ក្រោយពីសមត្ថកិច្ចបានធ្វើការកោះហៅលោកឧកញ៉ា ថោង សារ៉ាត់ ដើម្បីធ្វើការសាកសួរ ពាក់ព័ន្ធនឹងការណីឃាតកម្មលើលោកឧកញ៉ា អ៊ឹង ម៉េងជឺ ត្រូវបានឪពុកម្ដាយលោកឧកញ៉ា ថោង សារ៉ាត់ ចេញមុខធ្វើសន្និសីទកាសែតជំនួស ដើម្បីលាងកិត្ដិយសកូនប្រុសរបស់ខ្លួន និងបានអះអាងថា ស្នងការនគរបាលរាជធានីភ្នំពេញ ឯកឧត្តម ជួន សុវណ្ណ បានបញ្ជាឱ្យ ចាប់ខ្លួនលោកឧកញ៉ា ថោង សារ៉ាត់ ដោយឡែកឯកឧត្តម ជួន សុវណ្ណ បានច្រានចោលចំពោះការលើកឡើងរបស់លោកស្រី កែវ សារី ដែលជាម្តាយរបស់លោកឧកញ៉ា ថោង សារ៉ាត់ ដែលបានថ្លែងនៅក្នុងសន្និសីទកាសែត ថាលោកបានបញ្ជាឱ្យចាប់ខ្លួនលោកឧកញ៉ា ថោង សារ៉ាត់
បន្ទាប់ពីសមត្ថកិច្ចនគរបាលនាយកដ្ឋានព្រហ្មទណ្ឌក្រសួងមហាផ្ទៃ និងកម្លាំងនគរបាលព្រហ្ម ទណ្ឌ នៃស្នងការដ្ឋាននគរបាលរាជធានីភ្នំពេញ បានធ្វើការកោះហៅឧកញ៉ា ថោង សារ៉ាត់ ដើម្បីធ្វើការសាកសួរពាក់ព័ន្ធនឹងករណីឃាតកម្មលើឧកញ៉ា អ៊ឹង ម៉េងជឺ នៅកណ្ដាលរាជធានីភ្នំពេញកន្លងមកនោះ លោកស្រី កែវ សារី អាយុ៥៥ឆ្នាំ ជាម្ដាយ និងលោក តាំង សុខ ហៅថោង ចំរើន អាយុ ៦៥ឆ្នាំ ជាឪពុក របស់ឧកញ៉ា ថោង សារ៉ាត់ បានធ្វើសន្និសីទកាសែត ក្នុងគោលបំណងលាងកិត្ដិយស និងបដិសេធថា មិនជាប់ពាក់ព័ន្ធទៅនឹងអំពើឃាតកម្មមួយនេះឡើយ ។ សន្និសីទកាសែតនេះ បានធ្វើឡើងនៅទីស្នាក់ ការក្រុមហ៊ុនរបស់ខ្លួន ដែលមានទីតាំងស្ថិតនៅសង្កាត់ចាក់អង្រែក្រោម នៅជាប់របងវត្ដអង្រែក្រោម ខណ្ឌមានជ័យ កាលពីរសៀល ថ្ងៃទី៣ ខែធ្នូ ឆ្នាំ២០១៤ ។
លោកស្រី កែវ សារី និងប្ដីលោក តាំង សុខ ហៅថោង ចំរើន បាននិយាយថា កូនប្រុសរបស់លោក និងអង្គរក្សមិនបានជាប់ពាក់ព័ន្ធអំពើឃាតកម្មលើឧកញ៉ា អ៊ឹង ម៉េងជឺ នោះឡើយ ហើយរវាងកូនប្រុសរបស់ខ្លួន និងឧកញ៉ានោះ ក៏មិនដែលស្គាល់គ្នានោះទេ ។ ប៉ុន្តែនៅពេលដែលសមត្ថកិច្ច បានធ្វើ ការកោះហៅឧកញ៉ា ថោង សារ៉ាត់ ដើម្បីធ្វើការសាកសួរពាក់ព័ន្ធនឹងករណីឃាតកម្មលើឧកញ៉ា អ៊ឹង ម៉េងជឺ នោះ ស្រាប់តែលោកស្រី កែវ សារី និងប្ដីលោក តាំង សុខ ហៅថោង ចំរើន បានបញ្ជាក់ថា ពួកគាត់បានឱ្យកូនប្រុសរបស់គាត់គេចខ្លួនពីការកោះហៅរបស់សមត្ថកិច្ចហើយ ។
