី៧ នៃរដ្ឋសភាដែលនឹងប្រព្រឹត្តទៅនៅថ្ងៃទី២៣ ខែកក្កដា ឆ្នាំ២០២៣ ខាងមុខនេះ។
ជាមួយនេះផងដែរ ឯកឧត្តម សោម ស៊ុន ក៏បានណែនាំអំពីតួនាទីភារកិច្ច ដល់មេក្រុមបក្សទាំងចំនួន៩៣ក្រុមដែលបានចូលរួមក្នុងពិធីនេះ ដោយត្រូវអនុវត្តតាមតួនាទីភារកិច្ចរបស់ខ្លួន ក្នុងការគ្រប់គ្រងសមាជិកបក្ស ទាំងបរិមាណ និងគុណភាព ហើយត្រូវមានឯកសារគ្រប់គ្រាន់ និងជាពិសេសប្រធានក្រុមបក្សនីមួយៗ ត្រូវមានភារកិច្ចដឹកនាំសមាជិករបស់ខ្លួនបានទៅបោះឆ្នោតជូនគណបក្សប្រជាជនកម្ពុជនឲ្យបានគ្រប់ៗគ្នា ដោយអនវត្តន៍ទិសស្លោកសមាជិកបក្សម្នាក់ គឺសន្លឹកឆ្នោតមួយសន្លឹក ។
លោកប្រធានក្រុមបក្សទាំង៩៣ក្រុម ដែលបានអញ្ជើញមកពីភូមិគោកសណ្តែក កុកគ្រួស ស្លាករ និងភូមិឈើទាល បានប្តេជ្ញាចិត្តគោរពអនុវត្តន៍តាមការណែនាំរបស់ឯកឧត្ដមប្រធានក្រុមការងាររបស់គណបក្សប្រជាជនកម្ពុជា ចុះមូលដ្ឋានឃុំបន្ទាយស្ទោង ស្រុកស្ទោង ខេត្តកំពង់ធំ ដេីម្បីបន្តដណ្ដើមយកជ័យជម្នះជាថ្មីទៀតក្នុងការបោះឆ្នោតជ្រើសតាំងតំណាងរាស្រ្តនៅពេលខាងមុខ ។
នៅក្នុងឱកាសនេះផងដែរ ក្រុមការងាររបស់គណបក្សប្រជាជនកម្ពុជាចុះមូលដ្ឋានឃុំបន្ទាយ ស្ទោង បានឧបត្ថម្ភជូនប្រធានក្រុមបក្សទាំង ៩៣ក្រុម ប្រធាននិងអនុប្រធានសាខាបក្សភូមិទាំងបួនភូមិដែលបានអញ្ជើញមកចូលរួមក្នុងពិធីនេះ ដោយក្នុងម្នាក់ៗទទួលបាននូវសារុងចំនួន១ និងថវិកាមួយចំនួនផងដែរ៕
