សៀមរាប : ករណីគ្រោះថ្នាក់ចរាចរណ៍ខាងលើបានកើតឡើងកាលពីវេលាម៉ោង ១០ ព្រឹកថ្ងៃទី ២៦ ខែ តុលា នៅត្រង់ចំណុចតាមបណ្តោយផ្លូវជាតិលេខ៦ស្ថិតនៅក្នុងភូមិថ្នល់កែង ឃុំ ស្ពានត្នោត ស្រុកជីក្រែង ខេត្តសៀមរាប ។ ក្រោយកើតហេតុភ្លាមៗកងកម្លាំងសមត្ថកិច្ចនៃអធិការដ្ឋាននគរបាលស្រុកជីក្រែង ខេត្តសៀមរាប បានចុះទៅដល់កន្លែងកើតហេតុដើម្បីធ្វើការវាស់វែង ។ សមត្ថកិច្ចដែលបានចុះទៅដល់កន្លែងកើតហេតុក៏ដូចជាប្រជាពលរដ្ឋដែលបានឃើញហេតុការណ៍នេះបាននិយាយថាករណីគ្រោះថ្នាក់ចរាចរណ៍ខាងលើនេះគឺបណ្តាលមកពីអ្នកបើកបរម៉ូតូដែលបានជិះគ្នាពីរនាក់ខ្វះការប្រុងប្រយ័ត្នក្នុងការបើកបរបានបើកពីទិសខាងកើតមកលិចខុសទិសគ្នាជាមួយរថយន្តដឹកអ្នកដំណើររបស់ក្រុមហ៊ុនមេគង្គអេចប្រេសដែលបានបើកពីសៀមរាបទៅ
ភ្នំពេញនៅពេលដែលមកដល់ត្រង់ចំណុចកើតហេតុស្រាប់តែអ្នកបើកម៉ូតូបានបត់ឆ្លងផ្លូវចំពីមុខរថយន្តក៏ត្រូវរថយន្តក្រុងបុកបណ្តាលអោយបុរសម្នាក់ជាអ្នកបើកម៉ូតូរងរបួសស្រាលចំណែកឯបុរសម្នាក់ទៀតដែលជិះម៉ូតូជាមួយនៅខាងក្រោយរងរបួសធ្ងន់រួចបញ្ជូនមកសង្គ្រោះបន្ទាប់នៅមន្ទីរពេទ្យបង្អែកខេត្តសៀមរាបតែសំណាងមិនល្អបុរសរងរបួសធ្ងន់
ដែលមានអាយុ៥៣ឆ្នាំដែលរស់នៅក្នុងស្រុកជីក្រែងខេត្តសៀមរាបបានស្លាប់តែម្តងបន្ទាប់ពីបានមកដល់មន្ទីរពេទ្យក្នុងថ្ងៃកើតនោះ ។ បច្ចុប្បន្នទាំងម៉ូតូនិងរថយន្តក្រុងត្រូវបានយកមករក្សាទុកនៅអធិការដ្ឋាននគរបាលស្រុកជីក្រែង ខេត្តសៀមរាបដើម្បីចំណាត់ការទៅតាមនិតិវិធីបន្ត ៕ ដោយ ខេង ខេមរា