ពាក់ព័ន្ធទៅនឹងសំណុំរឿងនេះ លោកស្រី កែវ សារី និងប្ដីលោក តាំង សុខ ហៅថោង ចំរើន បានបញ្ជាក់ថា ពួកគាត់នឹងដាក់ពាក្យបណ្ដឹងទៅព្រឹទ្ធសភា រដ្ឋសភា ស្ថាប័នតុលាការ ដើម្បីប្ដឹងឯកឧត្តម ឧត្តមសេនីយ៍ឯក ជួន សុវណ្ណ ស្នងការនគរបាលរាជធានីភ្នំពេញ ពាក់ព័ន្ធនឹងករណី២ចំណុច គឺទី១ ប្ដឹងឯកឧត្តម ជួន សុវណ្ណ ពីបទបញ្ជាឱ្យចាប់ខ្លួនឧកញ៉ា ថោង សារ៉ាត់ និងអង្គរក្សចំនួន ៤នាក់ ដោយគ្មានឯកសារ និងភ័ស្ដតាងគ្រប់គ្រាន់, ទី២ គឺប្ដឹងឯកឧត្តម ជួន សុវណ្ណ ពីបទបញ្ជាឱ្យចាប់ខ្លួនលោកឧកញ៉ា ថោង សារ៉ាត់ ដោយមិនទាន់មានការឡាយព្រះហស្ដលេខាពីព្រះករុណា ព្រះមហាក្សត្រ នៃព្រះរាជាណាកច្រកម្ពុជា ក្នុងការដកហូតតំណែងជាឧកញ៉ា ពីឧកញ៉ា ថោង សារ៉ាត់ ។
ដោយឡែកពាក់ព័ន្ធទៅនឹងការលើកឡើងរបស់លោក កែវ សារី និងប្ដីលោក តាំង សុខ ហៅ ថោង ចំរើន បានថ្លែងនៅក្នុងសន្និសីទកាសែតនោះ ឯកឧត្តម ឧត្តមសេនីយ៍ឯក ជួន សុវណ្ណ អគ្គស្នង ការរងនគរបាលជាតិ និងជាស្នងការនគរបាលរាជធានីភ្នំពេញ បានច្រានចោលចំពោះការលើកឡើងរបស់លោកស្រី កែវ សារី ដែលជាម្តាយរបស់លោកឧកញ៉ា ថោង សារ៉ាត់ ដែលបានថ្លែងនៅក្នុងសន្និសីទកាសែតនៅរសៀលថ្ងៃទី៣ ខែធ្នូ នេះថា លោកស្នងការបញ្ជាឲ្យចាប់ខ្លួនកូនរបស់គាត់ឲ្យបាន កាលពីព្រឹកថ្ងៃទី៣ ខែធ្នូ ឆ្នាំ២០១៤ ។ ឯកឧត្តមស្នងការ បានអះអាងថា លោកមិនបានជួបជាមួយម្តាយលោកឧកញ៉ា ថោង សារ៉ាត់ ទេ និងមិនបានបញ្ជាឲ្យចាប់ខ្លួនលោកឧកញ៉ា ថោង សារ៉ាត់ ឡើយ។
ឯកឧត្តម ជួន សុវណ្ណ បានសង្កត់ធ្ងន់ថា អ្វីដែលអ្នកស្រី កែវ សារី និយាយត្រូវទទួលខុសត្រូវចំពោះមុខច្បាប់ ដែលបានផ្សព្វផ្សាយព័ត៌មានមិនពិត ។
