ភ្នំពេញ៖ របាំងថ្មចែកទ្រូងផ្លូវមួយកន្លែងស្ថិតនៅចំណុចមុខមជ្ឃមណ្ឌលរ៉ក់ តាមបណ្តោយផ្លូវព្រះមុន្នវង្ស ក្នុងសង្កាត់បឹងត្របែក ខណ្ឌចំការមន ត្រូវរថយន្តមួយគ្រឿងម៉ាកកូរ៉ូឡាបើកបរដោយបុសរម្នាក់ស្ថិតក្នុងស្ថានភាព ស្រវឹង បានរេចង្កូតបុកពេញទំហឹងបណ្តាលឲ្យរថយន្តរងការខូចខាតយ៉ាងដំណំ។ ហេតុការណ៍គ្រោះថ្នាក់ ចរាចរណ៍ខាងលើនេះ កើតឡើងកាលពីវេលាម៉ោង២៣និង២០នាទីយប់ថ្ងៃទី៩ កុម្ភះ ឆ្នាំ២០១៤។ យោងតាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុគេឃើញមានបុរសម្នាក់ ជិះ រថយន្តមួយគ្រឿងម៉ាកកូរ៉ូឡា ពណ៌ស្ករ ពាក់ស្លាកលេខភ្នំពេញ 2L-9927 ។
បើកបរក្នុងស្ថានភាពស្រវឹង ជោគជាំ តាមបណ្តោយផ្លូវព្រះមុន្នីវង្ស ទិសដៅពីជើងទៅត្បូង លុះមកដល់ចំណុចកើតហេតុខាងលើ រថយន្តក៏ស្រាប់តែរេចង្កូតទៅបុកក្បាលនាគចែកទ្រូងផ្លូវពេញទំហឹងបណ្តាលឲ្យរថយន្តរងការខូចខាតយ៉ាងដំណំ និងបណ្តាលឲ្យក្បាលនាគរងការខូច ខាតអស់ចំនួនមួយកង់។ ហើយក្រោយពីរថយន្តបានបុកក្បាលនាគ ហើយម្ចាស់រថយន្តបានចេញពីរថយន្តហើយគេចខ្លួន បាត់ស្រមោលឈឹង ទុកតែរថយន្តនៅកន្លែងកើតហេតុ តែប៉ុណ្ណោះ។
ក្រោយកើតហេតុសមត្ថកិច្ចមូលដ្ឋានបានសហការជាមួយសមត្ថកិច្ចជំនាញចុះធ្វើការអន្តរាគមន៍ ស្ទូចយករថយន្ត បង្កខាងលើទៅរក្សាទុកនៅការិយាល័យចរាចរណ៍ជើងគោករាជធានីភ្នំពេញ រងចាំដោះស្រាយនៅពេលក្រោយ៕ 
