សៀមរាប: នគរបាលបេតិកភណ្ឌ កំពុងស្រាវជ្រាវ ស្វែងរកឧក្រិដ្ឋជន ដែលបានធ្វើសកម្មភាព វាយបំផ្លាញយ៉ាងងងើល ទៅលើរូបព្រះ ពុទ្ធ នៅប្រាង្គប្រាសាទកណ្តាល នៃប្រាសាទបាយ័ន ស្ថិតនៅក្នុងសង្កាត់ អង្គរធំ ខេត្តសៀមរាប។ សេចក្តីប្រកាសព័ត៌មាននេះ ចុះថ្ងៃទី១២ ខែតុលា ឆ្នាំ២០១៤
ហើយបានចុះផ្សាយ ក្នុងបណ្តាញរបស់ខ្លួនថា អាជ្ញាធរអប្សរា បានបញ្ជាក់ថា កាលពីម៉ោង ៦ព្រឹក ថ្ងៃទី១០ ខែតុលា ឆ្នាំ២០១៤ កំលាំងនគរបាលបេតិកភណ្ឌ បានអោយដឹងថា មានការបាក់បែករូបព្រះពុទ្ធ នៅប្រាង្គកណ្តាល នៃប្រាសាទបាយ័ន ហើយបានទូរស័ព្ទ ទៅភ្នាក់ងារអាជ្ញាធរអប្សរា អោយមកធ្វើការត្រួតពិនិត្យ ទីតាំងកន្លែងកើតហេតុជាមួយគ្នា។ នៅពេលធ្វើកំណត់ហេតុ មិនបានឃើញភ្ញៀវទេសចរស្រីម្នាក់ ដែលគេតាមរកឡើយ តែបានទទួលព័ត៌មានថា ស្រីបរទេស ដែលគេតាមរកនោះ ត្រូវម្ចាស់ផ្ទះសំណាក់ មកទទួលយកទៅត្រឡប់ទៅវិញហើយ បន្ទាប់ពីសម្ថកិច្ច រកឃើញ ហើយហៅមកសាកសួរ។
ប្រភពព័ត៌មាន បានបន្តថា ចំពោះហេតុការណ៏នេះ អាជ្ញាធរអប្សរា កំពុងសហការជាមួយនគរបាលបេតិកភណ្ឌ និងណគរបាលទេសចរណ៍ ដែលមានភារកិច្ចប្រចាំ តំបន់រមណីយដ្ឋានអង្គរ ដើម្បីស្រាវជ្រាវ ព័ត៌មានលំអិត ពាក់ព័ន្ធទៅនឹងភស្តុតាង ដើម្បីស្វែងរកឧក្រិដ្ឋជន ដែលបានវាយបំផ្លាញ បេតិតភណ្ឌជាតិ យកមកផ្តន្ទាទោស ទៅតាមផ្លូវច្បាប់អោយខានតែបាន។ទន្ទឹមនឹងនេះ អាជ្ញាធរអប្សរា ក៏បានបិទការទស្សនា តួប៉មកណ្តាលប្រាសាទបាយ័ន ជាបណ្តោះអាសន្ន និងយកបំណែកព្រះពុទ្ធនោះ មកសិក្សាជួសជុល ឡើងវិញជាបន្ទាន់ នៅសារមន្ទីរព្រះនរោត្តម សីហនុ អង្គរ ថែមទៀតផង។
សេចក្តីប្រកាសព័ត៌មានខាងលើ បានបញ្ជាក់ដែរថា កាលពីវេលាម៉ោង ៦ ល្ងាច ថ្ងៃទី៩ ខែតុលា ឆ្នាំ២០១៤ បើតាមអ្នករត់រ៉ឺម៉កម៉ូតូម្នាក់ បានរាយការណ៍ជូន សមត្ថកិច្ចនគរបាល ការពារបេតិកភណ្ឌ ប្រចាំការនៅតំបន់ វត្តព្រះអង្គគោកធ្លក ក្បែរប្រាសាទ បាយ័នថា ភ្ញៀវមួយរូបរបស់ខ្លួន ភេទស្រី អាយុ៤០ឆ្នាំ ជាជនជាតិញូហ្សេលែន មិនឃើញតាមការកំណត់ ដែលណាត់ជួប នៅព្រលានជល់ដំរីទេ។
ការស្វែងរកស្ត្រីបរទេស ពេញមួយរាត្រី រហូតដល់ព្រឹកថ្ងៃទី១០ ទើបឃើញគាត់ នៅជ្រុងអាគេ្នយ៏ នៃប្រាសាទបាយ័ន ហើយកំលាំងនគរបាលបេតិកភណ្ឌ ក៏បានអញ្ជើញភ្ញៀវនោះ ទៅសាកសួរព័ត៌មាន។ លុះព្រឹកថ្ងៃទី១០ តុលា នោះដែរ សមត្ថកិច្ចបាន ឃើញរូបព្រះពុទ្ធ នៅប្រាង្គប្រាសាទកណ្តាល នៃប្រាសាទបាយ័ន មានការបាក់បែក ធ្លាក់មកលើគំម្រាលថ្មគួរអោយសោកស្តាយជាប៉ុនពែក។
ទោះបីជាយ៉ាងណា ព័ត៌មាននេះ សមត្ថកិច្ចមិនទាន់ កំណត់មុខសញ្ញាថា អ្នកដែលប្រព្រឹត្ត ជានរណាបានទេ ដោយ គ្រាន់តែបញ្ជាក់ថា កំលាំងសមត្ថកិច្ចកំពុងស្រាវជ្រាវ រកឧក្រិដ្ឋជន ដែលបំផ្លាញរូបព្រះពុទ្ធ យកមក ផ្តន្ទាទោសតាមផ្លូវច្បាប់អោយទាល់តែបាន៕