ឯកឧត្តម ឧត្តមសេនីយ៍ឯក ជួន សុវណ្ណ បានមានប្រសាសន៍តាមរយៈទូរស័ព្ទកាលពីរសៀលថ្ងៃទី៣ ខែធ្នូ ថា នេះជាសំដីរបស់គាត់ គាត់ត្រូវទទួលខុសត្រូវចំពោះសំដីរបស់គាត់ចំពោះមុខច្បាប់ ព្រោះសមត្ថកិច្ចធ្វើការតាមច្បាប់របស់សមត្ថកិច្ច ។ ហើយក្នុងរយៈពេល ២ថ្ងៃ ដែលកំពុងតែប្រតិបត្តិការនេះ គឺស្នងការដ្ឋាននគរបាលរាជធានីភ្នំពេញ បានស្ថិតក្រោមការដឹកនាំរបស់ព្រះរាជអាជ្ញាគ្រប់វិនាទី ដែលមានលោក មាស ច័ន្ទពិសិដ្ឋ និងលោក សៀង សុខ ព្រះរាជអាជ្ញារង អមសាលាដំបូងរាជធានី ភ្នំពេញ មកដឹកនាំមន្ត្រីនគរបាលយុត្តិធម៌ ឲ្យបំពេញកាតព្វកិច្ចច្បាប់ត្រឹមត្រូវតាមនីតិវិធី ។ ឯកឧត្តម ជួន សុវណ្ណ បានបញ្ជាក់ថា “វាមិនមែនជារឿង ដែលខ្ញុំឯណាមានសិទ្ធិបញ្ជាឲ្យចាប់ ថោង សារ៉ាត់ ប៉ុន្តែនៅក្នុងកិច្ចការងារនេះ ជនដែលពាក់ព័ន្ធ និងសង្ស័យ ច្បាប់អនុញ្ញាតឲ្យមានការឃាត់ខ្លួន និងអញ្ជើញមកសាកសួរចំពោះច្បាប់ ហើយពាក្យថា ចាប់ខ្លួន និងអញ្ជើញមកសាកសួរ គឺវាខុសគ្នា”។ ឯកឧត្តម ស្នងការបានបញ្ជាក់ថា សំដីដែលម្តាយលោកឧកញ៉ា ថោង សារ៉ាត់ បាននិយាយនៅក្នុងសន្និសីទ កាសែត គឺគាត់ត្រូវទទួលខុសត្រូវ ចំពោះមុខច្បាប់ នេះជាករណីដែលគាត់បានផ្សព្វ ផ្សាយព័ត៌មានមិនពិត ធ្វើឲ្យរាំងស្ទះដល់ដំណើរការស្រាវជ្រាវរបស់សមត្ថកិច្ច ពីព្រោះសមត្ថកិច្ចបាននឹងកំពុងបន្តកិច្ចការរបស់ខ្លួនយ៉ាងសកម្មជុំវិញបញ្ហានេះ ។
ទាក់ទងនឹងការបាញ់សម្លាប់លោកឧកញ៉ា អ៊ឹង ម៉េងជឺ កាលពីយប់ថ្ងៃទី២២ ខែវិច្ឆិកា ឆ្នាំ២០១៤ ស្ថិតតាមបណ្តោយផ្លូវព្រះសីហនុ កែងនឹងផ្លូវលេខ១០៥ ក្នុងសង្កាត់ទួលស្វាយព្រៃទី២ ខណ្ឌចំការមន មានជនសង្ស័យចំនួន ៤នាក់ ត្រូវបានសមត្ថកិច្ចឃាត់ខ្លួន យកទៅធ្វើការសាកសួរនៅស្នងការដ្ឋាន នគរបាលរាជធានីភ្នំពេញ ។ ជនសង្ស័យទាំង ៤នាក់ មានដូចជា៖ ទី១.ឈ្មោះ មាស សម្បត្តិ, ទី២.ឈ្មោះ សៀម វាសនា, ទី៣.ឈ្មោះ គយ ចាន់ថល និងទី៤.ឈ្មោះ លី សៅ ។
