កំពង់ចាម: អភិបាលនៃគណៈអភិបាលខេត្តកំពង់ចាម ឯកឧត្តម អ៊ុន ចាន់ដា បានអញ្ជើញសម្ពោធដាក់ឱ្យប្រើប្រាស់ជាផ្លូវការនូវអគារសិក្សាថ្មី១ខ្នង ចំនួន៥បន្ទប់ នៃអនុវិទ្យាល័យត្រប់ ស្ថិតក្នុងឃុំត្រប់ ស្រុកបាធាយ នាព្រឹកថ្ងៃទី៤ ខែមេសា ឆ្នាំ២០២៣ ។
ឆ្លៀតក្នុងឱកាសនោះ ឯកឧត្ដមអភិបាលខេត្ត បានថ្លែងថា រាជរដ្ឋាភិបាលកម្ពុជា ក្រោមការដឹកនាំ របស់សម្ដេចតេជោ ហ៊ុន សែន បានយកចិត្តទុកដាក់កែទម្រង់លើវិស័យអប់រំ ជាពិសេស លើគោលនយោបាយ បង្កើនការកសាងអគារសិក្សាឱ្យបានច្រើន និងនៅជិតផ្ទះប្រជាពលរដ្ឋ ងាយស្រួលដល់ពួកគាត់ បញ្ជូនកូនចៅចូលសិក្សារៀនសូត្រ ។ ជាមួយគ្នានោះឯកឧត្តមអភិបាលខេត្ត ក៏បានអំពាវនាវសូមឱ្យមាតា បិតា អាណាព្យាបាលសិស្សទាំងអស់ ជួយជម្រុញ និងលើកទឹកចិត្ត ដល់កូន ចៅរបស់ខ្លួន ឱ្យចូលរៀន ដូចពាក្យស្លោកថា ៖ «ការបញ្ជូនកូន ឱ្យចូលរៀន គឺជាការសន្សំទ្រព្យទុក» ហើយឱ្យកូនរៀន ឱ្យចប់ថ្នាក់បាក់ឌុប និងបន្តការសិក្សា ទៅកម្រិតឧត្ដមសិក្សា ដើម្បី ពួកគាត់ មានឱកាសចូលរួមប្រកួតប្រជែង នៅក្នុងទីផ្សារការងារ ដើម្បី ទទួលបានប្រាក់ខែ យកមកផ្គត់ផ្គង់ជីវភាពគ្រួសារ ក៏ដូចជា ចូលរួមចំណែកកសាងអភិវឌ្ឍប្រទេសជាតិ ឱ្យកាន់តែរីកចម្រើន ផងដែរ ។ 
ឯកឧត្ដម អភិបាលខេត្ត បានបញ្ជាក់ថា អគារសិក្សានេះត្រូវចំណាយ ថវិកាអស់ ៨៥,២៧២ ដុល្លាអាមេរិក ដែលជាគំនិតផ្តួចផ្តើមដឹកនាំកសាងដោយព្រះទេព្វានុបាល ផល សុភាព ព្រះធម្ម ធរអនុគណស្រុក និងជាព្រះចៅអធិការវត្តប្រើមាស រួមជាមួយនឹងពុទ្ធបរិស័ទ សប្បុរសជន ជិតឆ្ងាយ ក្នុងនោះក៏មានជំនួយរបស់សាសនចក្រគ្រិស្តបរិស័ទថ្ងៃចុងក្រោយផងដែរ។ ឯកឧត្ដមបានបន្តថា ការចូលរួមរបស់ព្រះសង្ឃ និងសប្បុរសជនទាំងនេះគឺពិតជាមានសារៈសំខាន់ណាស់ សម្រាប់ការចូលរួមអភិវឌ្ឍសង្គមជាតិ របស់យើង ជាមួយប្រមុខរាជរដ្ឋាភិបាល ដែលមានសម្តេចអគ្គ មហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ជាអគ្គមគ្គុទ្ទេសដ៏ឆ្នើម ៕
