ខេត្តតាកែវ៖ ជនសង្ស័យពាក់ព័ន្ធគ្រឿងញៀនខុសច្បាប់ម្នាក់ជាមួយនិងវត្ថុតាងមួយចំនួនធំត្រូវបានកម្លាំងកងរាជអាវុធហត្ថខេត្តតាកែវសហការណ៍ជាមួយកម្លាំងកងរាជអាវុធហត្ថលេីផ្ទៃប្រទេសរាជធានីភ្នំពេញធ្វេីការបង្ក្រាបបាន កាលពីថ្ងៃទី២១ ខែវិច្ឆិកា ឆ្នាំ២០២៤។
ដោយបានការអនុញ្ញាតពីលោកវរសេនីយ៍ទោ សុខ ដារ៉ា មេបញ្ជាការស្ដីទី កងរាជអាវុធហត្ថខេត្តតាកែវ និងមានការសម្របសម្រួលនីតិវិធី ពីលោក ឯក ឆេងហួត ព្រះរាជអាជ្ញាអមសាលាដំបូងខេត្តតាកែវ និងលោក ប្លង់ សុផល ព្រះរាជអាជ្ញារង អមសាលាដំបូងរាជធានីភ្នំពេញ កម្លាំងជំនាញកងរាជអាវុធហត្ថ ខេត្តតាកែវ ដឹកនាំដោយលោកវរសេនីយ៍ឯក កែន វណ្ណៈ មេបញ្ជាការរង និងលោកអនុសេនីយ៍ឯក ហួត វឿន នាយការិយាល័យប្រឆាំងគ្រឿងញៀន បានពន្លាតដែនសមត្ថកិច្ច ទៅរាជធានីភ្នំពេញ ដោយបានសហការជាមួយ កម្លាំងជំនាញកងរាជអាវុធហត្ថលើផ្ទៃប្រទេស និង កម្លាំងជំនាញកងរាជអាវុធហត្ថរាជធានី ភ្នំពេញ ដើម្បីបង្រ្កាបករណីគ្រឿងញៀនខុសច្បាប់។ ជាលទ្ធផល បានឃាត់ខ្លួនជនសង្ស័យបានចំនួន០១នាក់ ឈ្មោះ គង់ ណារ៉ា ហៅ ញ៉ាញ់ ភេទប្រុស អាយុ១៦ឆ្នាំ ជាអ្នកដឹកជញ្ជូន រក្សាទុកជួញដូរគ្រឿងញៀន(មិនចេះប្រើប្រាស់) នៅម៉ោង១៤និ៥៥នាទី ថ្ងៃទី២១ ខែវិច្ឆិកា ឆ្នាំ២០២៤ នៅចំណុចបង្គោលគីឡូម៉ែត្រលេខ ២០ លើផ្លូវជាតិលេខ៣ សង្កាត់ពងទឹក ខណ្ឌដង្កោ រាជធានីភ្នំពេញ ។ ក្នុងនោះបានដកហូតវត្ថុតាងរួមមាន ៖
១.ម្សៅក្រាមពណ៌សថ្លាចំនួន ០១ កញ្ចប់ធំ ទម្ងន់:១០១.៥៦g ថ្លឹងទាំងសំបកថង់ (សង្ស័យជាសារធាតុញៀន)។
២.ទូរស័ព្ទដៃចំនួន ០១គ្រឿងម៉ាកអាយហ្វូន11ប្រូម៉េក។
៣.ម៉ូតូចំនួន ០១គ្រឿង ម៉ាកC125ពណ៌ខ្មៅពាក់ផ្លាកលេខភ្នំពេញ1KP7714។
លុះដល់ម៉ោង ១៧និង០០នាទីថ្ងៃខែឆ្នាំដដែល ផ្អែកតាមចម្លើយសារភាពរបស់ជនសង្ស័យខាងលើ កម្លាំងជំនាញ បាននាំមកចង្អុលបង្ហាញផ្ទះជួល លេខ៣៦E1 ផ្លូវរថភ្លេីង ក្រុម៣៩ ភូមិ ៣ សង្កាត់ស្រះចក ខណ្ឌដូនពេញ រាជធានីភ្នំពេញ បានធ្វើការឆែកឆេរ និងរកឃើញវត្ថុតាងបន្ថែមរួមមាន ៖
១.ប័ណ្ណចាក់វ៉ាក់សាំង ០២ សន្លឹក
២.ប័ណ្ណ ប.ស.ស ចំនួន០២សន្លឹក
៣.សំបុត្របញ្ជាក់កំណើត០១សន្លឹក
៤.សម្ភារ:វេចខ្ចប់គ្រឿងញៀនមួយចំនួន
៥.លោហ:ធាតុពណ៍លឿងមានដាំត្បូងពណ៍ស ក្រហម ខៀវ មួយចំនួន។ ជនសង្ស័យជាម្ចាស់ទីតាំងឈ្មោះ គង់ សុភា ភេទប្រុស អាយុ១៩ឆ្នាំ ត្រូវជាបងបង្កើតរបស់ជនសង្ស័យដែលឃាត់ខ្លួនខាងលើ បានរត់គេចខ្លួន។
បច្ចុប្បន្នជនសង្ស័យរួមទាំងវត្ថុតាង ត្រូវបានកម្លាំងជំនាញនាំមកទីបញ្ជាការ កងរាជអាវុធហត្ថខេត្តតាកែវ ដើម្បីកសាងសុំណុំរឿងបញ្ជូនទៅអយ្យការ អមសាលាដំបូងខេត្តតាកែវ ចាត់ការតាមនីតិវិធី៕
