ខេត្តឧត្តរមានជ័យ៖ ក្រុមអនុព័ន្ធយោធាបរទេសប្រចាំកម្ពុជា (MACPP) ដែលមាននិវេសនដ្ឋានស្ថិតក្នុង និងក្រៅប្រទេសកម្ពុជា ១៤រូ ប មកពី ៩ប្រទេស បានចុះទៅកាន់ខេត្តឧត្តរមានជ័យ ដើម្បីពិនិត្យស្ថានភាពជាក់ស្ដែង ដែលទាហានថៃបានផ្លោងគ្រាប់ចូល និងជំរុំភៀសសឹក ស្ថិតក្នុងភូមិសាស្រ្តស្រុកបន្ទាយអំពិល ខេត្តឧត្តរមានជ័យ នាព្រឹកថ្ងៃទី១០ ខែសីហា ឆ្នាំ២០២៥។
ក្រុមអនុព័ន្ធយោធាទាំង ១៤រូប មកពី ៩ប្រទេស រួមមាន៖ ប្រទេសអូស្ត្រាលី ចក្រភពអង់គ្លេស កាណាដា ចិន បារាំង ជប៉ុន កូរ៉េខាងត្បូង ឡាវ និងប្រទេសវៀតណាម បានចុះពិនិត្យជាក់ស្តែង ការអនុវត្តបទឈប់បាញ់ នៅវត្តតាមាន់សែនជ័យ សាលារៀន មណ្ឌលសុខភាព ទីតាំងគ្រាប់មិនទាន់ផ្ទុះ MK 84 និងជំរុំភៀសសឹកនៅវត្តភ្នំថ្មកំបោរ ស្ថិតក្នុងបន្ទាយអំពិល ខេត្តឧត្តរមានជ័យ។
គួរបញ្ជាក់ថា បេសកកម្ម និងសកម្មភាពនេះ បានកើតចេញពីលទ្ធផលដែលបន្តពីកិច្ចប្រជុំពិសេស និងកិច្ចប្រជុំវិសាមញ្ញ គណៈកម្មាធិការព្រំដែនទូទៅកម្ពុជា-ថៃ (GBC)កាលពីថ្ងៃទី៧ ខែសីហា ឆ្នាំ២០២៥ បានឯកភាពគ្នាអនុវត្តឱ្យបានពេញលេញនូវបទឈប់បាញ់ ដែលសម្រេចបានកាលពីថ្ងៃទី២៨ ខែកក្កដា ឆ្នាំ២០២៥ នៅទីក្រុងភូត្រាចាយ៉ា ប្រទេសម៉ាឡេស៊ី។
ស្របពេលជាមួយនឹងកិច្ចព្រមព្រៀងបទឈប់បាញ់ រវាងកម្ពុជា-ថៃនោះ កម្ពុជាបានប្តេជ្ញាចិត្តយ៉ាងមុតមាំក្នុងការបំពេញការងារប្រកបដោយស្មារតីស្ថាបនា ភាពស្មោះត្រង់ និងសហការយ៉ាងជិតស្និទ្ធជាមួយប្រទេសថៃ ម៉ាឡេស៊ី បណ្តាប្រទេសសមាជិកអាស៊ានដទៃទៀត និងដៃគូពាក់ព័ន្ធទាំងអស់ ដើម្បីធានាការអនុវត្តបទឈប់បាញ់ ប្រកបដោយប្រសិទ្ធភាព និងពេញលេញ និងដោះស្រាយរាល់វិវាទដោយសន្តិវិធី ស្របតាមច្បាប់អន្តរជាតិ ធម្មនុញ្ញអង្កការសហប្រជាជាតិ និងធម្មនុញ្ញអាស៊ាន។
នៅក្នុងឱកាសចុះពិនិត្យកាកសំណល់សង្គ្រាម (២៤-២៨កក្កដា២០២៥) នោះ មេបញ្ជាការកងពលតូចថ្មើរជើងលេខ៤២ លោកឧត្តមសេនីយ៍ត្រី នាក់ វង្ស ក៏បានបញ្ជាក់ប្រាប់ អនុព័ន្ធយោធាទាំង ៩ប្រទេស ឱ្យបានដឹងពីទង្វើ និងសកម្មភាពទាហានថៃ ដែលបានប្រើប្រាស់ជំពាមបាញ់ជាង ១០០គ្រាប់ សំដៅមកកាន់ប្រាសាទតាមាន់ ក៏ប៉ុន្តែ កងទ័ពកម្ពុជាមិនបានតបតវិញនោះឡើយ៕ដោយ៖ឡុង សំបូរ
