ភ្នំពេញ ៖ រថយន្តឡិចស៊ីស ៤៧០ ពាក់ស្លាកលេខ រដ្ឋ27 2-0007 ចតនៅជាប់ចិញ្ចើមមហាវិថីព្រះនរោត្តម ត្រូវបុរស ម្នាក់ទំនងស្រវឹងស្រា បើកបររថយន្តកាមរីហាយប្រ៊ិត មួយគ្រឿង ក្នុងល្បឿនលឿនជ្រុលបុកយ៉ាងពេញទំហឹងចំណុចជិតសាលាបឋមសិក្សាព្រះនរោត្តម សង្កាត់ជ័យជំនះ ខណ្ឌដូនពេញ កាលពីវេលាម៉ោង ២២ នឹង៤០ នាទី យប់ថ្ងៃទី ១២ ខែមីនាឆ្នាំ ២០១៤ ។
យោងតាមប្រភពព័ត៌មានពីសមត្ថកិច្ចមូលដ្ឋានបានឲ្យដឹងថា មុនពេលកើតហេតុគេសង្កេតឃើញ រថយន្ត ឡិចស៊ីស ៤៧០ ពាក់ស្លាកលេខរដ្ឋ27 2-0007 ត្រូវម្ចាស់បើកបរយកមកចតនៅជាចិញ្ចើមមហាវិថីព្រះនរោត្តម ត្រង់ចំណុចកើតហេតុ ហើយម្ចាស់ដើរចូលទៅបរិភោគអាហារក្នុងភោជនីយ៍ដ្ឋានធ្វើព្រងើយ ។
លុះចតបានប្រហែលជា២០ នាទី ស្រាប់តែមានបុរសវ័យជាង៤០ ឆ្នាំ ម្នាក់បើកបររថយន្តកាមរីហាយប្រិតពណ៌ខ្មៅ ពាក់ស្លាកលេខ ភ្នំពេញ 2S 9695 មួយគ្រឿងធ្វើដំណើរយ៉ាងលឿន តាមមហាវិថីព្រះនរោត្តម ទិសដៅពីត្បូងទៅជើងគ្មានការប្រុងប្រយ័ត្ន ហើយទំនង មើលរថយន្តឡិចស៊ីស ៤៧០ ចតស្ងៀមមិនឃើញ ដូច្នេះក៏បណ្តាលឲ្យរថយន្តកាមរីហាយប្រ៊ិត ជ្រុលល្បឿនចាប់ហ្វ្រាំងមិនទាន់បុកចំគូទរថយន្តឡិចស៊ីស ៤៧០ ពេញទំហឹងលាន់ដូចរន្ទះ ធ្វើឲ្យក្បាលរថយន្តកាមរីហាយប្រ៊ិត រួញរង់ការខូចខាតទាំងស្រុង ចំណែករថយន្តឡិចស៊ីសខូចខាតបន្តិចបន្តួចប៉ុណ្ណោះ ។ គួរបញ្ជាក់ថាចំពោះហេតុ ការណ៍នេះមិនបណ្តាលឲ្យភាគីណាម្នាក់ត្រូវរងរបួសធ្ងន់ធ្ងរឡើយ ។
ក្រោយកើតហេតុសមត្ថកិច្ចមូលដ្ឋានបានសហការជាមួយនគរបាលជំនាញចុះសម្របសម្រួលរវាង ភាគី ទាំង ២ ដែរ ប៉ុន្តែពួកគេមិនយល់ស្របឡើយ ដូច្នេះសមត្ថកិច្ចសម្រេចវាស់វែងអូសយករថយន្តទាំង២គ្រឿង ទៅរក្សាទុកនៅអធិការដ្ឋាននគរបាលខណ្ឌដូនពេញរង់ចាំដោះស្រាយនាពេលក្រោយ ។
សមត្ថកិច្ចនៅមិនទាន់ស្គាល់ អត្តសញ្ញាណម្ចាសរថយន្តទាំង២គ្រឿងនេះទេ ហើយគ្រោះថ្នាក់នេះសមត្ថកិច្ចបង្ហើបថាបង្កឡើងដោយសារ រថយន្តចតនៅលើចិញ្ចើមផ្លូវជាពិសេសបុរសម្ចាស់រថយន្តកាមរីហាយប្រ៊ិតបើកលឿនពេក ៕ 
