សៀមរាប កាលពីរសៀលថ្ងៃទី ០១ ខែ ធ្នូ ឆ្នាំ២០១៤ លោកស៊ិន រុន អភិបាលរងនៃគណៈអភិបាលខេត្តសៀមរាប បានអនុញ្ញាតឲ្យគណៈប្រតិភូក្រុមប្រឹក្សាសហព័ន្ធនៃសភាសហព័ន្ធរុស្ស៊ីដឹកនាំដោយលោកអ៊ីវហ្គើនី ហ្ស៊េរីប្រេនីកូវ អនុប្រធានទី១ គណៈកម្មាធិការការពារ និង សន្តិសុខជាតិ នៃសភាសហព័ន្ធរុស្ស៊ី និង សហការី ចូលជួបសម្តែងការគួរ សម និងពិភាក្សា នៅរដ្ឋបាលសាលាខេត្តសៀមរាប ដោយមានអសលោកជាថ្នាក់ដឹកនាំមន្ទីរ អង្គភាពចូលរួមផងដែរ ។
ក្នុងកិច្ចស្វាគមន៍របស់លោកស៊ិន រុន ក៏បានលើកឡើងថា ដំណើរបំពេញទស្សនកិច្ចនៅលើទឹកដីប្រវត្តិសាស្ត្រ បានធ្វើឲ្យចំណងមិត្តភាពនៃប្រទេសទាំងពីរ កាន់តែនៅជិតស្និតនឹងគ្នា ។ ឯកឧត្តមក៏បានសម្តែងអំណរគុណដល់រដ្ឋាភិ បាល និង ប្រជាជន នៃសហព័ន្ធរុស្ស៊ី ដែលបានចូលរួមស្តារ និង អភិវឌ្ឍន៍មាតុភូមិកម្ពុជា ឲ្យមានការរីកចម្រើនលើគ្រប់ វិស័យ ព្រមទាំងគាំទ្រនយោបាយ ការទូត ចំពោះឯករាជ្យ សន្តិភាព អធិបតេយ្យភាពជាតិ និង ការបង្រួបបង្រួមជាតិនៅ កម្ពុជាគ្រប់កាលៈទេសៈ។លោកក៏បានលើកឡើងពីស្ថានភាពភូមិសាស្ត្រសន្តិសុខសេដ្ឋកិច្ច ជីវភាពរស់នៅរបស់ប្រជាជនខេត្ត សៀមរាប ដោយបានផ្អែកលើវិស័យសេដ្ឋកិច្ចទេសចរណ៍ និង កសិកម្ម ។ លោក ស៊ិន រុនក៏បញ្ជាក់ជូនគណៈប្រតិភូ អំពីកំណើននៃភ្ញៀវទេសចរណ៍ដែលបានចូលមកទស្សនាកម្សាន្តនៅខេត្តសៀមរាប រយៈពេល១១ខែឆ្នាំ២០១៤មានចំនួន៤លាន៥០៥ពាន់៤៩៩នាក់ព្រមទាំងហេដ្ឋារចនាសម្ព័ន្ធ លើសេវាកម្មទេសចរណ៍
ផងដែរ។ ឯកឧត្តម បានបន្តទៀតថា ក្រោមគោលនយោបាយឈ្នះៗរបស់រាជរដ្ឋាភិបាល ដែលមានសម្តេចតេជោ ហ៊ុន សែន នាយករដ្ឋមន្ត្រី បានធ្វើឲ្យខេត្តសៀមរាប មានកិច្ចអភិវឌ្ឍន៍រីកចម្រើនលើគ្រប់វិស័យ លើហេដ្ឋារចនាសម្ព័ន្ធរូបវ័ន្ត បរិស្ថាន អនាម័យ ក្នុងគោលដៅធ្វើឲ្យក្រុងសៀមរាប មានលក្ខណៈបីយ៉ាង ( ទីក្រុងស្អាត រមណីយដ្ឋានស្អាតសេវាល្អ)ហើយបានកំពុងទាក់ ទាញអារម្មណ៍ភ្ញៀវទេសចរណ៍ចូលមកទស្សនាកម្សាន្តយ៉ាងច្រើនទៀតផង។ ក្នុងនោះដែរលោក ក៏សុំឲ្យគណៈប្រតិភូ នៅពេលធ្វើមាតុភូមិនិវត្តទៅកាន់មាតុប្រទេសវិញសូមធ្វើការផ្សព្វផ្សាយដល់ប្រជាជនសហព័ន្ធរុស្ស៊ី ដែលមានបំណងចង់ មកវិនិយោគនៅកម្ពុជា ពិសេសនៅខេត្តសៀមរាប ព្រមទាំងមកធ្វើទេសចរណ៍ផងដែរ ។
លោកអ៊ីវហ្គើនី ហ្ស៊េរីប្រេនីកូវ ក៏បានធ្វើការកោតសរសើពីភាពរីកចម្រើននៅកម្ពុជា ពិសេសនៅខេត្ត សៀមរាប បានកំពុងទាក់ទាញនូវភ្ញៀវទេសចរណ៍មកពីគ្រប់មជ្ឈដ្ឋានលើសកលលោក ដោយខេត្តសៀមរាប សម្បូរទៅ ដោយសម្បត្តិវប្បធម៌ ប្រាង្គប្រាសាទបុរាណដ៏ល្បីល្បាញ រន្ទឺលើលោកយើងនេះ ។ លោកក៏បានគូសបញ្ជាក់ថា ដំណើរ ទស្សនកិច្ចនៅលើទឹកដីប្រវត្តិសាស្ត្រនេះ ជាលើកទី១ហើយ ក្នុងការស្វែងយល់អំពីសក្តានុពលលើវិស័យសេដ្ឋកិច្ចនៅ កម្ពុជា។ក្នុងនោះដែរលោកក៏បានបញ្ជាក់ពីគោលបំណង ចង់ធ្វើយ៉ាងណាឲ្យប្រទេសទាំងពីរឆ្ពោះទៅកាន់ការរីកចម្រើនប្រកបដោយប្រសិទ្ធភាពរវាងប្រទេសទាំងពីរ។ លោកអ៊ីវហ្គើនីហ្ស៊េរីប្រេនីកូវក៏បានលើកឡើងផងដែរអំពីវិស័យការពារជាតិគឺសហព័ន្ធរុស្ស៊ី មានបទពិសោធន៍ខ្ពស់ហើយពេលនេះជាការពិភាក្សាជាមិត្តភាពរវាងប្រទេសទាំងពីរ។ ឯកឧត្តមក៏បានកោតសរសើពីសម្បត្តិវប្បធម៌ដ៏សម្បូរបែប នៅលើទឹកដីប្រវត្តិសាស្ត្រសៀមរាប សម្បូរទៅដោយ ប្រាង្គប្រាសាទល្បីៗ ហើយត្រូវបានសហព័ន្ធរុស្ស៊ី បានកំពុងចាប់អារម្មណ៍មកតំបន់អាស៊ី សំខាន់នៅកម្ពុជា គឺខេត្តសៀមរាប ដែលជាជង្រុកសេដ្ឋកិច្ចមិនចេះរីងស្ងួត របស់ព្រះរាជាណាចក្រកម្ពុជាទៀតផង ។ ក្នុងនោះលោក នឹងពាំនាំនូវសំណូមពររបស់អាជ្ញាធរខេត្តដើម្បីធ្វើការជម្រុញដល់អ្នកវិនិយោគនិងប្រជាជនសហព័ន្ធរុស្ស៊ី ចូលមកធ្វើទេសចរណ៍ នៅកម្ពុជា សំខាន់នៅខេត្តសៀមរាប ៕
