ភ្នំពេញ ៖ រថយន្តស្ទូចមួយគ្រឿងបានបើកគៀម៉ូតូសណ្ដោងរ៉ឺម៉កមួយគ្រឿងត្រង់ចំណុចក្រោមស្ពានអាកាសក្បាលថ្នល់ តាមបណ្ដោយផ្លូវព្រះមុនីវង្ស បណ្ដាលអោយស្ត្រីម្នាក់ដែលអង្គុយលើរ៉ឺម៉កធ្លាក់ពីលើរ៉ឺម៉ករងរបួសយ៉ាងដំណំ កាលពីវេលាម៉ោង១០និង១០នាទីយប់ថ្ងៃទី៤ខែមិនាឆ្នាំ២០១៤ ស្ថិតក្នុងសង្កាត់ទន្លេបាសាក់ ខណ្ឌចំការមន។
ប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុគេបានឃើញម៉ូតូសណ្ដោងរ៉ឺម៉កមួយគ្រឿង អត់ស្លាកលេខ ធ្វើដំណើរតាមបណ្ដោយផ្លូវព្រះមុនីវង្ស ពីទិសដៅកើតទៅលិច ខណៈមកដល់ត្រង់ចំណុចក្រោមស្ពានអាកាសក្បាលថ្នល់ក៏មាន រថយន្តស្ទូចមួយគ្រឿងម៉ាកហ៊ីយ៉ាន់ដាយ ក្បាលពណ៌ស ពាក់ស្លាកលេខ ភ្នំពេញ 3B-6164 ដែលធ្វើដំណើរស្របទិសគ្នាបានបើកគៀបណ្ដាលអោយស្ដ្រីម្នាក់ដែលអង្គុយលើ
រ៉ឺម៉ក់ធ្លាក់ពីលើរ៉ឺម៉ករងរបួសយ៉ាងដំណំ។ បន្ទាប់ពីកើតហេតុសមត្ថកិច្ចមូលដ្ឋានបានចុះមកអន្តរាគមន៍និងធ្វើការសម្របសម្រួលដោយភាគីខាងរថយន្តស្ទូចចេញថ្លៃសងការខូចខាតនិងព្យាបាលចំនួន៧០ដុល្លារដើម្បីបញ្ចប់រឿងនៅកន្លែងកើតហេតុដោយមិនរំខានដោយសមត្ថកិច្ចឡើយ៕
