ហាណូយ ៖ ធនាគារពិភពលោក (WB) បានព្យាករថា សេដ្ឋកិច្ចរបស់វៀតណាមនឹងកើនទ្បើង៥,៤% ក្នុងឆ្នាំនេះ ដែលជាការបោះជំហានដូចគ្នានឹងឆ្នាំ២០១៣ ជាមួយនឹងកំណើនតិចតួចប៉ុណ្ណោះគឺ៥,៥% និងមានអត្រាទាបជាងអំទ្បុងឆ្នាំ២០០៦-២០១១ ចំនួន៧%។
នៅក្នុងរបាយការណ៍ចុងក្រោយរបស់ខ្លួន ស្តីពីការអភិវឌ្ឍសេដ្ឋកិច្ចក្នុងតំបន់អាស៊ីបូព៌ាធនាគារពិភពលោក បានលើកទ្បើងថា បើទោះជាមានការធ្វើឱ្យប្រសើរទ្បើងនូវស្ថិរភាពម៉ាក្រូសេដ្ឋកិច្ច យ៉ាងណាក្តី កំណើនសេដ្ឋកិច្ចរបស់វៀតណាម នៅតែពុំសូវមានសកម្មភាព ហើយថែមទាំងបន្តស្ថិតនៅក្រោមសក្តានុពលដ៏យូរអង្វែងរបស់ខ្លួនទៀត ផង ។
ការិយាល័យស្ថិតិទូទៅបង្ហាញថា អតិផរណាប្រចាំឆ្នាំរបស់វៀតណាមធ្លាក់ចុះពីអត្រាខ្ពស់២៣% ក្នុងខែសីហា ឆ្នាំ២០១១មក ៤,៣១% ក្នុងខែសីហា ឆ្នាំ២០១៤នេះ និងធ្លាក់ចុះ៣,៦២% ក្នុងខែកញ្ញា ។ កាលពីខែកញ្ញាកន្លងមកនេះ ការិយាល័យស្ថិតិទូទៅបានឱ្យដឹងថា សេដ្ឋកិច្ចរបស់ប្រទេសបានងើបទ្បើងវិញ ក្នុងត្រីមាសទី៣កើនទ្បើង៦,១៩% ធៀបនឹង
កំណើន៥,៤២% ក្នុងត្រីមាសមុន ។ តាមការអះអាងពី WB កំណើនរបស់វៀតណាម ត្រូវបានរារាំងដោយបញ្ហារចនាសម្ព័ន្ធក្នុងសហគ្រាសរបស់រដ្ឋ និងវិស័យធនគារ ស្របពេលដែលភាពទន់ខ្សោយនៃគោលនយោបាយ នៅតែបង្អាក់ដល់ការវិនិយោគឯកជន និងការប្រកួតប្រជែងនៅក្នុងវិស័យគន្លឹះ ។
ជាមួយគ្នានោះ កង្វះនៃការជឿជាក់នៅក្នុងវិស័យឯកជន ក្នុងស្រុកបានបន្តក្លាយជាអ្នកកៀរគរកំណើន ។ ក្នុងនោះធនាគារពិភពលោក បានវាយតម្លៃថា វិស័យឯកជនបរទេសតំណាងឱ្យជិត២០% នៃទិន្នផលសេដ្ឋកិច្ចសរុបរបស់វៀតណាម ឬស្មើនឹង២ភាគ៣នៃចំណូលនាំចេញរបស់ប្រទេសនិង២៥% នៃការវិនិយោគសរុបរបស់ខ្លួន ៕
