នគរបាលនៃស្នងការដ្ឋាននគរបាល ខេត្តតាកែវ មានមន្ត្រីតាមការិយាល័យជំនាញទាំង៣០ និងអធិការដ្ឋាននគរបាលគ្រប់ស្រុក ក្រុង ត្រូវបានបំពេញបែបបទបើកគណនី ដើម្បីបើកប្រាក់បៀវត្សរ៍ តាមប្រព័ន្ធធនាគារ អេស៊ីលីដា និងធនាគារ កាណាឌីយ៉ាលើកទី១ ។ ការបំពេញ
បែបបទ បើកគណនីតាមប្រព័ន្ធធនាគារ គឹជួយបោសសំអាតអំពើពុករលួយ នៅក្នុងអង្គភាព ជាពិសេសបានជៀសវៀងនូវការចោទប្រកាន់ថា កន្លងមកមានលាក់ខ្មោចជាងមួយរយនាក់ ទុកស៊ីបន្តទៀត ។
លោកវរៈសេនីយឯក ពៅ លន់ នាយការិយាល័យបុគ្គលិក បានអោយដឹងថា ក្របខ័ណ្ឌដែលត្រូវបើកគណនីតាមប្រព័ន្ធធនាគារ មានសរុប១៩៣៧នាក់ មានស្រីចំនួន៣៤នាក់ ក្របខ័ណ្ឌវរសេនាតូច៦០៣ ចំនួន២៧៣នាក់ ស្រី១នាក់ ។
លោក ពៅ លន់ បានបន្តទៀតថា នៅលើកទី១នេះ មន្ត្រីនគរបាលវរៈសេនាតូច៦០៣ ចំនួន២៧៣នាក់ មិនទាន់បានធ្វើបែបបទទេ ធ្វើតែមន្ត្រីនគរបាល នៅស្នងការដ្ឋាននគរបាលខេត្ត និងអធិការដ្ឋានស្រុក និងក្រុងទេ មានចំនួន១៦១៧នាក់តែប៉ុណ្ណោះ ។
ចំពោះមន្ត្រីនគរបាល ចំនួន១៦១៧នាក់ ដែលមកធ្វើបែបបទ មានចំនួន៤៧អ្នក អវត្តមាន ក្នុងនោះអវត្តមានមាន មូលហេតុចំនួន៣៨នាក់ ។ ក្នុងនោះចូលនិវត្ត៦នាក់ . មរណៈភាព១៤នាក់ . ផ្ទេរចេញ៤នាក់ . ទៅរៀន៦នាក់ . ព្យួរឈ្មោះ២នាក់ . សំណើរកាត់បន្ថយ៤នាក់ . ត្រូវវិន័យ១នាក់ . ជាប់ពន្ធធនាគារ១នាក់ . អវត្តមានគ្មានមូលហេតុ ចំនួន៩នាក់ ។
លោកឧត្តមសេនីយត្រី អ៊ុក សំណាង ស្នងការនគរបាលខេត្ត បានមានប្រសាសន៍ថា ការធ្វើបែបបទបើកគណនីបើកប្រាក់បៀវត្សរ៍ តាមប្រព័ន្ធធនាគារខាងលើ បើពិនិត្យទៅរកឃើញថា មានលាក់ខ្មោចទុកស៊ីកិបកេង ធ្វើអោយខាតថវិការរដ្ឋបុគ្គលនោះ ត្រូវទទួលខុសត្រូវចំពោះមុខច្បាប់ ហើយត្រូវប្រមូលលុយ ដែលកិបកេងទាំងអស់នោះ មកប្រគល់វិញអោយគ្រប់ចំនួនវិញ ៕
