កំពង់ចាម: គម្រោងពង្រីក និងលើកកម្ពស់កម្រិតផ្លូវជាតិលេខ៧ ជាបួនគន្លង (ស្គន់-កំពង់ចាម)គិតមកដល់ត្រឹមខែកុម្ភៈ ឆ្នាំ២០២៥នេះការស្ថាបនាសម្រេចបានប្រមាណជាង៣០%ហេីយ។
បេីតាមលោក សុខ លឹមហៀង ប្រធានមន្ទីរសាធារណការ និងដឹកជញ្ជូនខេត្តកំពង់ចាម បានបញ្ជាក់ប្រាប់នៅថ្ងៃទី៤ ខែកុម្ភៈ ឆ្នាំ២០២៥នេះថា គម្រោងពង្រីកលើកកម្ពស់កម្រិតគុណភាព ផ្លូវជាតិលេខ ៧ ជាបួនគន្លង (ស្គន់-កំពង់ចាម) ចំណុចចាប់ផ្ដើមពីរង្វង់មូលស្គន់ ស្រុកជើងព្រៃ និងចំណុចបញ្ចប់នៅរង្វង់មូលត្រើយខាងលិចស្ពានគីហ្សូណា ក្រុងកំពង់ចាម ដែលមានប្រវែងសរុប ៤៥,៥០៤ គីឡូម៉ែត្រ។ លោកប្រធានមន្ទីរបានបន្ថែមទៀតថាគិតដេីមខែកុម្ភៈ ឆ្នាំ២០២៥នេះ ក្រុមការងារនៃក្រុមហ៊ុនCRBC បានស្ថាបនាសម្រេចបានប្រមាណជាង៣០%ហេីយ ខណៈតំបន់ខ្លះត្រូវបានក្រាលថ្មមិចជាបណ្តេីរៗហេីយ។
ទន្ទឹមនឹងនេះដែរ លោក សុខ លឹមហៀង ប្រធានមន្ទីរសាធារណការ និងដឹកជញ្ជូនខេត្តកំពង់ចាម ក៍បានអំពាវនាវបន្ថែមដល់អាជ្ញាធរមូលដ្ឋាន ក៏ដូចជាបងប្អូនប្រជាពលរដ្ឋ ដែលរស់នៅក្នុងអមសងខាងផ្លូវជាតិលេខ៧នេះ សូមចូលរួមសហការគ្នានិងមេត្តាយោគយល់អធ្យាស្រ័យ ចំពោះក្រុមហ៊ុនដែលស្ថាបនាពង្រីកលើកកម្ពស់កម្រិតគុណភាព ផ្លូវជាតិលេខ៧ ជាបួនគន្លងនេះ ពោលគឺធ្វេីយ៉ាងណាដេីម្បីពន្លឿនការងារស្ថាបនានេះឲ្យបានលឿនតាមការគ្រងទុក ដែលជាការផ្តល់អត្តប្រយោជន៍យ៉ាងច្រេីនដល់ការធ្វេីដំណេីរ និងរស់នៅប្រចាំថ្ងៃរបស់បងប្អូនប្រជាពលរដ្ឋក្នុងនាពេលអនាគត៕