បើតាមការឱ្យដឹងពីស្នងការរងនគរបាលរាជធានីភ្នំពេញ លោកឧត្តមសេនីយ៍ត្រី ជួន ណារិន្ទ បានថ្លែងថា កាលពីយប់ថ្ងៃទី៣ ខែធ្នូ ឆ្នាំ២០១៤ កម្លាំងសមត្ថកិច្ចដឹកនាំដោយព្រះរាជអាជ្ញារងសាលា ដំបូងរាជធានីភ្នំពេញ ចំនួន ៨នាក់ បានឡោមព័ទ្ធតាមចាប់លោកឧកញ៉ា ថោង សារ៉ាត់ ភូមិគ្រឹះក្នុង បុរី៩៩៩ នៅសង្កាត់ចាក់អង្រែក្រោម និងសង្កាត់បឹងទំពន់ ខណ្ឌមានជ័យ ។ ក្នុងគ្រាដែល សមត្ថកិច្ច បានឡោមព័ទ្ធ និងឆែកឆេរភូមិគ្រឹះរបស់លោកឧកញ៉ា ថោង សារ៉ាត់ សមត្ដកិច្ចដកហូតបានកាំភ្លើង ចំនួន ៧ដើម ហើយនៅវេលាម៉ោង ១០ និង ២៥នាទីយប់ថ្ងៃទី៣ ខែធ្នូ សមត្ថកិច្ច បាន ធ្វើការឃាត់ ខ្លួនភរិយា ម្ដាយ ឪពុក ឈ្នួល និងអង្គផ្សេងៗរបស់លោកឧកញ៉ា ថោង សារ៉ាត់ ដើម្បីសួរនាំ រហូតដល់ ម៉ោង ១២យប់ សមត្ថកិច្ចបានបញ្ចប់ប្រតិបត្តិការ ដោយបាននាំខ្លួនមនុស្សសរុប ចំនួន ១២នាក់ ស្ថិត នៅក្នុងភូមិគ្រឹះរបស់លោកឧកញ៉ា ថោង សារ៉ាត់ ទៅកាន់ស្នងការដ្ឋាននគរបាលរាជធានីភ្នំពេញ ដើម្បី សាកសួរបន្តទៀត ចំណែកឯគេហដ្ឋានត្រូវបានព្រះរាជអាជ្ញា និងសមត្ថកិច្ច ធ្វើការឃ្លុមបេទុក ដើម្បី ធ្វើការស្រាវជ្រាវជាបន្តទៀត ។
ជាការកត់សម្គាល់ ប្រតិបត្តិការតាមចាប់ខ្លួនលោកឧកញ៉ា ថោង សារ៉ាត់ ដែលជាប់សង្ស័យ ជាមេក្លោងនៅពីក្រោយឃាតកម្មបាញ់សម្លាប់លោកឧកញ៉ា អ៊ឹង ម៉េងជឺ បានធ្វើឡើងភ្លាមៗ ពោល គឺរយៈពេលប្រហែលជា ២-៣ម៉ោងប៉ុណ្ណោះ បន្ទាប់ពីឪពុក-ម្តាយ របស់លោកឧកញ៉ា ថោង សារ៉ាត់ បានហៅអ្នកព័ត៌មានជាច្រើនស្ថាប័ន ទៅធ្វើសន្និសីទព័ត៌មាន លាងសម្អាតកេរ្តិ៍ឈ្មោះលោកឧកញ៉ា និង អង្គរក្សថា មិនមានជាប់ពាក់ព័ន្ធនឹងឃាតកម្ម ។
សូមបញ្ជាក់ថា លោកឧកញ៉ា អ៊ឹង ម៉េង ថៅកែស៊ីម៉ង់តិ៍ពេជ្រ និងជាម្ចាស់ហាងពេជ្រហុងកុង ត្រូវបានឃាតកបាញ់សម្លាប់មិនប្រណីដៃ បណ្តាលឲ្យដេកដួលស្លាប់ក្នុងថ្លុកឈាម កាលពីវេលាម៉ោង ជាង ៧យប់ថ្ងៃទី២២ ខែវិច្ឆិកា ឆ្នាំ ២០១៤ ពេលលោកចុះទិញផ្លែឈើនៅជិតស្តាតអូឡាំពិក ក្នុង សង្កាត់ទួលស្វាយព្រៃ២ ខណ្ឌចំការមន ៕
Ads
