កំពង់ចាម: សំណង់អគារទីស្នាក់ការអនុសាខាកាកបាទក្រហមកម្ពុជា ស្រុកបាធាយ ដែលចំណាយលើការសាងសង់ជាង២០ម៉ឺនដុល្លារ ត្រូវបានសម្ពោធដាក់ឱ្យប្រើប្រាស់ជាផ្លូវការ នាព្រឹកថ្ងៃទី២៧ ខែមិថុនា ឆ្នាំ២០២៣ ក្រោមវត្តមាន ឯកឧត្តមឧបនាយករដ្ឋមន្ដ្រី យឹម ឆៃលី ប្រធានក្រុមប្រឹក្សាស្ដារអភិវឌ្ឍន៍វិស័យកសិកម្ម និងជនបទ និងជាប្រធានក្រុមការងាររាជរដ្ឋាភិបាល ចុះមូលដ្ឋានខេត្តកំពង់ចាម ឯកឧត្តម ប៉ាន សូរស័ក្តិ ប្រធានកិត្តិយសសាខាកាកបាទក្រហមខេត្តកំពង់ចាម និងថ្នាក់ដឹកនាំជាច្រើនរូបទៀត ។
ឯកឧត្តម អ៊ុន ចាន់ដា ប្រធានគណៈកម្មាធិការសាខាកាកបាទក្រហមកម្ពុជាខេត្តកំពង់ចាម បានឱ្យដឹងថា អគារស្នាក់ការអនុសាខានេះ មានទីតាំងនៅភូមិបាធាយ ឃុំបាធាយ ស្រុកបាធាយ ។ ដើមឡើយ ជាដីអាករឃុំ ជាប់នឹងថ្នល់ជាតិលេខ៧ មានជម្រៅ ពី ៤ ទៅ ៦ម៉ែត្រ ។ ដោយមើលឃើញ ពីតម្រូវការចាំបាច់ របស់អនុសាខាស្រុកបាធាយ ដែលពុំទាន់មានទីកន្លែងធ្វើការសមរម្យនោះ ខ្ញុំបាទក៏បានធ្វើការសម្របសម្រួលកាត់ដីទំហំ ៥.000ម៉ែត្រក្រឡា ហើយរៀបចំចាក់ដីបំពេញ អស់រាប់រយពាន់ម៉ែត្រគីប ចំណាយថវិកាប្រមាណជា ១០ម៉ឺនដុល្លារអាមេរិក ដែលបានមកពីការចូលរួមវិភាគទាន ពីឧកញ៉ា ហេង ឡុង អគ្គនាយកក្រុមហ៊ុនចំការកៅស៊ូបឹងកេត លោក ផេន សុផល ប្រធានកិត្តិយសអនុសាខាស្រុក និងសប្បុរសជនមួយចំនួន ។
ព្រមជាមួយនោះ ខ្ញុំបាទក៏បានរៀបចំដំណើរការសាងសង់អគារធ្វើការ ១ខ្នង ផ្ទាល់ដី ទំហំ ៨ម៉ែត្រ×២៤ម៉ែត្រ មានបន្ទប់ធ្វើការ ២ សាលប្រជុំ១ ដោយឯកឧត្តម បាន ចំណាយថវិកាផ្ទាល់ខ្លួនអស់ ចំនួន ៨ម៉ឺនដុល្លារអាមេរិក ។ ទន្ទឹមគ្នានោះដែរ សាខា ក៏បានផ្តល់ថវិកាបដិភាគ ចំនួន ២៦.៩០៧ដុល្លារអាមេរិកទៀត សម្រាប់សង់ក្លោងទ្វារ និងរបងប្រវែង ៥០ម៉ែត្រ រួមជាមួយ បន្ទប់ទឹកដាច់ដោយឡែក ១ខ្នង ២បន្ទប់ ទំហំ ៤,២ម៉ែត្រ គុណនឹង ៦,៣ម៉ែត្រ ។ 
សំណង់ទាំងនេះ បានសាងសង់រួចជាស្ថាពរនៅថ្ងៃទី២៥ ខែមិថុនា ឆ្នាំ២០២៣ ដោយចំណាយថវិកា សរុបចំនួន ២០៦.៩០៧ដុល្លារអាមេរិក ។
ឯកឧត្តមឧបនាយករដ្ឋមន្ត្រី យឹម ឆៃលី បានកោតសរសើរ ចំពោះ គណៈកម្មាធិការសាខា កាកបាទក្រហមកម្ពុជាខេត្តកំពង់ចាម អាណត្តិទី៥ ពិសេស ការខិតខំប្រកបដោយស្មារតីទទួលខុសត្រូវខ្ពស់របស់ ឯកឧត្តម អ៊ុន ចាន់ដា ដែលបានផ្ដួចផ្ដើម និងដឹកនាំកសាងសមិទ្ធិផលថ្មីមួយនេះ ដោយបានបរិច្ចាគនូវថវិកាផ្ទាល់ខ្លួនផង និងប្រើប្រាស់ថវិកាបដិភាគ របស់សាខាផង ហើយថែមទាំង បានចលនាកៀរគរមូលនិធិ ពីសប្បុរសជននានា មានដូចជា ឧកញ៉ា ហេង ឡុង និង លោក ផេនសុផល ជាដើម ចូលរួមវិភាគទានក្នុងស្មារតី នៃវប្បធម៌ចែករំលែក 
ដើម្បី រៀបចំឱ្យអនុសាខាស្រុកបាធាយ មានទីតាំង មានកន្លែងធ្វើការត្រឹមត្រូវ ប្រកបដោយ ផាសុកភាព បង្កលទ្ធភាព ឱ្យស្ថាប័ននេះ បំពេញប្រតិបត្តិការមនុស្សធម៌ក្នុងការជួយសង្គ្រោះ និងជួយដោះស្រាយ សម្រាលទុក្ខលំបាក របស់ប្រជាពលរដ្ឋរងគ្រោះ និងងាយរងគ្រោះ ដែលត្រូវការជំនួយ ជាចាំបាច់ ៕
