សៀមរាប៖ទឹកជំនន់កំណាចជនខុសខែរបស់ទំនៀមទំលាប់ខ្មែរ បានធ្វើអោយផ្ទះមួយខ្នងប៉ើងបាត់ស្រមោល និងមួយខ្នងទៀតដាច់ជើងមួយល្វែង តាមការឲ្យដឹងពីលោក ហ៊ុប រក្ស អាយុ២៥ឆ្នាំ និងប្រពន្ធឈ្មោះ ធី ណា រស់នៅលើខ្នងទំនប់៧៨ (ហៅទំនប់សួង) ឃុំអន្លង់សំណរ ស្រុកជីក្រែង ខេត្តសៀមរាប ជាម្ចាស់ផ្ទះដែលត្រូវបានទឹកជំនន់ធ្វើអោយប៉ើងបាត់ និយាយថា ពួកគាត់ក្រីក្រណាស់ រកស៊ីមុខរបររាយមោង ធ្វើប្រហុក ហើយនិងប្រពន្ធមានផ្ទៃពោះ នៅយប់ថ្ងៃទី០១ ខែវិច្ឆិកា ឆ្នាំ២០១៤ នៅវេលាម៉ោង១០.០០យប់ ដោយឃើញស្ថានភាពទឹកជំនន់ខ្លាំងហូរដាច់ត្រង់ផ្ទះរបស់ពួកគាត់ពួកគាត់បានស្រែកអោយអ្នកជិតខាងជួយជញ្ជួនឥវ៉ាន់ចេញពីផ្ទះ។
ពុំទាន់ជញ្ជួនឥវ៉ាន់អស់ផងស្រាប់តែទឹកជំនន់ដ៏កំណាចបានឆក់យកផ្ទះរបស់គាត់បាត់ស្រមោលចំណែកឯលោក ជ្រឹង ម៉ៅ អាយុ២៨ឆ្នាំ និងអ្នកស្រី មីង ជី បាននិយាយនៅព្រឹកថ្ងៃទី០៤ ខែឆ្នាំដដែលថា៖ ផ្ទះរបស់ពួកគាត់កុំតែបានអ្នកជិតខាងជួយយកខ្សែចង កុំអីប៉ើងបាត់ដូចផ្ទះរបស់លោក ហ៊ុប រក្ស ដែរម្យ៉ាងវិញទៀតនៅពេលនេះ ទឹកជំនន់នៅតែគំរាមផ្ទះរបស់គាត់នៅឡើយ។
ប្រជាពលរដ្ឋរស់នៅទំនប់សួងបាននិយាយថា៖ នៅពេលដែលពួកគាត់ឃើញទឹកជំនន់មានកម្លាំងខ្លាំង ពួកគាត់បានទៅបើកសន្ទះលូធំ ប៉ុន្តែត្រូវបានហាមឃាត់ដោយលោក ធី រស់នៅភូមិត្រពាំងត្រស់ ឃុំអន្លង់សំណរ ជាអ្នកកាន់កាប់លូខាងកើត និងម្នាក់ទៀតឈ្មោះ ព្រាប រស់នៅភូមិព្រែកអង្គរ ជាអ្នកកាន់កាប់លូខាងលិច មិនអោយពួកគាត់បើកព្រោះខ្លាចអត់ទឹកធ្វើស្រែប្រាំង ប្រសិនបើអោយពួកគាត់បើកសន្ទះលូទាងពីរចាំទឹកស្រកបន្តិច ចាំបិតលូទៅវិញទំនប់មិនអាចធ្លុះធ្លាយបានឡើយ ទឹកក៏មិនអស់ ប៉ុន្តែដោយសារតែ លោក ធី ហើយនិង លោកព្រាប ជាកសិករស្ទើរបច្ចេកទេស ទើបដាច់ទំនប់។
ដោយ អ៊ុក ផ្លុង
