កំពង់ចាម: ឯកឧត្ដម ខ្លូត ផន ប្រធានក្រុមប្រឹក្សាខេត្ត និង ឯកឧត្ដម អ៊ុន ចាន់ដា អភិបាលខេត្តកំពង់ចាម នាព្រឹកថ្ងៃទី២១ ខែកក្កដា ឆ្នាំ២០២៥នេះ បាននាំយកទៀនចំណាំព្រះវស្សា ទេយ្យទាន និងបច្ច័យ ប្រគេនដល់ព្រះសង្ឃ ចំនួន ៤វត្ត ស្ថិតនៅក្នុងក្រុងកំពង់ចាម រួមមាន វត្តខេមវ័នបឹងស្នាយ វត្តសុទស្សនារាមជ្រោយថ្ម
វត្តបុទុមតរនៈតីដុះ និងវត្តជោតនារាមបឹងកុក ដោយក្នុង ១វត្តៗ ទៀនវស្សាក្បាច់ ១គូ អង្ករ ១០០គីឡូក្រាម មី ១កេសធំ ទឹកបរិសុទ្ធ ៥កេស ទឹកត្រី ៥កេស ទឹកស៊ីអ៊ីវ ៥កេស ត្រីខ ១កេស ទឹកដោះគោខាប់ ១កេសធំ ទឹកក្រូច ១០កេស តែ ៥គីឡូក្រាម ស្ករស ៥គីឡូក្រាម និងបច្ច័យចំនួន ៣លាន និង ១៦ម៉ឺនរៀល ។
ដោយឡែកព្រះសង្ឃ ចំនួន ៧អង្គ ក្នុង ១អង្គ ប្រគេនទេយ្យវត្ថុ ១ បច្ច័យ ១០ម៉ឺនរៀល ចង្ហាន់ ១ស្រាក់ និងផ្លែឈើ ១កន្ក្រក់ផងដែរ ។
ក្នុងឱកាសនោះ ឯកឧត្តម ខ្លូត ផន ឯកឧត្តម អ៊ុន ចាន់ដា និងថ្នាក់ដឹកនាំជាច្រើនរូបទៀត បានអុជធូបថ្វាយបង្គំព្រះរតនត្រ័យ និងវេរប្រគេនទានព្រះវស្សា និងទ័យវត្ថុ ដល់ព្រះសង្ឃ ទៅតាមកិច្ចសាសនា ដោយបានឧទ្ទិសបួងសួង សុំឲ្យវត្ថុសក្តិសិទ្ឋិ សូមជួយថែរក្សាប្រទេសកម្ពុជា ឲ្យមានភាពរីកចំរើន មានសន្តិភាព គង់វង្សជានិរន្តរ៍ តរៀងទៅអនាគត ។
បន្ទាប់មកព្រះសង្ឃ ក៏បានធ្វើបទនមសក្ការប្រោះព្រំឲ្យពរឲ្យជ័យ សេរីសួស្តី ជ័យមង្គលជូនដល់ ឯកឧត្តម លោកជំទាវ និងលោក លោកស្រី ពុទ្ធបរិស័ទ ពិសេស បានឧទ្ទិសកុសលដល់បុព្វការីជន មានមាតា បិតា ជីដូនជីតា ញាតិ្តការទាំង ៧សណ្ដាន ព្រមទាំង ឧទ្ទិសបុណ្យកុសលដល់វីរៈយុទ្ឋជន យុទ្ឋនារី ដែលបានលះបង់ជីវិតក្នុងបុព្វហេតុជាតិ មាតុភូមិ ផងដែរ ។
គួរកត់សម្គាល់ដែរថា តាមទំនៀមទម្លាប់ប្រពៃណីព្រះពុទ្ឋសាសនា ក្នុង ១ឆ្នាំ ព្រះសង្ឃត្រូវគង់ចាំព្រះវស្សាចំនួន ៣ខែ ក្នុងទីវត្តអារាម គឺ ចាប់ពីថ្ងៃទី១រោច ខែអាសាឍ ដល់ថ្ងៃ១៥កើត ខែអស្សុជ ដោយមិនអាចនិមន្តបិណ្ឌបាតទៅទីណាឡើយ ។ ហេតុដូចនេះហើយ ទើបពុទ្ធបរិស័ទដែលមានសទ្ឋាជ្រះថ្លាក្នុងព្រះពុទ្ឋសាសនា តែងប្រគេនទានព្រះវស្សា និងទ័យវត្ថុផ្សេងៗ ទៅកាន់ទីវត្តអារាម ដើម្បី ព្រះសង្ឃបានអុជបំភ្លឺ និងមានចង្ហាន់ របស់របរប្រើប្រាស់ ក្នុងកំឡុងពេលកាន់ព្រះវស្សា ៣ខែ នេះ ៕
