ភ្នំពេញ៖ យុវជនម្នាក់ស្រវឹងស្រាបើកម៉ូតូសេ១២៥ ក្នុងល្បឿនលឿនជ្រុលចង្កូតទៅបុកបង្គោលភ្លើង ពេញទំហឹង បណ្តាលឲ្យរងរបួសក្បាលធ្ងន់ធ្ងរត្រូវបញ្ចូនទៅសង្គ្រោះនៅមន្ទីរពេទ្យភ្លាមៗ កាលពីវេលាម៉ោង ២២និង៣០នាទីយប់ថ្ងៃទី ៩ កុម្ភះ ឆ្នាំ២០១៤ ស្ថិតតាមបណ្តោយផ្លូវព្រះមុន្នីវង្ស ក្នុងសង្កាត់ផ្សារដើមថ្កូវ ខណ្ឌចំការមន។ តាមសាក្សីនៅដែលបានឃើញហេតុការណ៍បានឲ្យដឹងថា នៅមុនពេលកើតហេតុគេឃើញមានបុរសម្នាក់ ជិះម៉ូតូ មួយគ្រឿងម៉ាកសង់សេ១២៥ ស៊េរី ឆ្នាំ២០១៣ ពណ៌ខ្មៅ ពាក់ស្លាកលេខភ្នំពេញ 1CC-1229 បើកបរ តាមបណ្តោយផ្លូវ ព្រះមុន្នីវង្ស ទិសដៅពីជើងទៅត្បូង ក្នុងល្បឿនយ៉ាងលឿន
លុះមកដល់ចំណុចកើតហេតុ ខាងលើក៏ស្រាប់តែរេចង្កូតទៅ បុកបង្គោលភ្លើងដែកដែលនៅតាមបណ្តោយផ្លូវព្រះមុន្នីវង្ស ពេញទំហឹង បណ្តាលឲ្យម៉ូតូគៀបជាប់ជាមួយបង្គោលភ្លើង និងមនុស្សរងរបួសធ្ងន់ធ្ងរត្រូវរថយន្តសាមុយមកដឹកយកទៅ សង្គ្រោះនៅមន្ទីរពេទ្យភ្លាមៗ។ ក្រោយកើតហេតុសមត្ថកិច្ចមូលដ្ឋានបានចុះអន្តរាគមន៍ លើកយកម៉ូតូជនរងគ្រោះខាងលើទៅរក្សាទុកនៅ អធិការដ្ឋាននគរបាលខណ្ឌចំការមនរងចាំដោះស្រាយនាពេលក្រោយ៕ 
